Ku Bena Ngalatiya
1 Amiwa mutumwa Paulo kechi natongwelwe na bantu nangwa kupichila mu muntu ne, bino Yesu Kilishitu+ ne Lesa Tata+ yenka wamusangwile mu bafu, bo bantongwele kwikala mutumwa, 2 ne balongo bonse bo nji nabo, twanembela bipwilo byonse bya mu Ngalatiya:
3 Lusa lukatampe ne mutende bifuma kwi Lesa Tata wetu ne kwi Nkambo Yesu Kilishitu bikale pe anweba. 4 Aye mwine wipaine kufumyapo bundengamambo bwetu+ kuba’mba etupokolole ku buno bwikalo* bubi+ bujipo monka mwayila kyaswa muchima wa Lesa wetu kabiji Tata,+ 5 kwi aye kwikale lukumo myaka ne myaka. Amena.
6 Nakumya bingi byo mubena kusatukila* bukiji awa wimwichile na lusa lukatampe lwamwesheshe Kilishitu ne kwitabilako mambo awama angi.+ 7 Bino kechi amba kuji mambo awama akwabo ne; pakuba kuji bamo babena kwimukatazha+ ne kukeba kutwala mungi mambo awama aamba pe Kilishitu. 8 Nangwa byonkabyo, umvwe umo mwi atweba nangwa malaika wa mwiulu wimusapwila mambo awama apusana na o twimusapwila, afingwe. 9 Monka mo twaambila kala, naamba ne jibiji namba, Yense ubena kwimusapwila mambo awama apusana na o mwaitabijile, afingwe.
10 Nanchi mbena kukeba kwitabisha bantu nyi, inyi Lesa? Nangwa nanchi mbena kukeba kutokesha bantu ku muchima nyi? Umvwe kya kuba nkibatokesha bantu ku muchima, ko kuba’mba kechi nakonsha kwikala kalume wa Kilishitu ne. 11 Balongo bami, mbena kukeba muyuke’mba mambo awama o nemusapwila, kechi afumine ku bantu ne;+ 12 mambo kechi neatambwile ku bantu ne, kabiji kechi beamfunjishe ne, bino Yesu Kilishitu ye wansolwejileo.
13 Anweba mwaumvwine byubilo byami bya kala bya mu bupopweshi bwa Bayudea,+ byo nakijishemo* kumanyika kipwilo kya Lesa ne kwikyonauna;+ 14 kabiji nayijilengako bingi palutwe mu bupopweshi bwa Bayudea kukila bakwetu bavula ba mu kisaka kyetu ba jifumbi jami, byo naubishetu mukoyo mu bisho bya bashakulu bami.+ 15 Bino Lesa yenka wandengejile’mba nsemwe ne kungita monka mu lusa lwanji lukatampe,+ kyamutokejile ku muchima 16 kusolola Mwananji kupichila mwi amiwa kuba’mba nsapwile ku bisaka bya bantu+ mambo awama aamba pe aye, bino kechi nashikishepo muntu* nangwa umo ne; 17 kabiji kechi nayile ku Yelusalema, ku boba bajinga batumwa saka nkyangye kwikala mutumwa ne, bino nayile ku Alabya, kepo nabwelele ku Damasakasa.+
18 Byo papichile myaka isatu nayile ku Yelusalema+ na kupempula Kefasa*+ kabiji naikajile nanji moba 15. 19 Bino batumwa bakwabo kechi nebamwene ne, namwenekotu Yakoba+ mulongo wa Nkambo. 20 Pa mambo a bintu byo mbena kwimunembela, nemwambila kine ku meso a Lesa, kechi mbena kubepa ne.
21 Kabiji nayile ne ku bibunji bya Silya ne Kilikya.+ 22 Bino kechi nayukanyikilwe ku bipwilo bya mu Yudea bya Kilishitu ne. 23 Baumvwangatu’mba: “Muntu witumanyikanga kala+ luno ubena kusapwila mambo awama a lwitabilo lo akebelenga konauna kala.”+ 24 Onkao mambo, batatwile kutumbijika Lesa na mambo a amiwa.