Byubilo bya Batumwa
25 Fesatusa+ byo afikile mu kibunji ne kutendeka kulama, pa kupitapo moba asatu wayile ku Yelusalema kufuma ku Kesalea. 2 Kabiji bañanga bakatampe ne bakulumpe ba Bayudea bamubuujile mambo a kwa Paulo.+ Onkao mambo, batendekele kumusashijila Fesatusa amba 3 ebobile lusa, atume mawi a kumuleta Paulo ku Yelusalema. Bino abo bakebelenga kumubelamina Paulo ne kumwipayila mu jishinda.+ 4 Nangwa byonkabyo, Fesatusa wibabuujile’mba Paulo wafwainwa kulamwa monka mu Kesalea ne kuba’mba aye mwine ukabwela konka katatakatu. 5 Wibambijile’mba: “Aba baji na luusa mwi anweba tuye nabo kuba’mba bakamushiine umvwe kya kine uno muntu wauba kyatama.”+
6 Byo aikele nabo nobe moba atanu na asatu nangwa jikumi, wabwelele ku Kesalea, kabiji juba jalondejilepo waikele pa kipona kya kuchibilapo mambo ne kukambizha’mba Paulo bamulete. 7 Byo afikile, Bayudea bafumine ku Yelusalema bamuzhokolokele, kabiji batendekele kumupamo mambo akatampe avula o babujile bishinka.+
8 Bino Paulo wifumishenga mu mambo amba: “Amiwa kechi nalengapo mambo ku Mizhilo ya Bayudea nangwa ku nzubo ya Lesa nangwa kwi Kesala ne.”+ 9 Fesatusa byo akebele kutokesha Bayudea pa muchima,+ waipwizhe Paulo amba: “Nanchi ubena kusaka kuya ku Yelusalema na kukuchibila mambo ku meso ami na mambo a bino bintu nyi?” 10 Paulo wakumbwile’mba: “Naimana ku kipona kya kuchibilapo mambo kya kwa Kesala, ko nafwainwa kuchibilwa mambo. Kafwako kyatama kyo neboba Bayudea ne, byonkatu ne anweba byo mwayukila jimo. 11 Umvwe kya kuba’mba kine nengubabibi kabiji nauba kintu kya kufwilapo,+ kechi nakana kufwa ne; pano bino inge kechi paji bishinka byo babena kumpelamo mambo bano bantu ne, kafwako muntu uji na luusa lwa kumpana kwi abo kuba’mba ebatokesha ku muchima ne. Nalomba kutwala ano mambo kwi Kesala!”+ 12 Fesatusa byo apwishishe kwisamba na bakije, waambile’mba: “Byo ubena kukeba kutwala mambo obe kwi Kesala; kwi Kesala ko ko ukaya.”
13 Byo papichile moba amo, Agilipa mfumu ne Belenise baishile ku Kesalea na kwimuna Fesatusa. 14 Na mambo a kuba baikeleko moba avula, Fesatusa wamubuujile mfumu mambo a kwa Paulo amba:
“Kuji muntu umo ye bashile mu kaleya kwi Felikisa, 15 kabiji byo najinga mu Yelusalema, bañanga bakatampe ne bakulumpe ba Bayudea baishile na kumbuula mambo anji+ ne kukeba’mba bamuzhachishe. 16 Bino amiwa nebabuujile’mba kechi mo mwayila mizhilo ya bena Loma kupana muntu saka akyangye kumonañana na babena kumushiina ne, nangwa saka akyangye kwiambila mwine mambo anji o babena kumushiina ne.+ 17 Onkao mambo, byo bafikile kuno, kechi nabanjile ne, juba jalondejilepo naikele pa kipona kya kuchibilapo mambo ne kukambizha’mba uno muntu bamulete. 18 Ba kumushiina byo baimene, bakankelwe kutongola bintu byatama byo nalangulukilenga’mba byo byo auba.+ 19 Bepachikilengatu nanji pa mambo a kupopwela lesa* wabo+ ne pa mambo a muntu umo wafwile aye Yesu, Paulo ye aambilengapo amba mumi.+ 20 Byo nakankelwe mwa kupwishisha ano mapata, namwipwizhe umvwe wakonsha kuya ku Yelusalema kuba’mba bakamuchibile mambo pa bino bintu.+ 21 Bino Paulo byo alombele’mba ekale mu kaleya kuba’mba bakamuchibile mambo kwi Augasuta,*+ nakambizhe’mba bamulame kufikatu ne kimye kyo nkamutuma kwi Kesala.”
22 Kepo Agilipa amwambijile Fesatusa amba: “Ne amiwa mbena kukeba kumumvwa awo muntu.”+ Fesatusa waambile’mba: “Mukamumvwa kesha.” 23 Onkao mambo, pa juba jalondejilepo Agilipa ne Belenise batwelele mu kibamba kikatampe na buneme bukatampe pamo na bene bakulumpe ba bashilikale ne babiloolo ba mu muzhi; kabiji Fesatusa byo akambizhe kumuleta, bamuletele Paulo monka. 24 Kabiji Fesatusa waambile’mba: “Anweba Mfumu Agilipa ne anweba banabalume mwakonkana pamo ne atweba, uno muntu ye mubena kumona ye ye bandombele ku jibumba jonse ja Bayudea mu Yelusalema ne kuno, saka babijika’mba wafwainwa kufwa.+ 25 Bino namwene kuba’mba kechi walenga mambo a kumwipayilapo ne.+ Onkao mambo, uno muntu byo alombele kutwala mambo anji kwi Augasuta, nafuukwilepo kumutuma. 26 Bino pa mambo a aye kechi njipo na bya kunembela Nkambo yami ne. Onkao mambo, namuleta kwi anweba bonse, kikatakata kwi anweba Mfumu Agilipa kuba’mba pa kupwisha kumutotolwesha, mmone bya kunemba. 27 Mambo amiwa nalanguluka namba kechi kyawama kutuma kaili kwa kubula kulumbulula bulongo mambo o alenga ne.”