Nkalata Itanshi ku Bena Kolinda

13 Umvwe ñamba mu njimi ya bantu ne ya bamalaika bino saka nabula butemwe, naaluka nobe ngengele nangwa nobe lusonsolo uvumatu kivumevume. 2 Kabiji umvwe nji na kya bupe kya kwaula ne kuyukisha byonse byafyamika byazhila ne kuyuka bintu byavula,+ kabiji umvwe nji na lwitabilo lonse lwa kutuntulula* mitumba, bino saka nabula butemwe, naaluka ke watu.*+ 3 Kabiji umvwe napana bintu byami byonse mu kukwasha bakwetu+ nangwa kupana mubiji wami kuba’mba netotelemo, bino saka nabula butemwe,+ kafwako kyo namwenamo ne.

4 Butemwe+ butekanya*+ ne kuba lusa.+ Butemwe kechi buba kichima ne.+ Kechi bwitota ne, kechi bwilundumika ne,+ 5 kechi buba bya bumvu ne,+ kechi bukeba bintu bibuwamina abo bwine ne,+ kechi buzhingila ne.+ Kechi buvuluka kintu kyatama ne.+ 6 Kechi busekela pa bintu byabula koloka ne,+ bino busekela na bya bukine. 7 Buvweta pa bintu byonse,+ bwitabila bintu byonse,+ buketekela bintu byonse,+ buchinchika bintu byonse.+

8 Butemwe kechi bupwa ne. Bino umvwe kuji bya bupe bya kwaula, bikapwa; umvwe kuji kwamba mu njimi,* kukapwa; kabiji umvwe kuji kuyuka bintu, nako kukapwa. 9 Mambo kuyuka kwetu kwa lubajitu lumo,+ ne kwaula kwetu nako kwa lubajitu lumo, 10 bino akya kya mbaji yonse byo kikafika, akya kya lubajitu lumo kikapwa. 11 Byo nakijinga mwanyike, naambanga bya bwanyike, nalangulukanga nobe mwanyike, namonanga bintu nobe mwanyike; pano luno byo nakoma, naleka byubilo bya bwanyike. 12 Pa kino kimye tubena kutala mu katajilo, bino kechi tubena kwibimona bintu bulongo ne, pakuba mu kyokya kimye tukatalañana nabyo kilungi na kilungi. Pa kino kimye, nayukakotu lubaji lumo, pano bino nkayukisha bulongo, byonkatu byo bangyuka bulongo. 13 Nangwa byonkabyo, bino bintu bisatu bikatwajijila: lwitabilo, luketekelo ne butemwe; bino kyakila pa bino byonse ke butemwe.+