Ku Bena Ngalatiya
4 Naamba namba nswanyi inge ukiji mwana wa mucheche, kechi upusana na kalume ne, nangwa kya kuba ye nkambo wa byonse, 2 mambo bakimutangijila ku bakapitao ne ku bakalama kukafika ne ku juba jatongola shanji. 3 Byonkabyo, byo twakijinga baana ba bacheche, twajinga mu buzha bwa bintu bya bwanyike bya pano pa ntanda.+ 4 Bino kimye kine byo kyafikile, Lesa watumine Mwananji wasemenwe ku mwanamukazhi+ kabiji waikele mu mizhilo,+ 5 kuba’mba akasulule boba baji mu mizhilo+ kupichila mu kwibapota amba tutambule bwana.+
6 Pano na mambo a kuba mwi baana, Lesa watuma mupashi+ ujipo na Mwananji mu michima yetu,+ kabiji ubijika’mba: “Abba,* Tata!”+ 7 Onkao mambo, muntu yense mwi anweba kechi ukiji kalume ne, ke mwana; kabiji umvwe mwana, ko kuba’mba ye nswanyi kupichila mwi Lesa.+
8 Nangwa byonkabyo, kimye kyo mwabujile kuyuka Lesa, mwajinga bazha ba balesa ba bubela. 9 Pano byo mwayuka Lesa nangwa’mba byo mwayukanyikwa kwi Lesa, mambo ka o mubena kubwelela jibiji ku bintu bya bwanyike byabula kukosa+ kabiji byatutu ne kukeba kwikala mu buzha bwabyo jibiji?+ 10 Mubena kulama moba ne bañondo+ ne bimye ne myaka. 11 Naakamwa bingi kuba’mba apo kampe mingilo yami yo naingijile mwi anweba yaaluka ke yatu.
12 Balongo bami, ikalai byonka byo nji, mambo ne amiwa najinga byonka byo muji.+ Kechi mwangubile kyatama ne. 13 Kabiji mwayuka’mba kimye kitanshi, na mambo a kikola kyami nemusapwijile mambo awama. 14 Nangwa kya kuba kikola kyami kyajinga lweseko kwi anweba, kechi mwandengulwile nangwa kummona nobe kintu kya bunya* ne; bino mwantambwijile nobe malaika wa Lesa kabiji nobe Kilishitu Yesu. 15 Pano alwa lusekelo lo mwajinga nalo patanshi luji pi? Mambo amiwa nemushimuna namba, umvwe mwakonsheshe, inge mwalobwele meso enu ne kumpa.+ 16 Nanchi naaluka ke mulwanyi wenu na mambo a kwimwambila bukine nyi? 17 Babena kukebesha bingi kwimongola, bino kechi ku kintu kyawama ne; babena kukeba kwimufumya kwi amiwa, pa kuba’mba mukebeshenga kwibalondela. 18 Nangwa byonkabyo, kijitu bulongo muntu kwimukeba na mukoyo mu kintu kyawama, kechi mu kimyetu kyo nji nenu ne, 19 anweba baana bami,+ bonka babena kundengela kupita mu bisanso jibiji kufikatu ne kimye kyo mukamwesha byubilo bya Kilishitu. 20 Nanchi inge najinga nenu kyonka kino kimye ne kwambila mu jishinda jikwabo, mambo kechi nayuka bya kwimuba ne.
21 Mbuulai anweba mwakeba kwikala mu mizhilo, Nanchi mumvwa byamba Mizhilo nyi? 22 Mambo kyanembwa’mba Abalahama wajinga na baana ba balume babiji, umo wasemekelwe ku mwanamukazhi wa mwingilo,+ mukwabo ku mwanamukazhi mwana bene;+ 23 bino awa wasemekelwe ku mwanamukazhi wa mwingilo, wasemekelwe mwayila kisemwa,*+ pakuba awa wasemekelwe ku mwanamukazhi mwana bene, wasemenwe mu mulaye.+ 24 Abino bintu byajinga kifwanyikizho; mambo bano banabakazhi bemenako lulayañano lubiji, lumo lwa ku Mutumba wa Sinai,+ lusema baana mu buzha, kabiji ye Hegala. 25 Hegala wimenako Sinai,+ mutumba wa mu Alabya, kabiji wimenako Yelusalema ujiko lelo jino, mambo aye uji mu buzha na baana banji. 26 Pakuba Yelusalema uji mwiulu wakasuluka, kabiji ye inetu.
27 Mambo kyanembwa’mba: “Sangalala obewa mwanamukazhi ñumba; bijika na lusekelo obewa mwanamukazhi ubula kumvwa bisanso; mambo baana ba mwanamukazhi ye bakana bavujisha kukila ba mwanamukazhi uji na mulume.”+ 28 Pano anweba balongo bami, mwi baana ba mulaye byonka byajinga Izaka.+ 29 Bino byonkatu awa wasemenwe mwayila kisemwa* byo atendekele kumanyika yewa wasemenwe mwayila mupashi,+ byo byo kiji ne luno.+ 30 Nangwa byonkabyo, nanchi kinembelo kyaamba’mba ka? “Mupangai uno mwanamukazhi wa mwingilo ne mwananji, mambo mwana wa uno mwanamukazhi wa mwingilo kechi ukekala nswanyi pamo na mwana wa mwanamukazhi mwana bene ne.”+ 31 Onkao mambo, balongo bami, atweba kechi twi baana ba mwanamukazhi wa mwingilo ne, bino twi baana ba mwanamukazhi mwana bene.