Buku Mutanshi wa Bamfumu

8 Pa kyo kya kimye, Solomone wakonkenye pamo+ bakulumpe ba bena Isalela, bantangi bonse ba mikoka ne babinemanga ba bikota bya bena Isalela.+ Baishile ku Mfumu Solomone ku Yelusalema ne kuleta jikwachi ja lulayañano lwa Yehoba kufuma mu Muzhi wa Davida,+ ko kuba’mba Ziona.+ 2 Banabalume bonse bena Isalela bakonkene pamo ku Mfumu Solomone ku kijiilo* mu ñondo wa Etanimu,* ko kuba’mba mu ñondo wa butanu na bubiji.+ 3 Byonkabyo, bakulumpe bonse ba bena Isalela baishile, kabiji bañanga bashikwile Jikwachi.+ 4 Baletele Jikwachi ja Yehoba, ne tente wa lusambakeno+ ne bipe byonse byazhila byajinga mu tente. Bañanga ne bena Levi bo bebiletele. 5 Mfumu Solomone ne jibumba jonse ja bena Isalela bo baichile kukonkena pamo ne aye, bajinga kwipi na Jikwachi. Batapishenga mikooko ne bañombe bavula bingi+ kya kuba kechi bakonsheshe ne kwibabala ne.

6 Kepo bañanga baletele jikwachi ja lulayañano lwa Yehoba mu mpunzha yajo,+ monka mu kibamba kya mwine mukachi ka nzubo,+ Mwazhijisha, munshi ya byapi bya bakelubi.

7 Kabiji byapi bya bakelubi byatanamijile pa mpunzha pajinga Jikwachi, kya kuba bakelubi bavwetele Jikwachi ne mibanda yajo.+ 8 Mibanda+ yalepele kya kuba ne ko yapelela kwamwekelenga mu kibamba Mwazhila kulutwe ya kibamba kya mwine mukachi, bino kechi yamwekelenga pangye ne. Kabiji iji monkamwa kufika ne lelo jino. 9 Mu jino Jikwachi mwajingatu mabwe abiji apapakana+ abikilemo Mosesa+ ku Holeba, kimye Yehoba kyo alayañene lulayañano+ na bena Isalela byo bafuminenga mu kyalo kya Ijipita.+

10 Bañanga byo balupukile mwazhila, jikumbi+ jayujile mu nzubo ya Yehoba.+ 11 Bañanga bakankelwe kwingila mwingilo wabo na mambo a jikumbi, mambo lukumo lwa Yehoba lwayujile mu nzubo ya Yehoba.+ 12 Pa kyonkakya kimye Solomone waambile’mba: “Anweba Yehoba mwaambile’mba mukekala mu mfishi yafiitatu bwii.+ 13 Nemushimikila nzubo ya lukumo, mpunzha mo mukekalanga myaka ne myaka.”+

14 Kepo mfumu aalulukile ne kutendeka kupesha kipwilo kyonse kya bena Isalela, kino kipwilo kyonse kya bena Isalela saka kyaimana.+ 15 Waambile’mba: “Atotwe Yehoba Lesa wa Isalela, yenka walayile batata ba Davida na kanwa kanji kabiji yenka wafikizha na kuboko kwanji kyo alayile’mba, 16 ‘Kufumatu juba jo nafumishe bantu bami bena Isalela mu Ijipita, kechi nasajilepo muzhi nangwa umo mu mikoka yonse ya bena Isalela mwa kushimikila nzubo yami kuba’mba jizhina jami jikekalengamo ne,+ bino nasala Davida kulama bantu bami bena Isalela.’ 17 Kabiji batata ba Davida bakebeshe bingi kushimika nzubo ya kutumbijikilamo jizhina ja Yehoba Lesa wa Isalela.+ 18 Bino Yehoba waambijile batata ba Davida amba, ‘Muchima wobe wakebeshe bingi kushimika nzubo ya kutumbijikilamo jizhina jami, kabiji waubile bingi bulongo kukebesha kino mu muchima wobe. 19 Pano bino, kechi ukashimika nzubo ne, mwanobe ye ukasema* ye ukashimika nzubo ya kutumbijikilamo jizhina jami.’+ 20 Yehoba wafikizha mulaye ye alayile, mambo naswana batata ba Davida kabiji naikala pa jitanda ja bena Isalela byonkatu Yehoba byo alayile. Nashimika ne nzubo ya kutumbijikilamo jizhina ja Yehoba Lesa wa Isalela,+ 21 kabiji monkamwa nalengamo mpunzha mwa kwikala Jikwachi ja lulayañano+ Yehoba lo alayañene na bashakulu betu kimye kyo ebafumishenga mu kyalo kya Ijipita.”

