Ku Bahebelu
3 Onkao mambo, balongo bami bazhijikwa bo baita* kuya mwiulu,+ langulukai pa mutumwa ne ñanga mwine mukatampe ye twayuka,* aye Yesu.+ 2 Aye wajinga wa kishinka kwi Lesa wamutongwele,+ byonkatu Mosesa byo ajinga wa kishinka kwi Lesa kimye kyo aingijilenga monse mu nzubo ya Lesa.+ 3 Mambo aye* watelelwe’mba ye wafwainwa lukumo lwakila+ lwa kwa Mosesa, mambo aye ushimika nzubo wanema kukila nzubo ine. 4 Nzubo yonse kuji wiishimika, bino walengele bintu byonse, ye Lesa. 5 Kabiji Mosesa byo ajinga kalume wa kishinka, waingijilenga monse mu nzubo ya Lesa. Uno mwingilo wajinga kayukilo* ka bintu byaishile kusoloka pa kupitapo kakimye kacheche. 6 Bino Kilishitu Mwana Lesa, wajinga wa kishinka+ byo alaminenga nzubo ya Lesa. Atweba twi nzubo ya Lesa+ umvwe twajijila kwamba saka twakasuluka ne kukosela ku luketekelo lwetu lo twitotelamo kufika ne ku mpelo.
7 Onkao mambo, byonkatu mupashi wazhila byo aamba’mba,+ “Lelo jino, umvwe anweba mumvwe jiwi janji, 8 kange mukoseshe michima yenu byonka byo kyajinga kimye kyo bakolomwene bukaji, mu juba ja lweseko mu kiselebwa ne,+ 9 monka bashakulu benu mo bangesekelenga nangwa kya kuba bamwene mingilo yami pa myaka 40.+ 10 O ene mambo o nekizhingijile bingi kino kisemi ne kwamba’mba: ‘Kimye kyonse, michima yabo isendukamo mu jishinda, kabiji kechi bayuka mashinda ami ne.’ 11 Onkao mambo, nachipile na bukaji namba: ‘Kechi bakatwelamo mwa kukokolokela mwami ne.’”+
12 Balongo bami, jimukai kuchina’mba muntu nangwa umo mwi anweba wakekala na muchima watama wa kubula lwitabilo na mambo a kufuma kwi Lesa mumi;+ 13 Bino pa juba pa juba saka mwitundaika anwe bene na bene, byo kukiji kimye kyakonsha kutelwa’mba “Ja lelo,”+ pa kuba’mba muntu nangwa umo mwi anweba akabule kukosesha muchima wanji na mambo a bujimbijimbi bwa bundengamambo. 14 Mambo atweba tukengilako mwingilo ubena kwingila Kilishitu inge twakwachisha ku luketekelo lwetu lo twajinga nalo patanshi kufikatu ne ku mpelo.+ 15 Byonka byo kyaambiwa’mba, “Lelo jino, umvwe anweba mumvwe jiwi janji, kange mukoseshe michima yenu byonka byo kyajinga kimye kyo bakolomwene bukaji ne.”+
16 Nanchi bañanyi baumvwine ne kumuzhingijisha? Nanchi kechi aba bonse bafumine mu Ijipita bo batangijilenga kwi Mosesa nenyi?+ 17 Nanchi bañanyi Lesa bo azhingijile pa myaka 40?+ Nanchi kechi boba balengele mambo ne kufwila mu kiselebwa nenyi?+ 18 Nanchi kwi bañanyi ko achipile amba kechi bakatwelamo mwa kukokolokela mwanji ne? Nanchi kechi ku boba babujile kukookela nenyi? 19 Onkao mambo, twamona’mba na mambo a kubula lwitabilo, kechi batwelelemo ne.+