Ku Bena Efisesa
1 Amiwa Paulo mutumwa wa Kilishitu Yesu monka mwayila kyaswa muchima wa Lesa, kwi anweba bazhijikwa baji mu Efisesa+ kabiji ba kishinka ba mwi Kilishitu Yesu:
2 Lusa lukatampe ne mutende bifuma kwi Lesa Tata wetu ne kwi Nkambo Yesu Kilishitu bikale pe anweba.
3 Atotwe Lesa, Shanji Nkambo yetu Yesu Kilishitu, mambo witubila bibusa byavula na mupashi wanji mu mapunzha a mwiulu byo tuji baana ba bwanga ba kwa Kilishitu,+ 4 Byo etusajile kwikala mwi aye,* pano pa ntanda saka pakyangye kwikalako, kuba’mba twikale bazhila kabiji babula bulema+ kwi aye mu butemwe. 5 Mambo aye witutongwejile jimo+ amba twikale baana banji+ kupichila mwi Yesu Kilishitu, monka mo kyamutokela ku muchima ne monka mwayila kyaswa muchima wanji,+ 6 pa kuba’mba bamutote na mambo a lukumo lwa lusa lwanji+ lo etumwesheshe kupichila mu mwananji ye atemwa.+ 7 Na mambo a aye betukuula na bukuzhi bwa mashi anji,+ ko kuba’mba, kwitulekela mambo pa mizhilulwila yetu,+ monka mwayila kuvula kwa lusa lwanji lukatampe.
8 Wituvuzhizhe luno lusa lukatampe pa kwitupa maana a kine ne milangwe yonse, 9 byo etusolwejile kyafyamika kyazhila+ kya kyaswa muchima wanji. Kabiji na mambo a kuba kyamutokela ku muchima wafuukwijile jimo 10 bukalama bukafika pa kimye kyatongolwa, kuba’mba akakonkanye pamo jibiji bintu byonse mwi Kilishitu, bintu biji mwiulu ne biji pano pa ntanda.+ Kine kupichila mwi aye 11 mo mo twaikela ne kutongolwa kwikala banswanyi,+ byo twatongwejilwe jimo monka mwayila kufuukula kwa yewa wingila bintu byonse monka mwayila kyaswa muchima wanji, 12 pa kuba’mba kupichila mwi atweba twajinga batanshi kuketekela mwi Kilishitu, Lesa atotwe ne kutumbijikwa. 13 Bino ne anweba mwamuketekejile byo mwaumvwine mambo a bukine, o mambo awama emuletela lupulukilo. Byo mwaitabijile mwabikilwe katetesho+ na mupashi wazhila walayilwe kupichila mwi aye, 14 ko kayukilo* ko betupelejile jimo ka buswanyi bwetu,+ ka kuba’mba Lesa akakasulule bintu byanji+ kupichila mu bukuzhi,+ ne kumuletela lutotelo ne lukumo.
15 O ene mambo, ne amiwa byo naumvwa lwitabilo lo muji nalo mwi Nkambo Yesu ne butemwe bo mumwesha bonse bazhijikwa, 16 kechi naleka kusanta na mambo a anweba ne. Nemutela kimye kyonse mu milombelo yami, 17 kuba’mba Lesa wa Nkambo yetu Yesu Kilishitu, Tata wa lukumo, emupe mupashi wa maana ne wa lumwekesho monka mu maana alumbuluka a kumuyuka.+ 18 Walabisha meso a muchima wenu, pa kuba’mba muyuke mwayila luketekelo lo emwichileko, ne lukumo lukatampe lo alama kwikala kya buswanyi kya bazhijikwa,+ 19 ne kuba’mba muyuke kubaya kwa bulume bwanji bo etumwesha atweba baitabila.+ Buno bulume wibumwesha mu mingilo yo aingila kupichila mu bulume bwanji bukatampe 20 bo amwesheshe kimye kyo asangwile Kilishitu mu bafu ne kumwikazha ku kuboko kwa kilujo+ mu mapunzha a mwiulu, 21 kukila makafulumende onse, luusa lonse, bulume bonse, bunkambo bonse ne mazhina onse atelwa,+ kechi mu buno bwikalo* bonkatu ne, bino ne mu bobwa bukeya. 22 Lesa wakokeshe bintu byonse munshi ya maulu anji+ ne kumutongola kwikala mutwe wa bintu byonse mu kipwilo,+ 23 kyonka kyaikala ke mubiji wanji,+ ne kuyula kupichila mwi aye kabiji ye ukumbanya bintu byonse monse monse.