Ezikyo
3 Kepo añambijile’mba: “Obewa mwana muntu, ja kintu kyo nakupa.* Ja uno muvungilo, apa bino uye na kubuula bena Isalela.”+
2 Ponkapo naasamine, ne kuja uno muvungilo. 3 Wañambijile jikwabo amba: “Obewa mwana muntu, ja uno muvungilo ye mbena kukupa kabiji wikute.” Ne amiwa natatwile kumuja kabiji watobeletu nobe buki.+
4 Kabiji wañambijile’mba: “Obewa mwana muntu, yanga ku bena Isalela ukebabuule byambo byami. 5 Mambo kechi nakutuma kuya ku bantu bamba mulaka wakatazha nangwa mulaka ungi ne, bino nakutuma ku bena Isalela. 6 Kechi nakutuma kuya ku mitundu yavula ya bantu bamba mulaka wakatazha nangwa mulaka ungi ye wakonsha kubula kumvwa ne. Umvwe nakutumine ku bano bantu, abo inge bakumvwine.+ 7 Bino bena Isalela kechi bakakumvwina ne, mambo abo kechi bakeba kuñumvwina ne.+ Bena Isalela bonse beubila bintu byo bakeba bene kabiji bakosa michima.+ 8 Umvwa! Amiwa nakulengela kukosa muchima byonkatu abo byo bakosa michima+ ne kukosesha kilungi kyobe byonka byakosa bilungi byabo. 9 Nakosesha kilungi kyobe byonkatu byakosa jibwe ja daimanyi jakosa kukila jibwe ja nguzha.+ Kange wibachine nangwa kuba moyo na mambo a mwekelo yabo ne,+ mambo abo kyo kisaka kya bansatuki.”
10 Kabiji wañambijile jikwabo amba: “Obewa mwana muntu, teshako muchima ne kumvwa byambo byami byonse byo mbena kukubuula. 11 Yanga ku balongo* bobe baji mu buzha+ ukebabuule bino byambo. Nangwa bakomvwe nangwa bakakane,+ ukebabuule’mba, ‘Byambo byo ubena kwamba byafuma kwi Nkambo Mfumu Yehoba.’”
12 Ponkapo mupashi wa Lesa wansendele+ kabiji naumvwine kilulumo kikatampe kunyuma yami saka kyamba’mba: “Lukumo lwa Yehoba lutumbijikwe mu mpunzha yanji.” 13 Naumvwine kuvuma kwa byapi bya bilengwa byumi byo bipaakilenga na bikwabo,+ kuvuma kwa bitanga byajinga kwipi na bilengwa+ ne kilulumo kikatampe. 14 Mupashi wanshikwile ne kuntwala. Kabiji nayile saka nji na bulanda kabiji nazhingijile, bino Yehoba wankoseshenga. 15 Kabiji nayile ku bantu bajinga mu buzha baikalanga ku mpunzha ya Telabibi yajinga ku mukola wa Keba,+ kabiji naikele nabo konkakwa moba atanu na abiji saka navulañana.+
16 Byo papichile moba atanu na abiji, Yehoba wañambijile’mba:
17 “Obewa mwana muntu, nakutongola kwikala kasopa wa ba mu nzubo ya Isalela;+ kabiji inge waumvwa bintu byo nkamba, ukebanjimwineko.+ 18 Umvwe naambila muntu mubi namba, ‘Kine ukafwa,’ ne obewa wabula kumujimunako nangwa wabula kumubuula kuba’mba aleke byubilo byanji byatama pa kuba’mba akekale na bumi,+ aye ukafwa na mambo a bubi bwanji,+ pakuba amiwa nkakupamo mambo a mashi anji.*+ 19 Bino inge wajimunako mubi, ne aye wakana kuleka byubilo byanji byatama, ko kuba’mba aye ukafwa na mambo a bubi bwanji, pakuba obewa kine ukapulusha bumi* bobe.+ 20 Bino inge muntu waoloka waleka kuba bintu byawama watendeka kuba byatama,* amiwa nkabika kya kwituntulako kulutwe yanji, kabiji aye ukafwa.+ Inge wabula kumujimunako, aye ukafwa na mambo a bubi bwanji ne bintu byawama byo aubilenga kechi nkebivuluka ne, pakuba amiwa nkakupamo mambo a mashi anji.*+ 21 Bino umvwe wajimunako muntu waoloka kuba’mba abule kulenga mambo, ne aye wabula kwialenga, aye ukekala na bumi mambo wamujimwineko,+ ne obewa ukapulusha bumi* bobe.”
22 Yehoba wankoseshe ne kuñambila’mba: “Imana, uye ku musanza kabiji konkakwa nkamba ne obewa.” 23 Ponkapo naimene ne kuya ku musanza kabiji byo nafikile, namwene lukumo lwa Yehoba+ nabijitu lolwa lo namwene ku mukola wa Keba,+ ponkapo naponene kinkuvumene. 24 Kepo mupashi aishile pe amiwa kabiji wandengejile kwimana ponka po naimene,+ ne kuñambila’mba:
“Yanga ukeshinkile mu nzubo yobe. 25 Pakuba obewa mwana muntu, bakakukasa na ntambo kuchina’mba wakebanyema. 26 Kabiji nkalengela lujimi wobe kukakachila mu kanwa ne kwikala kamaama, kabiji ukakankalwa kwibajimunako, mambo abo kyo kisaka kya bansatuki. 27 Bino pa kwisamba ne obewa nkakwasamika kanwa kabiji wafwainwa kwibabuula’mba,+ ‘Byambo byo ubena kwamba byafuma kwi Nkambo Mfumu Yehoba.’ Awa ukeba kumvwa omvwe,+ ne yewa ubena kubula kukeba kumvwa akane, mambo abo kyo kisaka kya bansatuki.+