Byubilo bya Batumwa
2 Juba ja Kijiilo kya Pentekosita+ saka jikyangye kupwa, baana ba bwanga bakonkene pamo mu nzubo. 2 Ponkapotu mwiulu mwafumine kilulumo, nobe kinkunkwila kikatampe, kabiji kyakumbene nzubo yonse mo baikele.+ 3 Bamwene njimi yamwekelenga nobe mujilo, kabiji yaishile ne kwikala pa muntu pa muntu, 4 kabiji bonse bayujile mupashi wazhila+ ne kutatula kwamba mu milaka* yapusana pusana, monka mupashi mo ebaswishishe kwamba.+
5 Pa kyonkakya kimye, Bayudea baakamwanga Lesa bafumine mu byalo byonse baikelenga mu Yelusalema.+ 6 Onkao mambo, kino kilulumo byo kyaumvwanyikile, jibumba jakonkene kabiji bakuminye bingi, mambo muntu yense wibomvwine saka bamba mu mulaka wanji. 7 Kine bakuminye bingi ne kushikisha’mba: “Monai, nanchi bano bonse babena kwamba, kechi bena Ngalilea+ nenyi? 8 Pano tubena kumvwa byepi atweba bonse awu mu mulaka* wanji, awu mu mulaka wanji? 9 Bena Palatiya, bena Meda+ ne bena Elama;+ bangikazhi ba mu Mesopotamya, Bayudea ne bena Kapadokya, bena Pontusa ne ba mu kibunji kya Asha,+ 10 bena Filigya ne bena Pamifilya, bena Ijipita ne ba mu mapunzha a Libya aji kwipi na Kilene; bantu bafumine ku Loma, Bayudea ne baalukile ke Bayudea;+ 11 bena Keleta ne bena Alabya—tubena kwibomvwa saka bamba pa mingilo ikatampe ya Lesa mu milaka yetu.” 12 Bantu bonse bakuminye bingi ne kwishikisha bene na bene amba: “Nanchi kino kyatala mu ka?” 13 Nangwa byonkabyo, bamo bebendelekelenga amba: “Bano bantu bapendwa binyu* bya bintonto.”
14 Bino Petelo waimene na batumwa Jikumi na Umo,+ ne kwamba na jiwi ja peulu amba: “Anweba mwikala mu Yudea ne anweba bonse bangikazhi ba mu Yelusalema, yukai kino ne kutelekesha byambo byo nsakwamba. 15 Bano bantu kechi bapendwa byonka byo mubena kulanguluka ne, mambo jo jiola* ja busatu ja juba. 16 Bino kino kyo kyokya kyo baambile kupichila mwi ngauzhi Yoela amba: 17 ‘Lesa waamba’mba, “Mu moba a kupelako, nketulwila mupashi wami pa bantu bonse, ne baana benu ba balume ne baana benu ba bakazhi bakaula, kabiji bansongwalume benu bakamona bimwesho ne bakote benu bakalota biloto,+ 18 kabiji mu oa moba nketulwila mupashi wami pa bakalume bami ba balume ne ba bakazhi ne abo bakaula.+ 19 Kabiji nkamwesha bya kukumya* mwiulu, ne pano pa ntanda nkamwesha biyukilo bya mashi ne mujilo ne makumbi a bwishi. 20 Juba jikaluka ke mfishi ne ñondo ukaluka ke mashi, juba jikatampe kabiji ja lukumo ja Yehoba* saka jikyangye kwiya. 21 Kabiji yense wita pa jizhina ja Yehoba* ukapuluka.”’+
22 “Anweba bena Isalela, umvwai bino byambo: Yesu mwina Nazala, Lesa ye ye emusolwejile patoka kupichila mu mingilo ya bulume ne ya kukumya* ne biyukilo Lesa byo aubile mukachi kenu kupichila mwi aye,+ byonkatu byo mwayuka. 23 Uno ye bapaine monka mwafuukwijile Lesa ne mo ayukijile jimo,+ mwamupopejile pa kichi na maboko a bantu babujile kuyuka mizhilo, kabiji mwamwipayile.+ 24 Bino Lesa wamupokolwele ku lufu+ kupichila mu kumusangula, mambo kechi kyamufwainwe’mba lufu lumulame ne.