Ezikyo

37 Bulume bwa Yehoba bwaishile pe amiwa kabiji Yehoba wansendele na mupashi wanji ne kukantula mu musanza+ mwayujile bikupa. 2 Wanzhokolweshemo, ne amiwa namwene bikupa byavula mu musanza, kabiji bino bikupa byauminetu shau.+ 3 Wanshikishe’mba: “Obewa mwana muntu, nanchi bino bikupa byakonsha kwikala jibiji na bumi nyi?” Ponkapo nakumbwile namba: “Nkambo mfumu Yehoba, anweba yenu mwayuka.”+ 4 Onkao mambo, wañambijile’mba: “Aula pa mambo a bino bikupa ne kwibyambila’mba, ‘Anweba bikupa byauma, umvwai byaamba Yehoba:

5 “‘Nkambo Mfumu Yehoba waambila bino bikupa amba: “Nkapuya muya mwi anweba kabiji mukekala na bumi.+ 6 Nkabikako mishipeshipe ne misunyi kwi anweba, kabiji nkabikako kikoba ne kupuya muya mwi anweba. Ponkapo mukekala na bumi; kabiji po po mukayuka’mba amiwa yami Yehoba.”’”

7 Kabiji naawijile monka mo bankambizhizhe. Byo nakyawilenga, kwaumvwanyikile kuvuma kwa bikupa, kabiji bikupa byatendekele kukonkana pamo ne kwinunga ku bikwabo. 8 Kabiji namwene mishipeshipe ne misunyi yalamata konka ne kikoba nakyo kyalamachile konka. Pano bino, kechi byajinga na bumi ne.

9 Kepo añambijile’mba: “Aula ku mwela. Obewa mwana muntu, aula ne kwambila mwela amba, “Nkambo Mfumu Yehoba waamba’mba: “Obewa mwela,* fuma ku makonka onse ana ne kupupila pa bano bantu bo baipayile kuba’mba bekale na bumi.”’”

10 Byonkabyo, naawile monka mo ankambizhizhe, ne muya* watwelele mwi abo kabiji baikele na bumi ne kwimana baimene,+ ne kwikala ke nzhita ikatampe.

11 Kabiji wañambijile’mba: “Obewa mwana muntu, bino bikupa kyo kisaka kyonse kya Isalela.+ Abo babena kwamba’mba, ‘Bikupa byetu byauma, kabiji luketekelo lwetu lwapwa.+ Kyapwa betupaatulako ku bakwetu.’ 12 Onkao mambo, aula ne kwibambila’mba, ‘Nkambo Mfumu Yehoba waamba’mba: “Anweba bantu bami, nkazhiikula bilende byenu+ ne kwimusangula kufuma mu bilende ne kwimuleta mu kyalo kya Isalela.+ 13 Anweba bantu bami, byo nkazhiikula bilende byenu ne kwimusangula kufuma mu bilende, po po mukayuka’mba amiwa yami Yehoba.”’+ 14 Yehoba waamba’mba, ‘Nkabika mupashi wami mwi anweba,+ ne anweba mukekala na bumi kabiji nkemwikazha mu kyalo kyenu. Kepo mukayuka’mba amiwa Yehoba, yami naamba ne kwikyuba.’”

15 Kabiji Yehoba wañambijile jikwabo amba: 16 “Obewa mwana muntu, tola kakichi unembepo amba, ‘Kakichi ka kwa Yuda ne bena Isalela bo aji* nabo.’+ Kabiji utole kakichi kakwabo unembepo amba, ‘Kakichi ka kwa Yosefwa, ko kuba’mba kakichi ka kwa Efelaimu ne kisaka kyonse kya Isalela kyo aji* nakyo.’+ 17 Witulamankanye pamo kuba’mba twikale ke kakichi kamo mu kuboko kobe.+ 18 Umvwe balongo* bobe bakwipuzha’mba, ‘Nanchi kechi usakwitubuula bino bintu mo byatala nenyi?’ 19 Ukebakumbule’mba, ‘Nkambo Mfumu Yehoba waamba’mba: “Nkasenda kakichi ka kwa Yosefwa kaji mu kuboko kwa kwa Efelaimu ne mikoka ya bena Isalela yo aji nayo, nkekalamankanya na kakichi ka kwa Yuda; kabiji nketulengela kwikala ke kakichi kamo,+ ne ato tukekala ke kakichi kamo mu kuboko kwami.”’ 20 Tubichi to wanembapo, twafwainwa kwikala mu kuboko kobe kuba’mba baketumone.

21 “Apa bino ukebabuule’mba, ‘Nkambo Mfumu Yehoba waamba’mba: “Nkafumya bena Isalela mu bisaka bya bantu mo baya, kabiji nkebakonkanya pamo kufuma konse konse ne kwibaleta mu kyalo kyabo.+ 22 Nkebalengela kwikala ke kisaka kimo mu kyalo,+ pa mitumba ya Isalela, kabiji bonse bakebalamanga ku mfumu umo.+ Kechi bakekalapo jikwabo bisaka bibiji ne; kabiji kechi bakabana kwikala bufumu bubiji ne.+ 23 Kechi bakezhilululapo jibiji na bankishi* babo ba bunya, na byubilo byabo bya bunya ne na bubi bwabo ne.+ Nkebapokolola ku byubilo byabo byatama byo bauba kabiji nkebatokesha. Bakekala bantu bami, ne amiwa nkekala Lesa wabo.+

24 “‘“Kalume wami Davida ukekala mfumu wabo+ kabiji bonse bakekalatu na kafunga umo.+ Bakendanga monka mwayila mikambizho yami ne kulama malamuna ami.+ 25 Bakekala mu kyalo kyo napele kalume wami Yakoba mwaikalanga bashakulu benu,+ kabiji bakekalanga monka myaka ne myaka,+ abo bene, baana* babo ne bankana babo;+ ne kalume wami Davida ukekala mfumu* wabo myaka ne myaka.+

26 “‘“Kabiji nkalayañana nabo lulayañano lwa mutende;+ lukekala lulayañano lwami lwa myaka ne myaka ne abo. Nkebekajika mu kyalo ne kwibavuzha,+ kabiji nkashimika nzubo yami mwi abo myaka ne myaka. 27 Tente* wami ukekala ne abo, kabiji nkekala Lesa wabo, ne abo bakekala bantu bami.+ 28 Nzubo yami byo ikekala mwi abo myaka ne myaka, bisaka bya bantu po po bikayuka’mba amiwa Yehoba yami mbena kuzhijika bena Isalela.”’”+