Nkalata Itanshi ku Bena Kolinda
11 Ikalai ba kundondela, byonka byo ndondela Kilishitu.+
2 Mbena kwimutakaika mambo mumvuluka mu bintu byonse kabiji mwakakachila ku mafunjisho o nemufunjishe. 3 Bino nakeba namba muyuke’mba, mutwe wa mwanamulume yense ye Kilishitu;+ kabiji mutwe wa mwanamukazhi ye mwanamulume;+ kabiji mutwe wa Kilishitu ye Lesa.+ 4 Mwanamulume yense ulomba nangwa kwaula saka avwala kintu ku mutwe, upelula mutwe wanji; 5 bino mwanamukazhi yense ulomba nangwa kwaula+ saka abula kuvwala kintu ku mutwe, upelula mutwe wanji, mambo kijitu pamo na mwanamukazhi wakuyula mutwe. 6 Mambo umvwe mwanamukazhi wabula kuvwala kintu ku mutwe, wafwainwa kutenda nsuki yanji; bino inge kya kuba ke kintu kya bumvu mwanamukazhi kutenda nsuki nangwa kukuyula mutwe, wafwainwa kuvwala kintu ku mutwe.
7 Mwanamulume kechi wafwainwa kuvwala kintu ku mutwe ne, mambo ye kipasha ne lukumo lwa Lesa,+ pakuba mwanamukazhi ye lukumo lwa mwanamulume. 8 Mambo mwanamulume kechi wafumine ku mwanamukazhi ne, bino mwanamukazhi wafumine ku mwanamulume.+ 9 Kabiji mwanamulume kechi bamulengele na mambo a mwanamukazhi ne, bino mwanamukazhi walengelwe na mambo a mwanamulume.+ 10 O ene mambo mwanamukazhi o afwainwa kuvwajila kintu ku mutwe kwikala kayukilo ka kunekenena na mambo a bamalaika.+
11 Byonkabyo mwi Nkambo, mwanamukazhi kechi wakonsha kwikalako kwa kubula mwanamulume ne, kabiji mwanamulume naye kechi wakonsha kwikalako kwa kubula mwanamukazhi ne. 12 Byonkatu mwanamukazhi byo afumine ku mwanamulume,+ ne mwanamulume naye wafumine mu mwanamukazhi; pakuba bintu byonse byafuma kwi Lesa.+ 13 Ifuukwilaipo anwe bene: Nanchi kijitu bulongo mwanamukazhi kulomba kwi Lesa saka abula kuvwala kintu ku mutwe nyi? 14 Nanchi kisemwa kechi kimufunjisha kuba’mba umvwe mwanamulume uji na nsuki yazama kyo kintu kya bumvu kwi aye, 15 bino umvwe mwanamukazhi uji na nsuki yalepa lo lukumo kwi aye nenyi? Mambo nsuki yo yo bamupa mu kifulo kya kumupa kintu kya kuvwala ku mutwe. 16 Nangwa byonkabyo, umvwe muntu keakebe kupachika na mambo a bisho bikwabo, atweba nangwa bipwilo bya Lesa, twayuka’mba kechi tuji na kisho kikwabo ne.
17 Bino pa kwimupa ino mikambizho, kechi mbena kwimutakaika ne, mambo byo mupwila pamo kechi mupwila’mba mumwenemo byawama ne, kana kwiubila byatama. 18 Mambo kitanshitu ñumvwa’mba umvwe mwapwila pamo mu kipwilo, mwikala mabano mukachi kenu; ne amiwa nekitabako pacheche. 19 Mambo kwambatu kine, mwi anweba mukekala mepatulo,+ pa kuba’mba aba baitabilwa kwi Lesa mwi anweba bakayukanyikwe.
20 Byo mupwila pa mpunzha imo kine kechi mupwila na kuja Kijiilo kya Nkambo kya Mabanga ne.+ 21 Mambo umvwe kimye kyafika kya kwikija, muntu yense ujiila jimo kajo kanji ka mabanga, kya kuba umo ufwa nzala bino mukwabo upendwa. 22 Nanchi kechi muji na mazubo mwa kujiila ne kutomena nenyi? Nangwa nanchi mulengulula kipwilo kya Lesa ne kulengesha bumvu aba bakajilwa nyi? Nanchi nemwambile’mba ka? Abya nafwainwa kwimutakaika nyi? Mu kino kechi nsakwimutakaika ne.
23 Mambo kintu kyo natambwile kwi Nkambo nemubuujilekyo, kuba’mba abwa bufuku Nkambo Yesu+ saka bakyangye kumusolola washikwile shinkwa, 24 byo apwishishetu kulomba wamutebawile ne kwamba’mba: “Uno ubena kwimenako mubiji wami+ ye nkapana na mambo a anweba. Saka muba kino mu kumvuluka.”+ 25 Kabiji byo apwishishe kuja kijiilo kya mabanga, waubile kintutu kimo ku katomeno+ ne kwamba’mba: “Kano katomeno kabena kwimenako lulayañano lupya+ lwaikajikwa na mashi ami.+ Saka muba kino mu kumvuluka, kimye kyo mubena kwikatoma.”+ 26 Mambo kimye kyonse kyo muja uno shinkwa ne kutoma kano katomeno, musapwila lufu lwa Nkambo poso akafike.
27 Byonkabyo, awa uja shinkwa nangwa kutoma katomeno ka Nkambo saka abula kufwainwa, ubena kulenga mambo mubiji ne mashi a Nkambo. 28 Patanshi muntu akieseke mwine,+ apa bino aje shinkwa ne kutoma katomeno. 29 Mambo awa uja ne kutoma kwa kubula kuyuka mwatala mubiji, uja ne kwitomena mwine lukabisho. 30 O ene mambo bavula mwi anweba o bakookela, kukolwa kabiji bamo balaala mu tulo twa lufu.*+ 31 Bino umvwe twiyuka atweba bene byo tuji, kechi baketuzhachisha ne. 32 Nangwa byonkabyo, umvwe betuzhachisha, Yehoba*+ ye witololako, pa kuba’mba tubule kuzhatwa pamo na ba pano pa ntanda.+ 33 Byonkabyo, balongo bami umvwe mwapwila pamo na kuja kijiilo kya Nkambo kya mabanga, ipembelelaingapo. 34 Umvwe umo wafwa nzala, ajiile jimo ku nzubo, pa kuba’mba inge mwapwila pamo mubule kuzhatwa.+ Bintu byashalako, nkebyolola umvwe naiya.