+ 25 Mambo Davida waambilepo pe aye amba: ‘Kimye kyonse ndanguluka pe Yehoba,* na mambo a kuba uji ku kilujo kyami kuba’mba mbule kutenkena. 26 Na mambo a kino, muchima wami wasangalele bingi ne lujimi wami wasekejile bingi. Kabiji amiwa* nkekala na luketekelo; 27 mambo amiwa* kechi mukandekela mu Kilende* ne, nangwa kuswisha kalume wenu wa kishinka kubola ne.+ 28 Mwandengela kuyuka mashinda a bumi; mukandengela kwikala na lusekelo monka mu kyenyi kyenu.’*+
29 “Balongo bami, mbena kwimwambila kipasu pa mambo a mutwe wa kisemi aye Davida, kuba’mba wafwile kabiji bamuzhiikile,+ ne kilende kyanji tuji nakyo ne lelo. 30 Mambo aye wajinga ngauzhi kabiji wayukile’mba Lesa wachipile luchipo kuba’mba ukekazha umo wa mu baana* banji pa jitanda janji,+ 31 kabiji wamwenejile jimo ne kwamba pa lusanguko lwa Kilishitu amba, kechi wamulekejile mu Kilende* ne, ne mubiji wanji kechi wabolele ne.+ 32 Lesa wasangwile uno Yesu, kabiji atweba bonse twi bakamonyi pa kino.+ 33 Onkao mambo, na mambo a kuba bamutumbijikijile ku kuboko kwa kilujo kya Lesa+ ne kutambula mupashi wazhila ye bamulayile kwi Shanji,+ waitulula kyo mubena kumona ne kumvwa. 34 Mambo Davida kechi wayile mwiulu ne, bino aye waambile’mba, ‘Yehoba* waambijile Nkambo yami amba: “Ikala ku kuboko kwami kwa kilujo 35 poso nkalule balwanyi bobe ke jitebe ja kunyantapo maulu obe.”’+ 36 Onkao mambo, bonse ba mu nzubo ya Isalela bayukishe kino amba Lesa ye wamulengela kwikala Nkambo+ kabiji Kilishitu, uno Yesu ye mwaipayijile pa kichi.”+
37 Byo baumvwine kino, michima yabo ibakatezhe bingi, kabiji bashikishe Petelo ne batumwa bakwabo amba: “Anweba bakwetu, nanchi tube byepi?” 38 Petelo wibakumbwile’mba: “Lapilai+ ne kubatizhiwa+ mu jizhina ja Yesu Kilishitu pa kuba’mba mambo enu alekelwe,+ kabiji musakutambula mupashi wazhila wa bupetu. 39 Mambo uno mulaye+ balayile anweba, baana benu, ne bonsetu baji kwalepa ne boba Yehoba* Lesa wetu bo akonsha kwita.”+ 40 Kabiji na byambo bikwabo byavula wibashimwijile bulongo ne kwibakambizha’mba: “Ipaatulaiko ku kino kisemi kyaluwankana kuba’mba mukapuluke.” + 41 Onkao mambo, aba batambwijile byambo byanji na muchima yense babatizhiwe,+ kabiji pa jonkaja juba bantu* banungilweko bajinga nobe 3,000.+ 42 Kabiji bantu batwajijile kufunda ku batumwa, saka bapwanañana* pamo, kujiila pamo+ ne kulombela pamo.+
43 Kine, bantu* bonse baubile bingi moyo, kabiji batumwa baubilenga bya kukumya* ne biyukilo byavula.+ 44 Aba bonse baitabijile bakonkene pamo kabiji bonse bajinga na bintutu bimo, 45 kabiji bapoteshenga bintu byabo byonse+ ne kupana mali ku bonse, kwesakana na monka mwakajilwe muntu yense.+ 46 Pa juba pa juba bakonkenanga pamo mu nzubo ya Lesa na mulanguluko umo, kabiji batwalanga kajo mu mazubo apusana pusana ne kujiila pamo kajo na lusekelo ne na muchima umo, 47 saka batota Lesa ne kubilwa bibusa ku bantu bonse. Kabiji pa juba pa juba, Yehoba* wanungilengako kwi abo bantu bavula bo apulwishenga.+