Amosi
3 “Umvwai bino byambo byaamba Yehoba pe anweba, anweba bena Isalela, pa mambo a kisaka kyonse kyo nafumishe mu kyalo kya Ijipita amba:
2 ‘Yenu bonka bo nayuka pa bisemi byonse bya pano pa ntanda.+
O ene mambo o nkemutotolwesha pa bubi bwenu bonse.+
3 Nanchi bantu babiji bakonsha kwendela pamo kwa kubula kumvwañana* nyi?
4 Nanchi bokwe wakonsha kubuluma mu jisaka kwa kubula kukwatapo nyama nyi?
Nanchi mwana bokwe wakonsha kukoloma mo alaala inge kechi wakwatapo kintu nenyi?
5 Nanchi kañonyi kakonsha kufwa mu kakose kaji panshi ko babula kuta* nyi?
Nanchi mukomba wakonsha kuvubuka kwa kubula kukwata kintu nyi?
6 Umvwe lusengo bamuvumya mu muzhi, nanchi bantu kechi bazakama nenyi?
Inge mu muzhi mwamweka bya malwa, nanchi Yehoba kechi ye wibileta nenyi?
7 Mambo Nkambo Mfumu Yehoba kechi wakonsha kuba kintu
Kwa kubula kusolola kintu kyafyamika* ku bakalume banji bangauzhi ne.+
8 Bokwe wabuluma!+ Ñanyi usakubula kumvwa moyo?
Nkambo Mfumu Yehoba waamba! Ñanyi usakubula kwaula?’+
9 ‘Bijikai kino pa byamba byakosa bya mu Ashadoda
Ne pa byamba byakosa bya mu kyalo kya Ijipita.
Mwambe’mba: “Konkanai pamo mulwishe mitumba ya Samaliya;+
Monai milukuchi ijimo
Ne bujimbijimbi bujimo.+
10 Mambo kechi bayuka kuba kyawama ne,” byo byaamba Yehoba,
“Aba babena kuyuzha bukapondo ne lonaiko mu byamba byabo byakosa.”’
11 Onkao mambo, Nkambo Mfumu Yehoba waamba’mba,
‘Mulwanyi ukazhokoloka kyalo,+
Ukemupwisha bulume,
Ne byamba byenu byakosa bakebipukula.’+
12 Yehoba waamba’mba,
‘Byonkatu kafunga byo avutula maulu abiji nangwa kipimvwa kya kutwi mu kanwa ka bokwe,
Ne bena Isalela byo byo bakebavutula,
Bonka baikala mu Samaliya pa myanya yawamisha ne pa bipona byawama.’+
13 ‘Umvwai ne kujimunako* ba mu nzubo ya kwa Yakoba,’ byo byaamba Nkambo Mfumu Yehoba, Lesa wa mabumba.
14 ‘Mambo mu juba jo nkatotolwesha bena Isalela pa mambo a mizhilulwila* yabo yonse,+
Nkatotolwesha ne bya kusokelapo bitapisho bya ku Betele;+
Ne nsengo ya kya kusokelapo bitapisho bakeichibako kabiji ikaponena panshi.+
15 Nkakundula nzubo ya mu kimye kya mashika pamo na nzubo ya mu kimye kya kisalo.’