Nkalata ya Bubiji ku Bena Kolinda
1 Amiwa Paulo, mutumwa wa Kilishitu Yesu monka mwaswila muchima wa Lesa, pamo na mulongo wetu aye Timoti,+ nanembela ino nkalata kipwilo kya Lesa kiji mu Kolinda, kubikapotu ne bazhijikwa bonse baji mu Akaya monse:+
2 Lusa lukatampe ne mutende bifuma kwi Lesa Tata wetu ne Nkambo Yesu Kilishitu bikale pe anweba.
3 Atotwe Lesa Shanji Nkambo yetu Yesu Kilishitu,+ Shanji bya lusa+ kabiji Lesa wa lutekenesho lonse,+ 4 witutekenesha* mu meseko* etu onse+ kuba’mba ne atweba tutekeneshe bakwetu+ mu meseko* a misango ne misango na lutekenesho lo tutambula kufuma kwi Lesa.+ 5 Mambo byonkatu bya malwa byetu mwi Kilishitu byo bibena kwituvujila,+ ne lutekenesho lo tutambula mwi Kilishitu nalo lubena kuvula. 6 Byo tupita mu meseko,* kino kilumbulula lutekenesho ne lupulukilo lwenu; kabiji umvwe babena kwitutekenesha, boba bino kuba’mba ne anweba bemutekeneshe, lutekenesho lwimukwasha kuchinchika lumanamo luntutu lumo lo tubena kumanama. 7 Kabiji luketekelo lwetu lo twimuketekela lwakosa, mambo twayuka’mba byonkatu byo mubena kumanama na bintu byo tubena kupitamo, byo byo bakemutekenesha byonka byo babena kwitutekenesha.+
8 Balongo bami, twakeba’mba twimubuule bya malwa byo twapichilemo mu kibunji kya Asha.+ Twamanamine bingi kukila pa bulume bwetu, kabiji kechi twaketekejile’mba tusakupuluka ne.+ 9 Kine twashiinwe’mba tusakufwa. Kino kyamwekele kuba’mba tubule kwiketekela atwe bene, poso amba tuketekele mwi Lesa+ usangula bafwa. 10 Aye witupokolwele ku kintu kyakonsheshe kwituletela lufu kabiji uketupokolola, kabiji twamuketekela’mba ukatwajijila na kwitupokolola.+ 11 Ne anweba mwakonsha kwitukwasha na milombelo yenu ya misashijilo,+ pa kuba’mba bavula betusanchileko na mambo a bibusa byo twatambula na mambo a kukumbulwa kwa milombelo ya bavula.*+
12 Kintu kyo twitotelamo ke kino, jiwi jetu ja muchima jibena kwamba pa byo twauba pano pa ntanda kikatakata kwi anweba, twaikala mu buzhile ne na muchima wa bukine wafuma kwi Lesa kechi na maana a ba pano pa ntanda ne,+ bino na lusa lukatampe lwa Lesa. 13 Mambo kechi tubena kwimunembela pa bintu bikwabo ne, kana bintu byo mwakonsha kutanga* ne kukwatakanya, kabiji naketekela namba bino bintu mukatwajijila kwibikwatakanya bulongo,* 14 byonkatu ne anweba byo mwakwatakanya kya kuba atweba twaikala ke kya kwitotelamo kyenu, byonkatu ne anweba byo mukekala kya kwitotelamo kyetu mu juba ja Nkambo yetu Yesu.
15 Na mambo a luno luketekelo, patanshi nakebelenga kwiya ko muji kuba’mba mukasekele ja bubiji;* 16 mambo nakebelenga kupitako koko pa kuya ku Makedonya ne kubwela jibiji ko muji pa kufuma ku Makedonya, apa bino mukanshinjikinyeko pa kuya ku Yudea.+ 17 Byo nalangulukilenga bino, nanchi nalangulukilenga byatutu nyi? Nangwa bintu byo mfuukula, nanchi nebifuukwila mumwena bantu kya kuba kañambe’mba “Ee, ee” kabiji ponkatu amba “Ine, ine” nyi? 18 Bino Lesa wafwainwa kuketekelwa, mambo byo twimwambila kechi biji bya kuba’mba, “Ee” kabiji byaaluka’mba “Ine,” ne. 19 Mambo Mwana Lesa, aye Yesu Kilishitu wasapwijilwe kwi anweba kupichila mwi atweba, ko kuba’mba amiwa ne Silivanusa* ne Timoti,+ kechi wajinga “ee” kabiji waaluka’mba “ine” ne, pakuba “ee” wajinga “ee” mwi aye. 20 Mambo nangwa kya kuba milaye ya Lesa yavula byepi, yonse yaikala “ee” na mambo a aye.+ Onkao mambo, kupichila mwi aye mo mo twambila’mba “Amena” kwi Lesa,+ kuba’mba tumuletele lukumo Lesa. 21 Bino awa wimulayile anweba ne atweba kwikala ba kwa Kilishitu ne kwitushinga manyi ye Lesa.+ 22 Kabiji ye witubika katetesho+ atweba ne kwitupa kayukilo ka bintu bikeya,* ko kuba’mba, mupashi,+ mu michima yetu.
23 Kabiji namwita Lesa kwikala kamonyi wami kuba’mba nemwamuneko ku bya bulanda pa kubula kwiya ku Kolinda pa kino kimye. 24 Kechi na mambo a kuba’mba twi bankambo ba lwitabilo lwenu ne,+ bino twi ba mwingilo umo ne anweba kuba’mba mwikale na lusekelo, mambo mwaimana bakosa na mambo a lwitabilo lwenu.