Ezikyo
8 Kabiji mu mwaka wa butanu na umo, mu ñondo wa butanu na umo pa juba ja butanu ja uno ñondo, naikele mu nzubo yami ne bakulumpe ba bena Yuda nabo baikele kulutwe yami, kabiji konkakwa bulume bwa Nkambo Mfumu Yehoba bwaishile pe amiwa. 2 Byo natajilenga, namwene kintu kyajinga nobe mujilo; kufuma mu musana wanji kuya kunshi kwamwekelenga nobe mujilo.+ Kabiji kufuma mu musana wanji kuya kwiulu, kwajinga kyeya kyabembejilenga nobe kyela kya ngolode ne siliva.+ 3 Kabiji watanyikile kintu kyamwekelenga nobe kuboko kwanji ne kunshikwila ku nsuki, kabiji mupashi wanshikwile ne kuntwala pakachi ka ntanda ne jiulu. Kufuma popo, wandetele ku Yelusalema mu bimwesho bya Lesa, ku kibelo kya kipango kya mukachi+ kyatala ku kabeta ka ku buyeke, kwajinga kipashañano kyafichishanga Lesa ku muchima.+ 4 Kabiji konkakwa kwajinga lukumo lwa Lesa wa Isalela lwamwekelenga+ nobe kimwesho kyo namwene mu musanza.+
5 Kabiji wañambijile’mba: “Obewa mwana muntu, tala ku kabeta ka ku buyeke.” Ne amiwa natajile ku kabeta ka ku buyeke, kabiji konkakwa namweneko kipashañano kyafichishanga Lesa ku muchima kyajinga ku kibelo kya ku kabeta ka ku buyeke bwa kya kusokelapo bitapisho. 6 Kabiji wañambijile’mba: “Obewa mwana muntu, nanchi kechi wamona bintu byatama bya bunya bibena kuba bena Isalela kuno+ kabiji bimpangila kwalepa na nzubo yami yazhila nenyi?+ Pakuba obewa usakamona bintu bya bunya byakilamo kutama.”
7 Ponkapo wantwajile ku kibelo kya kipango, ne byo natajilenga namwene pa lubumbulu pabozoka. 8 Kabiji wañambijile’mba: “Obewa mwana muntu, saba pa lubumbulu.” Ne amiwa nasabilepo kabiji namwene kibelo. 9 Wañambijile’mba: “Twela mukachi umone bintu byatama bya bunya byo babena kuba.” 10 Ne amiwa natwelele mukachi kabiji namwenemo bipashañano bya bintu byapusana pusana bikalaba panshi ne banyama ba bunya+ ne bankishi bonse ba bunya* ba bena Isalela;+ bebilengejile pa lubumbulu yense. 11 Kabiji bakulumpe 70 ba bena Isalela baimene kulutwe yabyo pamo ne Yazaniya mwana wa kwa Shafwanyi.+ Bonse pa muntu pa muntu bajinga na bya kufutumwinamo mu maboko abo ne bintu binunka bulongo byafutumukilenga bwishi.+ 12 Wañambijile’mba: “Obewa mwana muntu, nanchi kechi wamona bintu bibena kuba bakulumpe ba bena Isalela mu mfishi, bonse pa muntu pa muntu saka baikala mu bibamba byabo bya mukachi muji bankishi babo ba bunya nenyi? Mambo abo babena kwamba’mba, ‘Yehoba kechi ubena kwitumona ne. Yehoba kechi watako muchima ku kino kyalo ne.’”+
13 Kabiji wañambijile jikwabo amba: “Obewa usakumona bintu bya bunya byakilamo kutama byo babena kuba.” 14 Onkao mambo, wandetele ku kibelo kya nzubo ya Yehoba kyajinga ku kabeta ka ku buyeke, kabiji namweneko banabakazhi saka baikala na kujila lesa wabo aye Tamuza.
15 Wañambijile jikwabo amba: “Obewa mwana muntu, nanchi wibimona bino bintu nyi? Usakumona ne bintu bya bunya byatama kukila bino.”+ 16 Ponkapo wantwajile mu kipango kya mukachi kya nzubo ya Yehoba.+ Kabiji konkakwa ku kibelo kya nzubo ya Yehoba pakachi ka kibamba kya nzubo ne kya kusokelapo, pajinga banabalume 25 saka bavundamina ku nzubo ya Yehoba ne kutala ku musela; saka bapopwela juba ku musela.+
17 Kabiji wañambijile’mba: “Obewa mwana muntu, nanchi wibimona bino bintu nyi? Nanchi kyawama bena Yuda byo babena kuba bintu bya bunya, ne byo bakumbanya kyalo bukapondo+ ne kunzhingijisha nyi? Kabiji babena kubika musampi* wa bunya ku myona yami. 18 Onkao mambo, nkebakambula. Kabiji kechi nkebobila lusa; nangwa kifyele ne.+ Nangwa bakanjijilepotu byepi, kechi nkebomvwa ne.”+