22 Kepo Solomone aimene kwipi na kya kusokelapo bitapisho kya Yehoba kulutwe ya kipwilo kyonse kya bena Isalela, kabiji watanyikile maboko anji mwiulu,+ 23 ne kwamba’mba: “Anweba Yehoba Lesa wa Isalela, kafwako Lesa mukwabo waesakana ne anweba+ mwiulu nangwa pano panshi ne, anweba mulama lulayañano ne kumwesha butemwe bubula kwaluka+ ku bakalume benu benda nenu na muchima wabo yense.+ 24 Mwalama mulaye ye mwalayile batata ba Davida bakalume benu. Mwalayile na kanwa kenu, kabiji lelo mwafikizha uno mulaye na kuboko kwenu.+ 25 Pano anweba Yehoba Lesa wa Isalela, lamai mulaye ye mwalayile batata ba Davida bakalume benu byo mwaambile’mba: ‘Mu kisemi kyobe kechi mukabula muntu wa kwikala pa jitanda ja bena Isalela ku meso ami ne, inge baana bobe bakateshe muchima ku mashinda abo ne kwenda ne amiwa, byonkatu byo waendelenga ne amiwa.’+ 26 Pano anweba Lesa wa Isalela, mwane kine fikizhai mulaye ye mwalayile batata ba Davida bakalume benu.

27 “Bino anweba Lesa, nanchi mwakonsha kwikala pano pa ntanda nyi?+ Talai! Mwiulu, ee kine, mwiulu mwine, mwimukepela;+ pano nga ino nzubo yo nashimika kyakonsha kupela pi!+ 28 Pano teshai muchima ku lulombelo lwami amiwa kalume wenu ne ku misashijilo yami, anweba Yehoba Lesa wami, kabiji telekai kujila kwa kukeba bukwasho ne ku lulombelo lo mbena kulomba kwi anweba lelo jino amiwa kalume wenu. 29 Meso enu atalenga pa ino nzubo mute ne bufuku, ponka pa mpunzha yo mwaambile’mba, ‘Jizhina jami po po jikekala,’+ ne kuteleka ku lulombelo lo nkalombanga amiwa kalume wenu saka ntala ku ino mpunzha.+ 30 Kabiji mutelekenga ku misashijilo yami amiwa kalume wenu ne ku misashijilo ya bantu benu bena Isalela yo bakalombanga saka batala ku ino mpunzha, kabiji mutelekenga monka mwiulu mo mwikala;+ ee kine, mutelekenga ne kwitulekelako mambo.+

31 “Muntu inge walenga mukwabo mambo, kabiji uno mukwabo wamuchipisha* ne aye waswa kuchipa,* kabiji byo achipa luchipo* waiya ku kya kusokelapo bitapisho kyenu kiji ku ino nzubo,+ 32 mukomvwe monka mwiulu ne kuchibila bakalume benu mambo ne kuzhachisha mubi ne kumukambula monka mwayila byubilo byanji, ne kubingisha waoloka ne kumufweta monka mwayila bololoke bwanji.+

33 “Inge bantu benu bena Isalela bakebashinde ku balwanyi babo na mambo a kutwajijila kwimulenga mambo,+ kabiji bakalulukile kwi anweba jibiji ne kutumbijika jizhina jenu+ ne kulomba ne kwimusashijila’mba mwibobile bibusa mu ino nzubo,+ 34 mukomvwe monka mwiulu ne kwibalekelako mambo bantu benu bena Isalela ne kwibabwezha mu kyalo kyo mwapele bashakulu babo.+

35 “Inge mwiulu mukashinkike ne mvula akabule kunoka+ na mambo a kutwajijila kwimulenga mambo,+ ne abo bakalombe saka batala ku ino mpunzha ne kutumbijika jizhina jenu ne kuvundamina ku bubi bwabo na mambo a kuba mwibapelula,*+ 36 mukomvwe monka mwiulu ne kwibalekelako mambo bakalume benu, bantu benu bena Isalela, mambo anweba mukebabuula+ jishinda jawama jo bafwainwa kwendamo; kabiji mukalete mvula mu kyalo kyenu+ kyo mwapele bantu benu kwikala buswanyi bwabo.

