Nkalata ya Bubiji ku Bena Kolinda
5 Mambo twayuka’mba umvwe nzubo yetu ya pano pa ntanda, ko kuba’mba uno tente, bamupopolola,*+ tukekala na kishimikwa kyafuma kwi Lesa, kechi nzubo yashimikwa na maboko ne,+ poso yoya ya myaka ya mwiulu. 2 Mambo mu ino nzubo* tubinza, saka tukebesha kuvwala yetu* ifuma mwiulu,*+ 3 kuba’mba umvwe twiivwala, kechi tukatanwe matakotu ne. 4 Kabiji atweba tuji mu uno tente tubinza, tunemenwa, mambo kechi tukeba kumuvuula ne, bino tukeba kuvwajilapo mukwabo,+ kuba’mba akya kifwa bekimine ku bumi.+ 5 Awa witunengezhejile kino kintu ye Lesa,+ yenka witupele mupashi kwikala kiyukilo* kya bintu bikeya.+
6 Onkao mambo, tuchinchika kimye kyonse kabiji twayuka’mba byo tukiji na nzubo yetu mu uno mubiji, tuji kwalepa ne aye Nkambo,+ 7 mambo atweba tubena kwenda mu lwitabilo, kechi mu kumona na meso ne. 8 Bino tuchinchika kabiji tukebesha kubula kwikala mu uno mubiji ne kwikala na nzubo yetu na Nkambo.+ 9 Onkao mambo, nangwa tuji nanji mu nzubo nangwa ufwamo, atweba twakebesha bingi kuba’mba twikale baitabilwa kwi aye. 10 Mambo atweba bonse tukemana ku kipona kya kuchibilapo mambo kya Kilishitu, pa kuba’mba muntu yense akatambule mfweto monka mwayila bintu byo aubile kimye byo ajinga mu mubiji, byawama nangwa byatama.+
11 Onkao mambo, byo twayuka’mba twakamwa Nkambo, tubena kwitabisha bantu, pano bino Lesa wayuka byo tuji. Nangwa byonkabyo, naketekela’mba ne anweba mwituyuka bulongo. 12 Kechi tubena kwilumbulula jibiji kwi anweba ne, bino tubena kwimutundaika kwitotela mwi atweba, kuba’mba mukonshe kukumbula aba betota na mambo a mwekelo ya pangye ya mubiji,+ kechi na yoya ya mu muchima ne. 13 Mambo umvwe twakonyenye,+ twakonyenye na mambo a Lesa; umvwe twajingatu batuntulu, twajinga bino na mambo a anweba. 14 Mambo butemwe bwa Kilishitu bo bwitulengela kwingila, mambo twalanguluka bino amba, muntu umo wafwijile bantu bonse;+ onkao mambo, bonse bafwile. 15 Kabiji wafwijile bonse kuba’mba aba baji na bumi babule kwikelanga mwayila bikeba michima yabo,+ kana kwikela mwayila bikeba yewa wibafwijile kabiji ye basangwile.
16 Byonkabyo, kufuma luno kechi tumona bantu byonka byo twibamona ne.+ Nangwa kya kuba kala twamonanga Kilishitu monka mumwena bantu, pano luno kechi byo byo tumumona ne.+ 17 Onkao mambo, umvwe muntu uji mwi Kilishitu, ye kilengwa kipya;+ bintu bya kala byapichijila; pakuba bintu bipya byo byapingakenapo. 18 Bino bintu byonse byafuma kwi Lesa, yenka witupwainye kwi aye mwine kupichila mwi Kilishitu+ kabiji witupele mwingilo wa kupwainyamo bantu,+ 19 ko kuba’mba kupichila mwi Kilishitu Lesa wapwainye ba pano pa ntanda kwi aye mwine,+ kwa kubula kutongola mizhilulwila yabo+ kabiji witupele byambo bya kupwainyamo bantu.+
20 Onkao mambo, atweba twi bantomesha+ bemenako Kilishitu+ uba nobe Lesa ubena kwimusashijila kupichila mwi atweba. Byo tuji ba kwimenako Kilishitu tusashijila bantu namba: “Pwanai na Lesa.” 21 Muntu wabujile kulenga mambo,+ bamwalwile kwikala bundengamambo* na mambo a atweba, kuba’mba kupichila mwi aye twikale baoloka kwi Lesa.+