Buku wa Bubiji wa Bamfumu

22 Yosiya+ wajinga na myaka ya kusemwa itanu na isatu kimye kyo aikele mfumu, kabiji walamine mu Yelusalema myaka 31.+ Jizhina ja inanji wajinga Yedida mwana wa kwa Adaya wa ku Bozakata.+ 2 Waubilenga byaoloka kwi Yehoba ne kwenda mu mashinda onse a kwa Davida mushakulu wanji,+ kechi wasendukijile ku kilujo nangwa ku kipiko ne.

3 Mu mwaka wa bu 18 wa bukalama bwa Mfumu Yosiya, mfumu watumine munembeshi aye Shafwana mwana wa kwa Azaliya, Azaliya mwana wa kwa Meshulama, ku nzubo ya Yehoba+ amba: 4 “Yanga kwi Hilikiya+ ñanga mwine mukatampe, umubuule’mba atambule mali onse o baleta mu nzubo ya Yehoba,+ onka bakalama ba bibelo o batambula ku bantu.+ 5 Beapane ku boba bo batongola kutangijila mwingilo mu nzubo ya Yehoba, abo nabo basakwiapana ku ba mingilo ba mu nzubo ya Yehoba bonka babena kuwamisha paonaika,*+ 6 ko kuba’mba, basendwe, bantungi, ne bashimika na mabwe; beengijishe kupotamo bichi ne mabwe a kusonga a kuwamishisha nzubo.+ 7 Bino kechi bafwainwa kwibakalakanya pa mambo a mali o bebapa ne, mambo abo ba kishinka.”+

8 Kabiji Hilikiya ñanga mwine mukatampe waambijile Shafwana munembeshi+ amba: “Nataana buku wa Mizhilo+ mu nzubo ya Yehoba.” Byonkabyo, Hilikiya wapaine uno buku kwi Shafwana, ne aye watendekele kumutanga.+ 9 Kepo Shafwana munembeshi ayile kwi mfumu ne kumubuula’mba: “Bakalume benu basenda mali ajinga mu nzubo, kabiji beapana ku bantu batongolwa kutala pa mwingilo wa mu nzubo ya Yehoba.”+ 10 Kabiji Shafwana munembeshi wabuujile mfumu amba: “Kuji buku+ ye akumpa Hilikiya ñanga.” Kepo Shafwana atendekele kutangila mfumu uno buku.

11 Mfumu byo aumvwinetu byambo bya mu uno buku wa Mizhilo, watabwile bivwalo byanji.+ 12 Kepo mfumu akambizhe Hilikiya ñanga, ne Ahikama+ mwana wa kwa Shafwana, ne Akabola mwana wa kwa Mikaya, ne Shafwana munembeshi, ne Asaya kalume wa mfumu amba: 13 “Yainga mukangipwizheko kwi Yehoba, ne kwipwizhako bantu ne bena Yuda bonse pa mambo a byambo biji mu uno buku ye bataana; mambo Yehoba wituzhingijila bingi,+ na mambo a kuba bashakulu betu kechi bakookejile byambo bya mu uno buku ne kulondela byonse byanembwamo pa mambo a atweba ne.”

14 Onkao mambo, Hilikiya ñanga, ne Ahikama, ne Akabola, ne Shafwana, ne Asaya bayile kwi Hulada ngauzhi wa mukazhi.+ Aye wajinga muka Shaluma mwana wa kwa Tikiba, Tikiba mwana wa kwa Halahasa, kalama wa nzubo ya bivwalo, kabiji uno mwanamukazhi waikalanga mu Mwanzo wa Bubiji mu Yelusalema; kabiji besambile nanji konkakwa.+ 15 Uno mwanamukazhi wibambijile’mba: “Yehoba Lesa wa Isalela waamba’mba, ‘Kamubuulai muntu waji kwimutuma kwi amiwa amba: 16 “Yehoba waamba’mba, ‘Nkaleta bya malwa pa ino mpunzha ne pa bangikazhi bekalamo, kufikizha byambo byonse biji mu uno buku mfumu wa Yuda ye atanga.+ 17 Mambo bankana kabiji babena kusokela balesa bangi bitapisho+ ne kunzhingijisha na mingilo yonse ya maboko abo,+ bukaji bwami bukabuukila ino mpunzha kabiji kechi bakebupwisha ne.’”+ 18 Pakuba mfumu wa Yuda yenka waji kwimutuma na kwipuzha kwi Yehoba, mumubuule’mba, “Yehoba Lesa wa Isalela waamba’mba: ‘Pa mambo a byambo byo waji kumvwa, 19 na mambo a kuba waji kutako* muchima ne kwipelula+ kwi amiwa Yehoba byo waji kumvwa byo naamba pa ino mpunzha ne pa bantu bekalamo, amba bakebalengesha moyo ne kufingwa, kabiji waji kutabula bivwalo+ byobe ne kujila ku meso ami, ne amiwa na kumvwa, byo byaamba Yehoba. 20 O ene mambo o nkakutwajila na kulaala kwalaala* bashakulu bobe, kabiji bakakulaajika mu kilende kyobe mu mutende, kabiji meso obe kechi akamona bya malwa byonse byo nkaleta pa ino mpunzha ne.’”’” Kepo babwelele na kubuula mfumu bino byambo.