Nkalata Itanshi ku Bena Kolinda

1 Amiwa Paulo ye baichile kwikala mutumwa+ wa kwa Kilishitu Yesu kupichila mu kyaswa muchima wa Lesa, pamo na mulongo wetu aye Sositenesa, 2 ku kipwilo kya Lesa kiji mu Kolinda,+ kwi anweba bazhijikwa mwi Kilishitu Yesu,+ mwaichilwe kwikala bazhijikwa, pamo na bonse baji konse konse babena kwita pa jizhina ja Nkambo yetu Yesu Kilishitu,+ Nkambo yabo kabiji Nkambo yetu:

3 Lusa lukatampe lwa Lesa ne mutende bifuma kwi Lesa Tata wetu ne kwi Nkambo Yesu Kilishitu bikale pe anweba.

4 Namusanchila Lesa kimye kyonse na mambo a anweba pa lusa lwanji lukatampe lo emubila mwi Kilishitu Yesu; 5 mambo mwi aye mo mo mwamwena bunonshi bwa bintu byonse, bwa kwamba ne bwa maana onse,+ 6 byonkatu kushimuna pe Kilishitu+ byo kwalumbululwa bulongo mwi anweba, 7 pa kuba’mba mwikale na bya bupe byonse, byo mubena kupembelela kusololwa kwa Nkambo Yesu Kilishitu.+ 8 Kabiji Lesa ukemukosesha kufika ne ku mpelo pa kuba’mba muntu nangwa umo akabule kwimuzhachisha mu juba ja Nkambo yetu Yesu Kilishitu.+ 9 Lesa wa kishinka,+ ye wimwichile kuba’mba mukwatankene na Mwananji Yesu Kilishitu, Nkambo yetu.

10 Anweba balongo bami, nemusashijila mu jizhina ja Nkambo yetu Yesu Kilishitu namba, saka mwamba na jiwi jimo kabiji mwi anweba kange mwikale mabano ne,+ bino mukwatankane na muchima umo ne na mulanguluko umo.+ 11 Mambo bamo ba mu nzubo ya kwa Kelowe bambuula pe anweba balongo bami amba, mwi anweba muji mabano. 12 Kyo mbena kwambapo ke kino kya kuba’mba, pa muntu pa muntu mubena kwamba’mba: “Amiwa ne wa kwa Paulo,” “Amiwa ne wa kwa Apolosa,”+ “Amiwa ne wa kwa Kefasa,”* kabiji amba “Amiwa ne wa kwa Kilishitu.” 13 Nanchi Kilishitu waabanwapo nyi? Nanchi Paulo bamwipayijile pa kichi na mambo a anweba nyi? Nangwa abya mwabatizhiwe mu jizhina ja kwa Paulo nyi? 14 Namusanchila Lesa kuba’mba kafwapo ye nabatizhe pe anweba ne, kanatu Kilishipusa+ ne Ngayusa,+ 15 pa kuba’mba muntu nangwa umo pe anweba abule kwamba’mba wabatizhiwe mu jizhina jami. 16 Ibyo, nabatizhe ne ba mu nzubo ya kwa Setefanusa.+ Bino pe anweba bashala kechi nayuka kana nabatizhepo bamo nangwa ne. 17 Mambo Kilishitu wantumine, kechi na kubatizha ne, bino na kusapwila mambo awama;+ kabiji kechi na maana a kwamba* ne, kuba’mba kichi* kya lumanamo kya Kilishitu kibule kwikala ke kyatu.

18 Kwamba pa kichi* kya lumanamo, ku boba babena konaika bekumona’mba kubula maana,+ bino kwi atweba bo babena kupulusha, bo bulume bwa Lesa.+ 19 Mambo kyanembwa’mba: “Nkalengela maana a bantu ba maana kupwa, kabiji kujimuka kwa bantu bajimuka nkekukana.”*+ 20 Nga wa maana uji pi? Nga munembeshi* uji pi? Nga wa mapata wa mu buno bwikalo* uji pi? Nanchi Lesa kechi waalula maana a ba pano pa ntanda kwikala bumbulwamaana nenyi? 21 Mambo nangwa kya kuba ba pano pa ntanda mu maana abo+ kechi bamuyukile Lesa ne,+ bino Lesa mu maana anji kyamutokejile ku muchima kupulusha boba baitabijile kupichila mu bumbulwamaana+ bwa kintu kyasapwijilwe.

22 Mambo Bayudea bakeba biyukilo+ ne Bangiliki bakebakeba maana; 23 bino atweba tusapwila Kilishitu ye baipayijile pa kichi, ku Bayudea kyo kya kwituntulako, bino ku bisaka bya bantu ke bumbulwamaana.+ 24 Nangwa byonkabyo, ku boba baitwa, Bayudea ne Bangiliki, mwi Kilishitu mo mumwekela bulume bwa Lesa ne maana a Lesa.+ 25 Mambo kintu kya Lesa bantu kyo bamona’mba kubula maana, kyo kya maana kukila bantu, kabiji kintu kya Lesa bantu kyo bamona’mba kechi kyakosa ne, kyo kyakosa kukila bantu.+

26 Mambo anweba balongo bami, mwamona’mba mwi anweba baichilwe, kechi muji bavula ba maana mwayila buntunshi*+ ne, kechi bavula babilobo ne, kabiji kechi bonse basemwa mu bisemi byashiñama* ne,+ 27 bino Lesa wasajile bintu byabula maana bya pano pa ntanda kuba’mba alengeshe bumvu bantu ba maana; kabiji Lesa wasajile bintu byabula kukosa bya pano pa ntanda kuba’mba alengeshe bumvu bintu byakosa;+ 28 kabiji Lesa wasajile bintu byabula kunema bya pano pa ntanda ne bintu byalengululwa, bintu byabulwapo, kuba’mba afumyepo bijipo,+ 29 pa kuba’mba muntu* nangwa umo abule kwitota ku meso a Lesa. 30 Bino Lesa ye walengela kuba’mba mwikale mwi Kilishitu Yesu, aye ye wasolwele maana ne bololoke bwa Lesa,+ kabiji kupichila mwi Yesu, bantu bakonsha kwikala bazhila+ kabiji na mambo a bukuzhi bakonsha kukasuluka,+ 31 pa kuba’mba kikale monka mo kyanembelwa’mba: “Awa witota, etotele mwi Yehoba.”*+