Byubilo bya Batumwa
1 Anweba Teofilusa, mu buku mutanshi ye nemunembejile, natongawilemo bintu byonse Yesu byo aubile ne kufunjisha+ 2 kufikatu ne kimye kyo atwajilwe mwiulu+ byo apwishishe kupana mikambizho ku batumwa banji bo asajile na lutangijilo lwa mupashi wazhila.+ 3 Byo apichile mu makatazho, wamwekele ku bano batumwa na bishiino bya kine+ byavula. Abo bamumwene pa moba 40, kabiji waambilenga pa Bufumu bwa Lesa.+ 4 Byo ajinga nabo, wibakambizhe’mba: “Kange mukafumemo mu Yelusalema ne,+ mukapembelenga akya kyalayile Batata+ kabiji kyo mwaumvwine kwi amiwa; 5 mambo Yoano wabatizhenga mu mema, bino anweba bakemubatizha na mupashi wazhila+ kabiji kwashalatu moba acheche.”
6 Byo bakonkene pamo, baipwizhe’mba: “Nkambo, nanchi mubena kubwezha bufumu ku bena Isalela pa kyonka kino kimye nyi?”+ 7 Aye wibakumbwile’mba: “Kechi kyo kyenu kya kuyuka kimye ne, pakuba Batata ba mwiulu bo baji na luusa lwa kutongola kimye kikamwekelamo bino bintu.+ 8 Bino mukatambula bulume kimye mupashi wazhila kyo akemwikijila,+ kabiji mukekala bakamonyi+ bami mu Yelusalema,+ monse mu Yudea ne mu Samaliya,+ ne monse mwapela ntanda.”+ 9 Byo apwishishe kwamba bino bintu, ne byo bakitajilenga, bamutwajile mwiulu, ne jikumbi jamuvwetele kabiji wazhimañene.+ 10 Byo bakitajilenga mwiulu aye saka aya, ponkapo kwamwekele banabalume babiji baimene saka bavwala bivwalo bitoka+ 11 kabiji bebepwizhe’mba: “Anweba banabalume bena Ngalilea, mambo ka o mwaimena na kutala mwiulu? Uno Yesu, ye batwala mwiulu kufuma kwi anweba, ukabwela byonka byo mwaji kumumona saka aya.”
12 Kepo babwelele ku Yelusalema+ kufuma ku Mutumba wa Maolivi uji kwipi na Yelusalema, pa kwendatu museke ye baswishishe pa juba ja sabado. 13 Byo bafikile, bayile mu kibamba kya peulu mo baikelenga. Mwajinga Petelo, Yoano, Yakoba, Andeleo, Filipa, Tomase, Batolomo, Mateo, Yakoba mwana wa kwa Alefesa, Shimona wajinga wa mukoyo ne Yudasa mwana wa kwa Yakoba.+ 14 Na mulanguluko umo, bano bonse balombelenga na mukoyo, pamo na banabakazhi bamo,+ ne Maliya inanji Yesu ne bankasanji.+
15 Mu oa moba, Petelo waimene mu balongo (bantu bonse bakonkene bajinga 120) ne kwamba’mba: 16 “Balongo bami, kyafwainwe kuba’mba kinembelo kifike mupashi wazhila kyo aawile mwi Davida pa mambo a kwa Yudasa+ watangijile boba bantu bakwachile Yesu.+ 17 Mambo aye wabajilwe pamo ne atweba+ kabiji waingijilengako uno mwingilo. 18 (Onkao mambo, uno muntu wapotele bujimi na mfweto ya bubi bwanji,+ kabiji pa kupona wafikizhepo mutwe ne jivumo jasabikile* ne bya munda byasepukile.+ 19 Kabiji bantu bonse mu Yelusalema bayukile kino kyamwekele, buno bujimi bebutelelenga mu mulaka wabo amba Akeladama ko kuba’mba, “Bujimi bwa Mashi.”) 20 Mambo kyanembelwe mu buku wa Masalamo amba, ‘Mpunzha yanji ishaletu ke masala, kabiji kafwako muntu wafwainwa kwikalamo ne,’+ ne ‘Mwingilo wanji wa bukalama bape muntu mukwabo.’+ 21 Onkao mambo, kyafwainwa kuba’mba pa banabalume baendelenga ne atweba kimye kyonse Nkambo Yesu kyo aingijilenga mingilo yanji byo ajinga ne atweba, 22 kufumatu kimye kyo bamubatizhe kwi Yoano+ kufikatu ne juba jo bamutwajile mwiulu,+ umo mu bano banabalume wafwainwa kwikala kamonyi wamweneko pamo ne atweba lusanguko lwanji.”+
23 Ponkapo batongwele banabalume babiji, Yosefwa watelwanga’mba Basabasa, kabiji ye batelanga’mba Yusitusa, ne Matiasa. 24 Kepo balombele ne kwamba’mba: “Anweba Yehoba* mwayuka michima ya bantu bonse,+ tubuulai ye mwasala pa bano banabalume babiji 25 kuba’mba aswane pa uno mwingilo ne butumwa, Yudasa byo ashile ne kuya ku mpunzha yanji.”+ 26 Ponkapo batele bubale,+ ne bubale bwakwachile Matiasa, kabiji bamubajijile* ku batumwa 11.