Ku Bena Loma
16 Mbena kwimubuula pe Fibe nyenga yetu, wa mwingilo mu kipwilo kiji mu Kenkelea,+ 2 kuba’mba mumutambwile mwi Nkambo monka mwafwainwa bazhijikwa ne kumukwasha mu byonse byo akakajilwa,+ mambo aye wakwashishenga balongo bavula kubikapotu ne amiwa.
3 Ñimwinaiko Pilisika ne Akwila,+ bakwetu ba mwingilo umo mwi Kilishitu Yesu, 4 babikile bumi bwabo mu kizumba na mambo a amiwa,*+ kabiji kechi yami yenka nasantatu ne, bino ne bipwilo byonse bya ba mu bisaka bya bantu. 5 Imunai ne kipwilo kipwila mu nzubo yabo.+ Imunai mutemwe wami Epanetusa, wajinga pa bantu batanshi baikele baana ba bwanga ba kwa Kilishitu mu Asha. 6 Imunai Maliya wimwingijila na ngovu. 7 Imunai Andelonikusa ne Yuniasa balongo bami+ kabiji bakaili bakwetu, banabalume bayukanyikwa bulongo ku batumwa kabiji baikala mwi Kilishitu pa myaka yavula kukila amiwa.
8 Ñimwinaiko Ampilyatusa, mutemwe wami mwi Nkambo. 9 Imunai Ulabanusa mukwetu wa mwingilo umo mwi Kilishitu, ne mutemwe wami Satakisa. 10 Imunai Apelesa waitabilwa mwi Kilishitu. Imunai ne ba mu nzubo ya kwa Alisatobulusa. 11 Imunai Helodyona mulongo wami. Imunai ne ba mu nzubo ya kwa Nakisusa baji mwi Nkambo. 12 Imunai Tilifena ne Tilifosa, banabakazhi bengila na ngovu mwi Nkambo. Imunai Pelesisi, mutemwe wetu mambo waingila na ngovu mwi Nkambo. 13 Imunai Lufusa wasalwa mwi Nkambo, bainanji bo bamama ne amiwa. 14 Imunai Asinikilitusa, Felegoni, Helimesa, Patilobasi, Helimasa ne balongo bo baji nabo. 15 Imunai Filologusa, Yulya, Neleusa ne nyenga yanji, Olimpasa ne bazhijikwa bonse bo baji nabo. 16 Iimunai mu lwenu na kwifyompa kwazhila. Bipwilo byonse bya kwa Kilishitu bimwimuna.
17 Balongo bami mbena kwimukambizha namba, mujimuke na boba batemwa kuleta mabano ne bya kwituntulako byapusana na lufunjisho lo mwafunjile, kabiji mwibachinuzhukenga.+ 18 Mambo bantu ba uno mutundu kechi bazha ba Nkambo yetu Kilishitu ne, bino ke bazha ba bisakasaka mibiji* yabo, kabiji na byambo byumvwanyika bulongo ne na byambo byabo bya mulambisha, bongola michima ya boba babula kujimuka. 19 Lukookelo lwenu lwaya bingi nkuwa ku bantu bonse, onkao mambo, nsekela bingi na mambo a anweba. Bino nakeba namba mwikale na maana pa kuba’mba muyuke kyawama, bino mwikale babula kuyuka bintu byatama.+ 20 Mambo katatakatu, Lesa upana mutende akachakakanye Satana+ munshi ya maulu enu. Lusa lukatampe lwa Nkambo yetu Yesu lwikale pe anweba.
21 Timoti mukwetu wa mwingilo wimwimuna, kabiji Lukiusa, Yasona ne Sosipata balongo bami nabo bemwimuna.+
22 Amiwa Teletiusa nanemba ino nkalata, nemwimuna mwi Nkambo.
23 Ngayusa+ wantambwila ku nzubo yanji kabiji kusambakena kipwilo kyonse, wimwimuna. Elasatusa kalama wa kipao kya muzhi, ne mulongo wanji aye Kwalitusa bemwimuna. 24 *——
25 Kwi aye wakonsha kwimukosesha monka mwayila mambo awama o nsapwila ne byambo byaamba pe Yesu Kilishitu, mwayila kusololwa kwa akya kyafyamika kyazhila+ kyo bafile pa myaka yavula, 26 bino kyo basolola kabiji kyayukanyikwa kupichila mu Binembelo bya bungauzhi ku bisaka byonse bya bantu, monka mwayila mukambizho wa Lesa wa myaka ne myaka kuba’mba bisaka byonse bya bantu bimukookele na mambo a lwitabilo; 27 kwi Lesa, yenkatu uji na maana,+ kwikale lukumo monka mwi Yesu Kilishitu myaka ne myaka. Amena.