Bubiji ya kwa Yoano
1 Amiwa mukulumpe,* mbena kunembela inetu wasalwa ne baana banji bo natemwa bingi, bino kechi yami yenkatu nebatemwa ne, bino ne boba bayuka bukine, 2 twimutemwa na mambo a bukine bo tuji nabo kabiji bo tukekala nabo myaka ne myaka. 3 Lusa lukatampe ne kifyele ne mutende bifuma kwi Lesa Tata ne kwi Yesu Kilishitu Mwana Tata, tukekala nabyo monka mu bukine ne mu butemwe.
4 Nasekela bingi mambo nayuka kuba’mba baana bobe bamo babena kwenda mu bukine,+ byonkatu Tata byo etukambizhe. 5 Onkao mambo, nakusashijila obewa inetu namba, twitemwe atwe bene na bene. (Kechi mbena kukunembela mukambizho mupya ne, kana yenkawa ye twajinga nanji kala.)+ 6 Butemwe bulumbulula bino, amba twendenga monka mwayila mikambizho yanji.+ Uno ye mukambizho wa kuba’mba, mwafwainwa kwitemwanga, byonkatu byo mwaumvwine ku ntendekelo. 7 Mambo bajimbijimbi bavula bapalañena pano pa ntanda,+ bo bantu bakana’mba Yesu Kilishitu kechi waishile kwikala muntu ne.+ Muntu uba bino ye mujimbijimbi kabiji ye ulengulula Kilishitu.+
8 Jimukai kuchina’mba mwakonauna abya bintu byo twaingijile, pa kuba’mba mukatambule mfweto yonse.+ 9 Yense ubula kulondela lufunjisho lwa Kilishitu kabiji ubula kwikala monka, kechi uji na Lesa ne.+ Awa wikala mu luno lufunjisho ye uji na Tata ne Mwana.+ 10 Umvwe muntu waiya kwi anweba na lufunjisho lwapusana na luno, kange mumutambwile mu nzubo+ yenu nangwa kumwimunatu ne. 11 Mambo awa wamwimuna, wakwatankana nanji mu mingilo yanji yatama.
12 Nangwa kya kuba nji na bintu byavula bya kwimunembela, kechi nakeba kwibinemba pa pepala ne na inki ne, bino naketekela kwiya ko muji ne kwisamba nenu saka twitala kuba’mba mukasekele bingi.
13 Baana ba nyenga yobe wasalwa, bakwimuna.