Ku Bahebelu
2 Onkao mambo, twafwainwa kuteshako bingi muchima ku bintu byo twaumvwine,+ pa kuba’mba tubule kukumpulwa.+ 2 Mambo umvwe byambo byaambiwe kupichila mwi bamalaika+ byajinga bya kine, ne bantu ba mizhilulwila ne babula kukookela bebakambwile monka mwayila bunchibamambo bwaoloka,+ 3 pano tukapuluka byepi lukabisho umvwe twalengulula byambo byaamba pa kyauba Lesa kuba’mba etupulushe?+ Mambo Nkambo ye wajinga mutanshi kwibyamba+ kabiji bebishimwine kwi atweba ku boba bamumvwine, 4 kabiji Lesa naye washimwine na bimwesho ne na bya kukumya* ne na mingilo ya bulume+ ne kupana bya bupe bya mupashi wazhila monka mwayila kyaswa muchima wanji.+
5 Mambo Lesa kechi wakookesheshe bamalaika ntanda ikeya+ yo tubena kwambapo ne. 6 Bino kamonyi umo wanembele’mba: “Nanchi muntu ye ñanyi byo mumuvuluka, nangwa mwana muntu ye ñanyi byo mumuta muchima?+ 7 Mwamulengele kukepakotu pacheche pa bamalaika; mwamuvwikile lukumo ne buneme, ne kumutongola kwikala mukulumpe wa mingilo ya maboko enu. 8 Bintu byonse mwibikookesheshe munshi ya maulu anji.”+ Byo amukookeshesha bintu byonse,+ kafwako kintu nangwa kimo Lesa kyo ashapo kubula kumukookeshesha ne.+ Pakuba pano tukyangye kumona byonse saka bebikookeshesha kwi aye.+ 9 Bino Yesu tumumona, ye bapelwile kukila bamalaika,+ luno bamuvwika lukumo ne buneme na mambo a kuba wafwile,+ pa kuba’mba mu lusa lukatampe lwa Lesa, atompele lufu bantu bonse.+
10 Bintu byonse byaikelako lukumo lwa Lesa+ kabiji byaikalako na mambo a aye. Onkao mambo, pa kuba’mba atumbijike baana bavula, kyamufwainwe Lesa kuswisha Ntangi Mwine+ kumanama. Na mambo a kino, wafikijilemo kwibapulusha.+ 11 Mambo awa ye babena kuzhijika ne boba bo babena kuzhijika+ bafuma ku muntu umo,+ kabiji na mambo a kino aye kechi umvwa bumvu pa kwibatela’mba, balongo bami ne,+ 12 byo aamba’mba: “Nkasapwila jizhina jenu ku balongo bami; nkemutotanga mu nyimbo mukachi ka kipwilo.”+ 13 Kabiji amba: “Amiwa nkamuketekela.”+ Ne kuba’mba: “Umvwai! Amiwa ne baana bami bo ampele Yehoba.”*+
14 Onkao mambo, “baana ba bacheche” byo baji ba mibiji ya mashi, ne aye waikele ke mubiji wa mashi+ kuba’mba kupichila mu lufu lwanji afumyepo awa uleta lufu,+ ko kuba’mba Diabola,+ 15 ne kuba’mba apokolole aba bonse bo bakwachile buzha mu bwikalo bwabo na mambo a kuchina lufu.+ 16 Mambo aye kechi ubena kukwasha bamalaika ne, bino ubena kukwasha mwana* wa kwa Abalahama.+ 17 Onkao mambo, mu bintu byonse waikele nobe “balongo” banji,+ kuba’mba ekale na lusa kabiji ñanga mwine mukatampe wa kishinka mu mwingilo wa Lesa, pa kuba’mba atapishe kitapisho*+ kya kufumyapo bundengamambo bwa bantu kuba’mba bapwane ne Lesa.+ 18 Byo kiji kuba’mba aye wamanamine ne kwesekwa,+ wakonsha kukwasha bonse bo babena kweseka.+