Yelemiya

29 Bino byo byambo byajinga mu nkalata yatumine ngauzhi Yelemiya kufuma ku Yelusalema kutumina bakulumpe bajinga pa bantu bo batwajile mu buzha, bañanga, bangauzhi ne bantu bonse, bo batwajile mu buzha kwi Nebukaneza kufuma mu Yelusalema kwibatwala mu Babilona. 2 Pa kikye kimye Mfumu Yekoniya,+ inamfumu,+ babitumbafumu, babinemanga ba mu Yuda ne ba mu Yelusalema ne basendwe ba bichi ne basendwe* ba byela saka bebafumya kala mu Yelusalema.+ 3 Wapele nkalata Elasa mwana wa kwa Shafwana+ ne Gemaliya mwana wa kwa Hilikiya, Zedekiya Mfumu+ wa Yuda bo atumine ku Babilona kwi Nebukaneza Mfumu wa Babilona. Ino nkalata yaambile’mba:

4 “Yehoba wa mabumba, Lesa wa Isalela waambila bazha bonse bo atwajile mu buzha kufuma ku Yelusalema kwibatwala ku Babilona amba, 5 ‘Shimikai mazubo ne kwikalamo. Jimai majimi ne kuja bipangwa bikafumangamo. 6 Songolai banabakazhi ne kusema baana ba balume ne baana ba bakazhi; kebelai baana benu ba balume banabakazhi ne kusongwesha baana benu ba bakazhi pa kuba’mba nabo bakekale na baana ba balume ne baana ba bakazhi. Mukavulemo, kange mukakepe ne. 7 Kabiji lengelai mutende kwikala mu muzhi mo nemutwala buzha ne kumulombelako kwi Yehoba, mambo inge mu muzhi mwaikala mutende ne anweba mukekala mu mutende.+ 8 Mambo Yehoba wa mabumba, Lesa wa Isalela waamba’mba: “Kange muleke bangauzhi benu bo muji nabo ne bañanga benu ba lubuko bemutwale mungi ne,+ kabiji kange muteleke ku biloto byo babena kulota ne. 9 Mambo Yehoba waamba’mba, ‘Abo babena kwimwawila bintu bya bubela mu jizhina jami. Kechi nebatuma ne.”’”+

10 “Mambo Yehoba waamba’mba, ‘Myaka 70 ya kwikala mu Babilona byo ikapwa, amiwa nkemubila bibusa+ kabiji nkafikizha mulaye wami ye nalayile ne kwimubwezha mu ino mpunzha.’+

11 “‘Mambo amiwa nayuka bintu byo mbena kulanguluka kwimubila, mbena kulanguluka kwimuletela mutende kechi bya malwa ne,+ kwimulengela kwikala na luketekelo ne bwikalo bwawama bwa kulutwe,’ byo byaamba Yehoba.+ 12 ‘Anweba mukangita ne kwiya kwi amiwa ne kulomba kwi amiwa, kabiji amiwa nkemumvwa.’+

13 “‘Anweba mukankeba ne kuntaana,+ mambo mukankeba na muchima wenu yense.+ 14 Kabiji nkemulengela kuntaana,’+ byo byaamba Yehoba. ‘Kabiji nkakonkanya pamo bazha benu ne kwimukonkanya pamo anweba bonse kwimufumya mu bisaka byonse bya bantu ne mu mapunzha onse mo nemupalañenyejile.+ Kabiji nkemubwezha ku mpunzha ko nemufumishe pa kwimutwala mu buzha,’+ byo byaamba Yehoba.

15 “Pakuba anweba mwaamba’mba, ‘Yehoba witwimenya bangauzhi mu Babilona.’

