Yoba
4 Ñanyi wakonsha kusema muntu wabula wa muzhilo mu muntu wa muzhilo?+
Kafwako nangwa umo ne!
5 Moba anji atongwelwa jimo,
Ne kuvula kwa bañondo banji kuji kwi anweba;
Mwamutongwela pa kupelela pa kuba’mba abule kukilapo.+
6 Lekai kumutala pa kuba’mba akokoloke,
Kufikatu ne byo akapwisha moba anji, byonkatu byuba wa mwingilo.+
7 Mambo nangwatu kichi kikala na luketekelo.
Umvwe bekitema, kisapuka jikwabo,
Kabiji tumisampi twakyo tutwajijila kukoma.
8 Umvwe mizhazhi yakyo yakota mu mushiji
Ne kishiki kyaumina mu mushiji,
9 Pa kumvwa kinyanzhinyanzhi kya mema, kikasapuka;
Kabiji kikekala na misampi nobe kichi kya katataka.
10 Bino muntu ufwa ne kulaalatu sulubya;
Umvwe muntu wafwa, wikala pi?+
11 Mema apwamo mu kalunga ka mema,
Ne mukola uma.
12 Ne muntu naye ufwa kabiji kechi ubuuka ne.+
Kufikatu ne jiulu byo jikabula kwikalako, kechi bakabuuka ne,
Kabiji kafwako ukebabuusha mu tulo twabo ne.+
13 Nanchi inge mwamfya mu Kilende,*+
Ne kumfya kufikatu ne bukaji bwenu byo bukapita,
Ne kuntongwela kimye kyo mukamvulukilamo!+
14 Umvwe muntu wafwa, nanchi wakonsha kwikala na bumi jibiji nyi?+
Nkapembelelanga moba onse a mwingilo wami
Kufikatu ne byo nkakasuluka.+
15 Anweba mukangita, ne amiwa nketaba.+
Mwingilo wa maboko enu mukamukebeshanga* bingi.
16 Bino luno, mubena kubala kwenda kwami konse;
Mutalatu pa bubi bwami.
17 Mizhilulwila yami mwiishinkila mu fukuta,
Kabiji bubi bwami mwibulamika na gulu.
18 Byonkatu mutumba byo apumuka ne kusalañana
Ne jibwe byo jitentuka pantu pajo,
19 Byonkatu mema byo anyongesha mabwe
Ne mukwe byo akwemuna maloba,
Byo byo mwaonauna luketekelo lwa muntu ufwa.
20 Mumukepesha bulume kufikatu ne byo onaika;+
Mwalula mwekelo yanji, ne kumufumyapo.
21 Baana banji byo banemekwa, aye kechi uyuka ne;
Byo bapelulwa, aye kechi uyuka ne.+
22 Umvwatu kukola byo akiji na mubiji;
Aye* ujilatu byo akiji mumi.”