37 “Inge mu kyalo mukekale kipowe kya nzala+ nangwa mwalo, kyuya kisokañana, kabuwa,+ nzhiye nangwa nzhiye* iji na nzala ikatampe; nangwa inge balwanyi babo bebazhokoloka mu mizhi ya mu kyalo* nangwa inge kwaiya kinkunka nangwa kikolatu kikwabo,+ 38 milombelo yonse nangwa misashijilo yonse muntu yense yo akalomba+ nangwa bantu benu bonse bena Isalela (mambo muntu yense uyuka kintu kimukatazha ku muchima)+ byo bakatanyikilanga maboko abo ku ino nzubo, 39 mukomvwe monka mwiulu mo mwikala,+ kabiji mukebalekeleko mambo+ ne kubapo kimo; ne kwibafweta pa muntu pa muntu monka mwayila mashinda abo onse,+ mambo anweba mwayuka michima yabo (yenu yenka mwayuka michima yonse ya bantu),+ 40 pa kuba’mba bakemwakamwenga moba onse o bakekalanga mu kyalo kyo mwapele bashakulu betu.

41 “Kabiji muntu wafuma ku kyalo kingi wabula wa mu bantu benu bena Isalela, wafuma ku kyalo kiji kwalepa na mambo a jizhina* jenu+ 42 (mambo bakomvwa jizhina jenu jikatampe+ ne kuboko kwenu kwakosa kabiji kwa bulume), waiya na kulomba saka atala ku ino nzubo, 43 mukomvwe monka mwiulu mo mwikala,+ ne kumupa byonse byo akemulomba awa muntu wafuma ku kyalo kingi, kuba’mba bantu bonse ba pano pa ntanda bakayuke jizhina jenu ne kwimwakamwa+ byonka bimwakamwa bantu benu bena Isalela, kabiji bakayuke’mba jizhina jenu jitelwa pa ino nzubo yo nashimika.

44 “Inge bantu benu baya na kulwa na balwanyi babo monka mo mukebatumina,+ kabiji bakalombe+ kwi anweba Yehoba saka batala ku uno muzhi ye mwasala+ ne ku ino nzubo yo nashimika ya kutumbijikilamo jizhina jenu,+ 45 mukomvwe monka mwiulu lulombelo lwabo ne misashijilo yabo ne kwibalwilako.

46 “Inge bemulenga mambo (mambo kafwako muntu ubula kulenga mambo ne),+ kabiji mwibazhingijila ne kwibapana ku balwanyi babo, kabiji aba bebakwata bebatwala mu buzha ku kyalo kya balwanyi babo, kiji kwalepa nangwa kiji kwipi;+ 47 kabiji inge bayuka’mba kintu kyo baubile kyatama saka baji mu kyalo mo bebatwajile buzha,+ kabiji baalulukila kwi anweba+ ne kwimusashijila mu kyalo kya boba bebakwachile amba mwibobile lusa+ ne kwamba’mba, ‘Twalenga mambo kabiji twauba kintu kyatama; twauba bubi,’+ 48 kabiji inge baalulukila kwi anweba na muchima wabo yense+ ne na mweo* wabo yense mu kyalo kya balwanyi babo bebatwajile mu buzha, kabiji balomba kwi anweba saka batala ku kyalo kyabo kyo mwapele bashakulu babo ne ku muzhi ye mwasajile ne ku nzubo yo nashimika ya kutumbijikilamo jizhina jenu,+ 49 mukomvwe monka mwiulu mo mwikala,+ lulombelo lwabo ne misashijilo yabo, kabiji mukebachibile mambo bulongo 50 kabiji mukebalekeleko mambo bantu benu bemulengele mambo, ne kwibalekelako mizhilulwila yabo yonse yo baubile kwi anweba. Mukebalengela kwibobila lusa ku boba bebakwachile, kabiji bakebobila lusa+ 51 (mambo abo bo bantu benu kabiji bo buswanyi bwenu+ bo mwafumishe mu Ijipita,+ mu kisha kya mujilo mo basungulwila kyela kya kapotwe).+ 52 Meso enu atalenga pa misashijilo yami+ amiwa kalume wenu ne pa misashijilo ya bantu benu bena Isalela pa kwibateleka kimye kyonse kyo bemwita.*+ 53 Mambo anweba mwibasajile pa mitundu yonse ya bantu ba pano pa ntanda kuba’mba bekale buswanyi bwenu,+ byonkatu byo mwaambile kupichila mwi Mosesa kalume wenu kimye kyo mwafumishenga bashakulu betu mu Ijipita, anweba Nkambo Mfumu Yehoba.”

