Nkalata Itanshi kwi Timoti
5 Kange unene mukulumpe ne.+ Bino saka umusashijila nobe bashobe, ne bansongwalume nobe bankasobe nangwa bakolojobe, 2 banabakazhi bakulumpe nobe bainobe, bansongwakazhi nobe banyenga yobe na muchima watoka too.
3 Saka ulangulukilako* banabakazhi bafwilwa bakajilwa kya kine.*+ 4 Bino umvwe mwanamukazhi wafwilwa uji na baana nangwa bankana, bafunde patanshi kulama ba mu nzubo yabo+ mwayila munema wa kunemeka Lesa ne kwibabwezhezha bansemi babo ne bankambo yabo bibafwainwa,+ mambo kino kyo kyaitabilwa kwi Lesa.+ 5 Aba banabakazhi bafwilwa bakajilwa kya kine kabiji bashalatu bunke, baketekela mwi Lesa+ kabiji kimye kyonse mute ne bufuku balomba milombelo ya misashijilo ne milombelotu ikwabo.+ 6 Bino mwanamukazhi wipana mwine ku bya kusakasaka bibindankanya mubiji wafwa kala nangwa kya kuba ukipema. 7 Onkao mambo, saka wibabula ino mikambizho, pa kuba’mba babule kaneneno. 8 Kine umvwe muntu kechi wibakebela bintu aba bo alama kikatakata ba mu nzubo yanji mwine ne, wilukana lwitabilo kabiji watama kukila yewa wabula kwitabila.+
9 Mwanamukazhi wafwilwa wakonsha kunembwa jizhina umvwe wakila myaka 60, kabiji umvwe wajingatu na mulume umo, 10 utelwa bulongo na mambo a mingilo yawama,+ umvwe wakomeshe baana banji,+ umvwe watambwilanga benyi,+ umvwe waovwele maulu a bazhijikwa,+ umvwe wakwashishe boba bapita mu bya malwa,+ kabiji umvwe waingijilenga na mukoyo mingilo yonse yawama.
11 Pano bino, banabakazhi bafwilwa bakiji banyike kange wibanembe mazhina ne, mambo umvwe kusakasaka kwabo kubindankanya mubiji kwaikala pakachi kabo ne Kilishitu, basalapo kusongolwa. 12 Kabiji bakazhatwa mambo bakana byambo* byabo bitanshi bya lwitabilo. 13 Kabiji pa kimye kimotu bafunda muteeto wa kwikala bankope, ne kupitañana ku mazubo; kechi bankopetu ne, bino bo bakalokwete kabiji batemwa kwibika mu mambo a bakwabo,+ ne kwamba bintu byo bafwainwa kubula kwamba. 14 Onkao mambo, nakeba namba, banabakazhi bafwilwa bakiji banyike basongolwe,+ baseme baana,+ balame bulongo mazubo abo ne kubula kumushila kanya mulwanyi ka kunenenwapo bibi. 15 Banabakazhi bamo bafwilwa bebasendula kala kuba’mba balondele Satana. 16 Umvwe mwanamukazhi waitabila uji na balongo ba ku mubiji banabakazhi bafwilwa, ebakwashenga pa kuba’mba kipwilo kibule kunemenwa. Kepo kipwilo kikakwasha banabakazhi bafwilwa bakajilwa kya kine.*+
17 Bakulumpe mu kipwilo batangijila bulongo+ mwafwainwa kwibapa mushingi mukatampe,+ kikatakata aba bengila na ngovu mu kwamba ne mu kufunjisha.+ 18 Mambo kinembelo kyaamba’mba, “Kechi mukakase ñombe ku kanwa kimye kyo abena kupuula kajo ne,”+ kabiji amba, “Wa mwingilo wafwainwa mfweto yanji.”+ 19 Kange uswe bintu byo babena kushinawina mukulumpe ne, poso waumvwa ku bakamonyi babiji nangwa basatu.+ 20 Bantu balengalenga mambo+ wibakajipile+ pa bantu bonse kuba’mba bakwabo nabo bafunjileko.* 21 Nakukambizha ku meso a Lesa ne kwi Kilishitu Yesu ne ku bamalaika basalwa namba, ulame ino mikambizho kwa kubula kuchibila jimo mambo nangwa kuba misalululo.+
22 Kange upelawizhe kutenteka maboko pa muntu nangwa umo ne;*+ kabiji kange wibikenga mu mambo a bantu bakwabo ne; saka wilama obe mwine bulongo.
23 Kange utome mema jibiji ne,* bino saka utomapo tubinyu tucheche na mambo a munda mobe ne kukolwakolwa kobe.
24 Mambo a bantu bamo ayukanyikwa patoka kabiji bebachibilao ponkapotu, bino a bakwabo eya kuyukanyikwa kulutwe.+ 25 Ne mingilo yawama nayo iyukanyikwa patoka+ kabiji aya yawama ibula kuyukanyikwa kechi ifyama kikupu ne.+