Ku Bena Loma
4 Byo kiji bino, pano nanchi tusakwamba’mba mushakulu wetu aye Abalahama wamwenejilemo ka ku mubiji? 2 Umvwe Abalahama watelelwe’mba waoloka na mambo a mingilo, inge witotelenga, bino kechi kwi Lesa ne. 3 Nanchi kinembelo kyaamba’mba ka? “Abalahama waitabijile mwi Yehoba* kabiji bamutelele’mba waoloka.”+ 4 Pakuba muntu wingila, mfweto yanji kechi beimona’mba ya lusa lukatampe ne, bino beimona’mba mfweto ya mwingilo ye aingila. 5 Kabiji muntu ubula kwingila bino waitabila mu yewa wambila bantu babula kwakamwa Lesa amba baoloka, lwitabilo lwanji lo lumulengela kumonwa’mba waoloka.+ 6 Byonka byaambile Davida pa lusekelo lwikala na muntu ye atela Lesa amba waoloka kwa kubula mingilo amba: 7 “Bo ba lusekelo aba bo balekelako mizhilulwila kabiji bo bavwetela* pa mambo abo; 8 ye wa lusekelo awa muntu ye bakabula kutotolwesha kwi Yehoba* pa mambo anji o alenga.”+
9 Nanchi luno lusekelo lwiyatu pa bantu baya ku mukanda bonka nyi, inyi ne pa babula kuya ku mukanda?+ Mambo twaamba’mba: “Abalahama bamutelele’mba waoloka na mambo a lwitabilo lwanji.”+ 10 Pano mu ñanyi bwikalo mo bamutelejile’mba waoloka? Saka aya kala ku mukanda nyi, inyi saka akyangye kuya ku mukanda? Kechi mu mukanda ne, bino saka akyangye kuya ku mukanda. 11 Kabiji bamupele kiyukilo+—ko kuba’mba mukanda—katetesho* ka bololoke na mambo a lwitabilo lo ajinga nalo saka akyangye kuya ku mukanda, pa kuba’mba ekale shabo bonse baji na lwitabilo+ babula kuya ku mukanda, pa kuba’mba batelwe’mba baoloka; 12 ne kuba’mba ekale shabo baana ba mukanda kechi bonkatu balama mukanda ne, bino ne boba balondela mu ngayo ya alwa lwitabilo lwajingapo na shetu Abalahama+ saka akyangye kuya ku mukanda.
13 Mambo kechi kupichila mu mizhilo Abalahama nangwa mwananji* mo bamulayijile mulaye amba ukekala nswanyi pano pa ntanda ne,+ bino ke kupichila mu bololoke na mambo a lwitabilo.+ 14 Mambo umvwe aba balama mizhilo bo banswanyi, ko kuba’mba lwitabilo ke lwatu ne mulaye naye waaluka ke watu. 15 Kwambatu kine, Mizhilo ileta bukaji bwa Lesa,+ bino pabula mizhilo kechi pekala mizhilulwila ne.+
16 Watambwile mulaye na mambo a lwitabilo lwanji kabiji kino kyamwesheshe lusa lukatampe,+ pa kuba’mba baana* banji bonse bakatambule uno mulaye,+ kechi bonka balama Mizhilo ne, bino ne boba balondela lwitabilo lwa kwa Abalahama, shetu atweba bonse.+ 17 (Byonka byo kyanembwa’mba: “Amiwa nakutongola kwikala shabo bisaka bya bantu byavula.”)+ Kino kyaubiwe kwi Lesa yenka ye aitabijile, yenka usangula bafu ne kutela bintu byabulako uba nobe ko biji. 18 Nangwa kya kuba kechi pajingapo bishinka bya kuketekela’mba kino kikamweka ne, wajinga na luketekelo ne lwitabilo lwa kuba’mba ukekala shabo bisaka bya bantu byavula monka mwayijile kyo baambile’mba: “Bino byo bikekala ne mwanobe.”*+ 19 Nangwa kya kuba kechi wakookele mu lwitabilo ne, wamwenenga mubiji wanji nobe wafwa kala (mambo wafikizhe myaka nobe 100),+ ne munda mwa kwa Sala mwajinga nobe mwafwa.*+ 20 Bino na mambo a mulaye wa Lesa, kechi wakookele mu lwitabilo ne; bino wakosele mu lwitabilo saka apa Lesa lukumo 21 ne kushiinwa’mba akya Lesa kyo alayile ukekyuba.+ 22 Onkao mambo, “bamutelele’mba waoloka.”+
23 Nangwa byonkabyo, byambo bya kuba’mba, “bamutelele’mba,” kechi bebinembejiletu aye yenka ne,+ 24 bino ne na mambo a atweba bo bakatela’mba twaoloka, na mambo a kuba twaitabila mu yewa wasangwile Yesu Nkambo yetu mu bafu.+ 25 Bamupaine na mambo a mizhilulwila yetu+ kabiji bamusangwile kuba’mba betutele’mba twaoloka.+