Ezikyo

38 Yehoba wañambijile jikwabo amba: 2 “Obewa mwana muntu, tala kwi Gogi wa mu ntanda ya Magogi,+ mukulumpe wa babitumbafumu* ba bena Mesheke ne bena Tubala,+ kabiji waule bintu bikamumwekela.+ 3 Wambe’mba, ‘Nkambo Mfumu Yehoba waamba’mba, “Amiwa nakuzhingijila obewa Gogi mukulumpe wa babitumbafumu* ba bena Mesheke ne bena Tubala. 4 Amiwa nkakwalulula ne kukukona twanda mu mibanga yobe+ ne kukulupulamo pamo na nzhita yobe,+ bambili ne boba benda pa bambili saka bavwala bivwalo byawamisha. Bano bakekala jibumba jikatampe jikekala na makebo* akatampe ne acheche, bonse saka balama mapoko. 5 Bajinga pamo na bena Pelisha, bena Etiopya ne bena Puta,+ bonse saka baji na makebo ne tumpompo; 6 Obewa uji na mitundu ya bantu yavula, ko kuba’mba bena Goma ne nzhita yabo yonse ne bena Togama+ bafumine ku mapunzha a kwalepa a ku kabeta ka ku buyeke pamo na nzhita yabo.+

7 “‘“Inengezhai, obewa ne nzhita yobe yonse yo uji nayo kabiji obewa ukekala ntangi* wabo.

8 “‘“Bakakuvuluka* pa kupitapo moba avula. Ku mpelo ya myaka, ukalukuka kyalo kya bantu bo bapokolola ku mpoko, bo bafumya mu mitundu ya bantu yavula ne kwibakonkenya pa mitumba ya Isalela, yashajiletu masala pa myaka yavula bingi. Bantu ba mu kino kyalo bebakonkenye pamo kufuma mu mitundu ya bantu kabiji bonse baikele mu mutende.+ 9 Mukebalukuka nobe mvula wa kinkunkwila, kabiji obewa pamo ne nzhita yobe yonse ne mitundu ya bantu yavula yo uji nayo mukakumbana kyalo nobe makumbi.”’

10 “Nkambo Mfumu Yehoba waamba’mba: ‘Pa joja juba, milanguluko ikeya mu muchima wobe, kabiji ukalangulukila jimo mwa kubila bintu byatama. 11 Obewa ukamba’mba: “Nkalukuka kyalo kiji na mizhi yo babula kuzhikijila.+ Nkalukuka boba babena kwikala mu mutende kwa kubula bantu ba kwibalengesha moyo, ne boba babena kwikala mu mizhi yabula masakwa, tupingilo nangwa binzhilo.” 12 Ukoba bino kuba’mba wangate ne kupukula bintu, kulukuka mizhi yajinga kala masala mubena kwikala bantu+ ne kulukuka bantu bo bakonkanya pamo kufuma mu bisaka bya bantu,+ baji na bya bunonshi ne bipetu bikwabo byavula,+ babena kwikala pakachi pene pa ntanda.

13 “‘Bena Sheba+ ne bena Dedanyi,+ basulu ba ku Tashishi+ ne babilobo babo bonse bakakwambila’mba: “Nanchi ubena kulukuka kuba’mba wangate ne kupukula bintu nyi? Nanchi wakonkanya pamo bashilikale bobe kuba’mba basende siliva ne ngolode, bya bunonshi ne bipetu bikwabo, ne kupukula bintu byavula nyi?”’

14 “Onkao mambo, obewa mwana muntu, aula ne kwambila Gogi amba, ‘Nkambo Mfumu Yehoba waamba’mba: “Nanchi kechi ukayuka bantu bami bena Isalela byo bakekalanga mu mutende pa joja juba nenyi?+ 15 Obewa ukeya kufuma ku muzhi wobe, ku mapunzha a kwalepa a ku kabeta ka ku buyeke.+ Ukeya pamo na mitundu ya bantu yavula yo uji nayo, bonse saka benda pa bambili. Bano bonse ke jibumba jikatampe, kabiji nzhita ikatampe.+ 16 Ukeya na kulukuka bantu bami bena Isalela byonkatu makumbi byo avweta pa kyalo. Ku mpelo ya moba, obewa Gogi, nkakulengela kulukuka kyalo kyami+ pa kuba’mba bisaka bya bantu bikangyuke byo nkezhijika ku meso abyo kupichila mwi obewa.”’+

17 “Nkambo Mfumu Yehoba waamba’mba: ‘Nanchi obewa kechi yobe muntutu umo ye naambilepo mu moba a kunyuma kupichila mu bakalume bami, bangauzhi ba mu Isalela baawile pa myaka yavula kuba’mba ukebalukuka nenyi?’

18 “Nkambo Mfumu Yehoba waamba’mba, ‘Pa jonkaja juba, Gogi jo akalukukilamo kyalo kya Isalela, bukaji bwami bukakolomoka.+ 19 Nkamba na bukaji bwami buteema nobe mujilo; kabiji pa joja juba kukekala kitentanshi kikatampe mu kyalo kya Isalela. 20 Na mambo a amiwa masabi a mu kalunga ka mema, bañonyi, banyama ba mungye, byonse bikalaba panshi ne bantu bonse ba pano pa ntanda bakomvwa moyo,+ kabiji mitumba ne kwapelela mitumba ne masakwa onse bikapumukila panshi.’

21 “‘Nkambo Mfumu Yehoba waamba’mba, ‘Amiwa nkaleta mpoko pe aye pa mitumba yami yonse. Kabiji bonse pa muntu pa muntu bakealukilamo na mapoko abo.+ 22 Nkamukambula* na mwalo+ ne kwichila mashi anji; kabiji nkanokesha mvula wa mikwe ne mvula wa mabwe+ ne mujilo+ ne mabwe ateema mujilo+ pe aye, pa nzhita yanji ne pa mitundu ya bantu yavula yo aji nayo.+ 23 Nketumbijika ne kwizhijika amiwa mwine kabiji nkalengela bisaka bya bantu kungyuka; ne abo bakayuka’mba amiwa yami Yehoba.’