Ku Bena Kolose
2 Mambo nasaka namba muyuke byo mbena kwimumanamina anweba ne boba baji mu Laodikea+ ne bonse bakyangye kummonapo.* 2 Kiji bino kuba’mba michima yabo beitekeneshe+ ne kuba’mba bakwatankane pamo mu butemwe+ ne kwikala na bunonshi bonse bufuma mu kumvwisha bintu bulongo, pa kuba’mba bayukishe bulongo kyafyamika kyazhila kya Lesa, ko kuba’mba Kilishitu.+ 3 Monka mwi aye mo mwafyama byonse bya buneme bya maana ne kuyuka bintu.+ 4 Mbena kwamba kino kuba’mba, muntu nangwa umo abule kwimujimbaika na byambo bya mulambisha. 5 Nangwa kya kuba mu mubiji mfwako, bino nji nenu mu mupashi, saka nsekela pa kumona byo mwaikala bulongo+ ne lwitabilo lwenu byo lwakosa mwi Kilishitu.+
6 Onkao mambo, monka mo mwatambwijile Kilishitu Yesu Nkambo, endelainga monka mwi aye, 7 saka mwatabilamo, ne kushimikwa monka+ ne kukoselamo mu lwitabilo,+ byonka byo bemufunjishe ne kuyula na lusanchilo.+
8 Mwafwainwa kumona’mba kafwako muntu nangwa umo wimukwata buzha na buntemwa maana ne bujimbijimbi+ monka mwayila bisho bya bantu, kabiji mwayila bya bwanyike bya pano pa ntanda, bino kechi mwayila Kilishitu ne; 9 mambo mwi aye mo mwayula byubilo bya Lesa byonse.+ 10 Kabiji na mambo a aye kafwako kintu nangwa kimo kyo mwakajilwa ne, aye ye mutwe wa makafulumende onse ne bonse ba luusa.+ 11 Na mambo a bulunda bwenu ne aye kechi mwatwajilwe ku mukanda ubiwa na maboko ne, bino mwatwajilwe ku mukanda wa kuvuula mubiji wa buntunshi,+ kupichila mu mukanda wa mwi Kilishitu.+ 12 Mambo mwazhiikilwe nanji mu lubatizhilo lwanji,+ kabiji kupichila bulunda bwenu ne aye mwasangwilwe nanji+ na mambo a lwitabilo lwenu lwa mu mingilo ikatampe ya Lesa, yenka wamusangwile mu bafu.+
13 Kabiji nangwa kya kuba mwafwile ku mizhilulwila yenu ne mu bumbulwa mukanda bwa mibiji yenu, Lesa wimulengejile kwikala bomi pamo ne aye.+ Witulekejileko mambo pa mizhilulwila yetu yonse+ 14 ne kufuuta* Mizhilo yanembwa+ yajinga na malamuna+ kabiji itulengulwile.+ Wiifumyamo mu jishinda kupichila mu kwiipopela pa kichi* kya lumanamo.+ 15 Na mambo a kichi kya lumanamo, wavuula makafulumende ne ba luusa ne kwibamwesha patoka amba wibashinda+ ne kwibasenda mu munongo nobe bakaili.
16 Onkao mambo, kange muleke muntu nangwa umo emuzhachishe na mambo a kajo, bya kutoma+ nangwa na mambo a kusekelela kijiilo nangwa kutentama kwa ñondo+ nangwa na juba ja sabado ne.+ 17 Abino bintu ke kimvuletu kya bintu bikeya,+ bino bintu bya kine ke bya Kilishitu.+ 18 Kechi muleke muntu nangwa umo usekela mu kwipelula kwa bubela ne mu kupopwela bamalaika emulengele kubula kukatambula kilambu ne.+ Bantu ba uno mutundu “batemwa kukosela” pa bintu bimweka kabiji milanguluko yabo ya buntunshi ibalengela kwitota kyatu, 19 kabiji kechi bakakachila ku mutwe ne,+ konka mubiji yense ko atambwila bintu ne kunungakena pamo mu manungi anji ne mishipeshipe ne kumulengela kukoma na bulume bwa Lesa.+
20 Umvwe mwakaine bya bwanyike bya pano pa ntanda ne kufwila pamo na Kilishitu,+ pano mambo ka o mukikela nobe mukiji ba pano pa ntanda byo mubena kulondela tumizhilo:+ 21 twa kuba’mba, “Kange musende ne, nangwa kutompako ne, nangwa kukwatako ne,” 22 kwamba pa bintu byonaika pa kwingila nabyo, monka mwayila mikambizho ne mafunjisho a bantu?+ 23 Nangwa kya kuba bino bintu bimweka nobe maana umvwe muntu ubena kupopwela mwayila kyaswa muchima wanji na kwipelula kwa bubela, ne kukabisha mubiji,+ kechi bikwasha mu kukanya bya kusakasaka bya mubiji ne.