Ku Bena Loma
9 Mbena kwamba kine mwi Kilishitu; kechi mbena kubepa ne, mambo jiwi jami ja mu muchima jibena kungitabizha mu mupashi wazhila, 2 amba nji na bulanda bukatampe ne musongo ubula kupwa mu muchima wami. 3 Mambo amiwa nenengezha kumfumya kwi Kilishitu nobe muntu wafingwa pa kuba’mba nkwashe balongo bami ba ku mubiji, 4 bena Isalela. Lesa wibatongwele kwikala baana+ ne kwibapa lukumo ne lulayañano+ kabiji wibapele Mizhilo+ ne mwingilo wazhila+ ne milaye.+ 5 Ne bashakulu bo babo+ kabiji mwi abo mo mo asemekejilwe Kilishitu ku mubiji.+ Atotwe Lesa myaka yonse aye uji na luusa pa byonse. Amena.
6 Nangwa byonkabyo, kechi kiji bino uba nobe mambo a Lesa akankalwa ne. Mambo bonse bafumine mwi Isalela kechi bo bene “bena Isalela” ne.+ 7 Kabiji bonse kechi bo baana na mambo a kuba’mba baana* ba kwa Abalahama ne;+ mambo, “Awa ukatelwa’mba mwanobe* ukafuma mwi Izaka.”+ 8 Ko kuba’mba, baana basemwa ku mubiji kechi bo baana ba kine ba Lesa ne,+ bino baana basemwa monka mwayila mulaye+ bo batelwa’mba baana.* 9 Mambo byambo bya mulaye byajinga bino amba: “Pa kyonka kino kimye nkeya kabiji Sala ukasema mwana wa mulume.”+ 10 Kino kechi kyamwekeletu kwi aye yenka ne, bino ne kwi Libeka kimye kyo aimichile mapasa ku mwanamulume umo aye Izaka mushakulu wetu;+ 11 mambo abo saka bakyangye kusemwa ne kubapo kintu kyawama nangwa kyatama ne, kuba’mba kyaswa muchima wa Lesa pa mambo a kusala kibule kwimena pa mingilo, kana pa yewa usala, 12 bamwambijile Libeka amba: “Kolo ukekala ke muzha wa nkasanji.”+ 13 Byonka byo kyanembwa’mba: “Natemenweko Yakoba, bino Isao namushikilwe.”+
14 Pano tusakwamba’mba ka? Nanchi Lesa uba nshiji nyi? Ine!+ 15 Mambo aye wabuujile Mosesa amba: “Nkobila lusa yense ye nkeba kubila lusa, kabiji nkobila kifyele yense ye nkeba kubila kifyele.”+ 16 Onkao mambo, Lesa pa kusala muntu kechi utala pa kintu muntu kyo akeba nangwa kyo oba ne, bino kyaimena pe Lesa uji na lusa.+ 17 Mambo mu kinembelo Lesa waambijile Felo amba: “Na mambo a kino nakikuleka: kuba’mba kupichila mwi obewa mmweshe bulume bwami ne kulengela jizhina jami kuyukanyikwa pano pa ntanda ponse.”+ 18 Byonkabyo, Lesa ubila lusa yense ye akeba kubila lusa, bino uswisha yense ye akeba kukosesha muchima wanji.+
19 Pano anweba musakunshikisha’mba: “Mambo ka Lesa o akizhachishisha bantu? Ñanyi wakonsha kukanya kyasaka muchima wanji?” 20 Obewa muntu, yobe ñanyi ulengulula Lesa?+ Nanchi kintu kyo babumba kyakonsha kwambila wikibumba’mba: “Mambo ka o wambumbijile bibye” nyi?+ 21 Nanchi mbumbi kechi uji na luusa pa buchimba lwa kulengako ku buchimba+ buntutu bumo kipe kya kwingijilamo bya buneme, ne kikwabo kya kwingijilamo byabula kunema nenyi? 22 Nangwa kya kuba Lesa wakebelenga kumwesha bukaji bwanji pa bantu batama ne kumwesha bulume bwanji, wibalekele saka ebatekenya bantu bajinga nobe bipe byo akebelenga kuletela bukaji bwanji kabiji byafwainwe lonaiko. 23 Kabiji ibyepi umvwe waubile kino kuba’mba abulañane bya bunonshi bwa lukumo lwanji pa bipe byo akebelenga kubila lusa,+ byo anengezhejile jimo amba bya lukumo, 24 ko kuba’mba atweba, bo aichile kechi kufumatu mu Bayudea ne, bino ne mu bisaka bya bantu?+ 25 Kijitu pamo byonka byo aambile mwi Hosea amba: “Aba babula kwikala bantu bami,+ nkebatela’mba ‘bantu bami,’ kabiji mwanamukazhi ye nabujile kutemwa, nkamutela’mba ‘ye natemwa’;+ 26 kabiji ku mpunzha ko bebambijile’mba, ‘Anweba kechi mwi bantu bami ne,’ konkakwa ko ko bakebatela’mba, ‘baana ba Lesa mumi.’”+
27 Kabiji Isaya waambile pa bena Isalela amba: “Nangwa kya kuba bena Isalela bakavule nobe busenga bwa ku kalunga ka mema, bashalapo bo bonka bakapuluka.+ 28 Mambo Yehoba* ukabala aba bekala pano pa ntanda kabiji ukapelawizha kupwisha kubala.”+ 29 Kabiji byonka Isaya byo aambijile jimo amba: “Umvwe Yehoba* wa mabumba wabujile kwitushilapo baana,* inge twaikeletu nobe Sodoma, kabiji inge twaalukiletu nobe Gomola.”+
30 Pano tusakwamba’mba ka? Bantu ba mu bisaka bya bantu nangwa kya kuba kechi bakeba kwikala bololoke ne,+ baikele baoloka na mambo a lwitabilo;+ 31 bino nangwa kya kuba bena Isalela bakebelenga mizhilo ya bololoke, kechi baikele baoloka na mambo a yoya mizhilo ne. 32 Mambo ka? Mambo kechi bakebelenga kwikala baoloka na mambo a lwitabilo ne, bino na mingilo. Betuntwile ku “jibwe ja kwituntulako”;+ 33 byonka byo kyanembwa amba: “Talai, amiwa mbena kwala jibwe mu Ziona+ ja kwituntulako kabiji jibwe ja kwibaponesheshako, bino awa waitabila mu jino jibwe kechi bakamulengesha bumvu ne.”+