16 “Mambo Yehoba waambila mfumu waikala pa jitanda ja Davida+ ne bantu bonse bekala mu uno muzhi, balongo benu babula kuya ne anweba mu buzha amba, 17 ‘Yehoba wa mabumba waamba’mba: “Amiwa mbena kwibatumina mpoko, kipowe kya nzala ne mwalo* mukatampe,+ kabiji nkebalengela kwikala nobe makuyu abola* kya kuba bantu kechi bakonsha ne kwiaja ne.”’+

18 “‘Kabiji nkebalukuka na mpoko,+ na kipowe kya nzala ne na mwalo, nkebalula kwikala kintu kikalengela bufumu bonse bwa pano pa ntanda kumvwa moyo,+ kintu kyo bafinga, kikalengela bantu kukumya, kikalengela bantu kwita milozhi pa kwikimona,+ kabiji bakebambilanga mwenga ku bisaka bya bantu ko nkebapalañenya,+ 19 mambo kechi baumvwijile byambo byami byo nebatumijilenga kimye kyonse* na bakalume bami bangauzhi ne,’+ byo byaamba Yehoba.

“Yehoba waamba’mba, ‘Pakuba anweba kechi mwaumvwijile ne.’+

20 “Onkao mambo, umvwai byaamba Yehoba anweba bantu bonse muji mu buzha bo nafumishe mu Yelusalema ne kwimutwala mu Babilona. 21 Yehoba wa mabumba, Lesa wa Isalela waamba pe Ahaba mwana wa kwa Kolaya ne Zedekiya mwana wa kwa Maaseya babena kwimwawila bintu bya bubela mu jizhina jami amba,+ ‘Amiwa mbena kwibapana mu kuboko kwa kwa Nebukaneza Mfumu wa Babilona kabiji aye ukebepaya saka mutalako. 22 Kabiji bintu bikebamwekela bikekala mafingo akambanga bena Yuda bonse bazha baji mu Babilona amba: “Yehoba emulengele kwikala nobe Zedekiya kabiji nobe Ahaba bo basokele mu mujilo ku mfumu wa Babilona!” 23 mambo bauba bintu bya bumvu mu Isalela,+ bauba bukende na bakazhi ba boba bo bekala nabo kipi kipi ne kwamba byambo bya bubela mu jizhina jami byo nabujile kwibakambizha kwamba.+

“‘“Amiwa yami nayuka kabiji yami kamonyi,”+ byo byaamba Yehoba.’”

24 “Kabiji ukambile Shemaya+ mwina Nehelama amba, 25 ‘Yehoba wa mabumba, Lesa wa Isalela waamba’mba: “Na mambo a kuba watumijile bantu bonse ba mu Yelusalema makalata mu jizhina jobe ne ku bantu bonse ne kwi Zefwaniya+ mwana wa kwa Maaseya ñanga ne ku bañanga bonse ne kwamba’mba, 26 ‘Yehoba wakutongola obewa Zefwaniya kwikala ñanga kupingakena pe Yehoyada ñanga kuba’mba obewa wikale kalama wa nzubo ya Yehoba ne kutala pa muntu yense wakonya uba bintu nobe ngauzhi kabiji wafwainwa kumukula mu bikulu.*+ 27 Mambo ka o wabujila kukanya Yelemiya mwina Anatota+ byo abena kwaula nobe ngauzhi kwi obewa?+ 28 Mambo aye witutumijile ne nkalata mu Babilona ne kwamba’mba: “Mukabandamo bingi! Shimikai mazubo ne kwikalamo. Jimai majimi ne kuja bipangwa bikafumangamo,”’”’”+

29 Zefwaniya+ ñanga byo atangile ino nkalata kwi ngauzhi Yelemiya, 30 Yehoba waambijile Yelemiya amba: 31 “Tumina bantu bonse baji mu buzha ne kwibabuula’mba, ‘Yehoba waamba pe Shemaya mwina Nehelama amba: “Na mambo a kuba Shemaya waawilenga kwi anweba saka nabujile kumutuma, ne kwimulengela kuketekela bintu bya bubela,+ 32 onkao mambo, Yehoba waamba’mba, ‘Amiwa namuzhingijila Shemaya mwina Nehelama ne ba mu kisemi kyanji. Kafwako muntu nangwa umo wa mu kisemi kyanji ukapuluka mu bano bantu nangwa kumona byawama byo nkobila bantu bami ne, mambo aye walengejile bantu kusatukila Yehoba,’ byo byaamba Yehoba.”’”