54 Solomone byo apwishishetu kulomba luno lulombelo lonse kwi Yehoba ne misashijilo, wafumineko ku kya kusokelapo bitapisho kya Yehoba ko afukamine saka atanyika maboko anji mwiulu.+ 55 Kepo aimene ne kupesha kipwilo kyonse kya bena Isalela na jiwi ja peulu amba: 56 “Atotwe Yehoba, yenka wapa bantu banji bena Isalela mpunzha ya kukokolokelamo, byonkatu byo alayile.+ Kafwako kyambo nangwa kimo kya mu bintu byawama byo alayile kupichila mwi Mosesa kalume wanji kyabula kufika ne.+ 57 Yehoba Lesa wetu ekale ne atweba byonkatu byo aikele na bashakulu betu.+ Kange etushe bunke nangwa kwitulekelela ne.+ 58 Alulwile michima yetu kwi aye,+ pa kuba’mba twendenga mu mashinda anji onse ne kulama mikambizho yanji, malamuna anji ne mizhilo yanji, yo akambizhe bashakulu betu. 59 Kabiji bino byambo byami byo nasashijila Yehoba amba angubile bibusa, ebivulukenga aye Yehoba Lesa wetu mute ne bufuku, kuba’mba anchibilengako mambo amiwa kalume wanji ne bantu banji bena Isalela pa juba pa juba, 60 pa kuba’mba bantu bonse pano pa ntanda bayuke’mba

Yehoba ye Lesa wa kine.+ Kafwako mukwabo ne!+ 61 Onkao mambo, mwafwainwa kwingijilanga Yehoba Lesa wetu na muchima wenu yense*+ ne kulondela malamuna anji ne kulama mikambizho yanji byonka byo mubena kuba lelo jino.”

62 Mfumu ne bena Isalela bonse bo ajinga nabo batapishe bitapisho byavula kwi Yehoba.+ 63 Solomone watapishe bitapisho bya mutende+ kwi Yehoba: Watapishe bañombe 22,000 ne mikooko 120,000. Byonkabyo, mfumu ne bena Isalela bonse bazhijikile nzubo ya Yehoba.+ 64 Pa joja juba mfumu wazhijikile pakachi ka kipango kulutwe ya nzubo ya Yehoba, mambo ponkapa po po alambwijile bitapisho bya kusoka, ne milambo ya kajo, ne mafuta a bitapisho bya mutende, mambo kya kusokelapo bitapisho kya mukuba+ kyajinga ku meso a Yehoba kyakepele, kechi pakonsheshe kukwana bitapisho bya kusoka, milambo ya kajo ne mafuta+ a bitapisho bya mutende ne. 65 Pa kyonkakya kimye Solomone waikele na kijiilo+ pamo na bena Isalela bonse, kyajinga kipwilo kikatampe kufuma ku Lebo-hamata* kukafika ne ku Kimpachiko kya Ijipita,+ kwi Yehoba Lesa wetu moba atanu na abiji ne moba akwabo atanu na abiji, moba onse pamo ajinga 14. 66 Pa juba jalondejilepo,* waambijile bantu kupalañana, ne abo bapesheshe mfumu ne kubwela ku mazubo abo saka basangalala ne kumvwa bulongo ku muchima pa bintu byonse byawama + Yehoba byo aubijile Davida kalume wanji ne bantu banji bena Isalela.