Yoela
2 “Vumyai lusengo mu Ziona!+
Ubai kiwowo kya nkondo mu mutumba wami wazhila.
2 Jo juba ja mfishi ne mfishi ikatampe,+
Juba ja makumbi ne mfishi ine yafitatu bwi,+
Jiji nobe kyeya kya lukelo kisamina pa mitumba.
Kuji bantu bavula kabiji bakosa;+
Kukyangye kwikalapo bantu baji nobe bano,
Kabiji kechi kukekalapo bakwabo
Myaka yonse mu bisemi byonse ne.
3 Kulutwe yabo kuji mujilo usokañana,
Kabiji kunyuma yabo kuji lubebe lwa mujilo lusokañana.+
Kyalo kiji kulutwe yabo kiji nobe bujimi bwa Edena,+
Pakuba kunyuma yabo kuji kiselebwa mwabula bintu,
Kabiji kafwako kintu kyakonsha kupuluka ne.
4 Bamweka nobe bambili,
Kabiji banyema nobe bambili ba nkondo.+
5 Kilulumo kiji nobe makalaki abena kupita peulu ya mitumba,+
Kibena kumvwanyika nobe kutotauka kwa mujilo ubena kusoka nenge.
Baji nobe bantu bakosa betanchika kulwa nkondo.+
6 Na mambo a abo, bantu bakomvwa misongo.
Bilungi byonse bikakamwa.
7 Baya kulutwe nobe babilobo,
Bakanjila nsakwa nobe bashilikale,
Muntu yense uya mu jishinda janji,
Kabiji kechi basendukamo mu mashinda abo ne.
8 Kechi beshindaika mulwabo ne;
Muntu yense uya mu jishinda janji.
Inge bilwilo byaponeshapo bamo,
Bakwabo kechi bapalañana ne.
9 Banyemena ku muzhi ne kukanjila lubilo pa nsakwa.
Bakanjila pa mazubo, ne kutwelela mu bipenze nobe ngivi.
10 Kyalo kizakama ku meso abo ne meulu asunkena.
Juba ne ñondo byafiita,+
Ne tubangabanga twaleka kusama.
11 Yehoba ukabijika na jiwi janji ku nzhita yanji,+ mambo kampu wanji wabaya bingi.+
Mambo awa ubena kufikizha byambo byanji ye wa bulume;
Mambo juba ja Yehoba jo jikatampe kabiji jilengesha bingi moyo.+
Ñanyi wakonsha kuchinchika pa jino juba?”+
12 Yehoba waamba’mba, “Nangwatu lonka luno, bwelai kwi amiwa na michima yenu yonse,+
Saka muzhikilwa na nzala+ ne kujila ne kuwowakana.
13 Tabulai michima yenu,+ kechi bivwalo byenu ne,+
Kabiji mubwele kwi Yehoba Lesa wenu,
Mambo aye uji na kifyele* ne lusa, ubanda kuzhingila+ kabiji wavula butemwe bubula kwaluka,+
Kabiji ukalangulukapo jikwabo* pa bya malwa.
14 Ñanyi wayuka inge ukabwezhamo muchima ne kulangulukapo jikwabo*+
Ne kwitubila bibusa byavula,
Bya mulambo wa kajo ne mulambo wa binyu wa Yehoba Lesa wenu?
15 Vumyai lusengo mu Ziona!
Tayai mbila* ya kuzhikilwa na nzala; itai bantu ku kubuñana kwazhila.+
16 Konkanyai bantu pamo; zhijikai kipwilo.+
Konkanyai banabalume bakote;* konkanyai baana ne balukeke.+
Musongoshi alupuke mu kibamba kyanji kya mukachi, ne musongwa alupuke mu kibamba kyanji.
17 Pakachi ka kibamba kya pa kibelo ne kya kusokelapo bitapisho+
Bañanga, bonka ba mingilo ba Yehoba, bajile ne kwamba’mba;
‘Anweba Yehoba, bobilai lusa bantu benu;
Kange muleke buswanyi bwenu bwikale ke kintu kya kwendeleka,
Ne kuleka’mba bisaka bya bantu bikebalamenga ne.
Mambo ka bantu o bafwainwa kwambila’mba, “Lesa wabo uji pi?”’+
18 Yehoba po po akobila mukoyo kyalo kyanji
Ne kwibobila lusa bantu banji.+
19 Yehoba ukambila bantu banji amba;
‘Mbena kwimutumina kajo ne binyu bya katataka ne manyi,
Kabiji mukekuta bingi;+
Kechi nkemulengela kwendelekwa jibiji ku bisaka bya bantu ne.+
20 Muntu wikela ku kabeta ka ku buyeke nkamupangila kwalepa ne anweba;
Nkamupalañenya ku kyalo kyauma kyashalatu masala,
Ne nzhita yanji ya kulutwe* saka yatala ku kalunga ka mema ka ku musela*
Ne nzhita yanji ya kunyuma saka yatala ku kalunga ka mema ka ku muzhika,*
Kwi aye kukafuma bwema bwatama;+
Bwema bwatama bukafumanga kwi aye bukepukangatu;
Mambo Lesa ukoba bintu bikatampe.’
21 Obewa kyalo, kange wakamwe ne.
Sekela ne kusangalala, mambo Yehoba ukoba bintu bikatampe.
22 Anweba banyama ba mungye, kange mwakamwe ne,
Mambo mapunzha a mungye mo mujila mukamena munyemvu,+
Ne bichi bikapanga bipangwa;+
Kichi kya mukuyu ne kya muñanzañanza bikapanga bingi.+
23 Anweba baana ba kwa Ziona, sangalalai ne kusekela mwi Yehoba Lesa wenu;+
Mambo ukemupa mvula mutanshi waesakana bulongo,
Kabiji ukemunokeshesha mvula,
Mvula mutanshi ne upelako, byonka byo kyajinga kala.+
24 Pa bipujilo pakayula kajo kawama,
Ne mu bya kufiinamo mukayula binyu bya katataka ne manyi.+
25 Kabiji nkemubwezhezha bintu byenu bya myaka yonse
Byo yajiile nzhiye yenda kisamba, nzhiye yabula byapi, nzhiye iji na nzala ikatampe, ne nzhiye yonauna,
Nzhita yami ikatampe yo nemutumijile.+
26 Kine mukaja ne kwikuta,+
Kabiji mukatotanga jizhina ja Yehoba Lesa wenu,+
Yenka wimubila bintu bya kukumya;
Bantu bami kechi bakebalengesha bumvu jibiji ne.+
27 Kabiji mukayuka’mba nji mukachi ka bena Isalela+
Ne kuba’mba yami Yehoba Lesa wenu,+ kabiji kafwako mukwabo ne!
Bantu bami kechi bakebalengesha bumvu jibiji ne.
28 Kepo nketulwila mupashi wami+ pa bantu bonse,
Kabiji baana benu ba balume ne baana benu ba bakazhi bakaula,
Bakote benu bakalota biloto,
Ne bansongwalume benu bakamona bimwesho.+
29 Nangwatu pa bazha bami ba balume ne ba bakazhi
Nketulwilapo mupashi wami mu oa moba.
30 Kabiji nkamwesha bya kukumya* mwiulu ne pa ntanda,
Kukekala mashi ne mujilo ne mimbulungwa ya bwishi.+