Yelemiya
3 Bantu bepuzha’mba: “Umvwe muntu wakana mukazhanji, ne mukazhanji naye waswa kufumako, kabiji wasongolwa ku mwanamulume ungi, nanchi mwatawanji mutanshi wakonsha kumubwezha jibiji nyi?”
Nanchi akya kyalo kechi bekitamisha nenyi?+
Yehoba waamba’mba: “Obewa wauba bulalelale na bakambwe bavula,+
Nanchi wakonsha kubwela kwi amiwa nyi?”
2 “Inuka utale pa tutumbatumba pabula kintu.
Kwepi ko babujile kulaala ne obewa kya kukukanjikizha?
Obewa waikelenga ku mashinda na kupembelela banabalume,
Byonka byuba muntu* wikala mungye.
Obewa watwajijilatu na kutamisha kyalo
Na byubilo byobe bya bulalelale ne bubi bobe.+
3 Onkao mambo, mvula waleka kunoka,+
Ne mvula wa mu kimye kya kisalo kafwako.
4 Pano luno ubena kunjijila ne kwamba’mba,
‘Tata, anweba yenu mulunda nami wa pa muchima kufumatu ku bwanyike bwami!+
5 Nanchi kujipo wakonsha kuzhingila myaka ne myaka,
Nangwa kulama kintu ku muchima kimye kyonse nyi?’
Bino byo byo wamba,
Pano bino, obewa watwajijila kuba bintu byonse byatama.”+
6 Mu moba a Mfumu Yosiya,+ Yehoba wañambijile’mba: “‘Nanchi wamona bintu byauba Isalela wabula bukishinka nyi? Aye ubena kuba bulalelale pa mitumba yonse yalepa ne munshi ya bichi byonse byafunkama.+ 7 Nangwa kya kuba aye waubilenga bino byonse, amiwa namwambijile namba abwele kwi amiwa,+ pano bino aye wakaine kubwela; kabiji Yuda naye watajilengatu mulongo wanji na kuba byatama.+ 8 Amiwa byo namwene kino, namukaine Isalela wabujile bukishinka ne kumupa kyete kya kumukainapo+ na mambo a bukende bwanji.+ Bino Yuda mulongo wanji kechi wafunjijileko ne; naye watendekele kuba bulalelale.+ 9 Aye kechi wamwene’mba bulalelale bo aubilenga bwatama ne, watwajijiletu na kutamisha kyalo ne kuba bukende na mabwe ne bichi.+ 10 Kabiji Yehoba waamba’mba, ‘Nangwa byonkabyo, mulongo wanji aye Yuda kechi wabwelele kwi amiwa na muchima wanji yense ne, aye wibepekezhetu kubwela kwi amiwa.’”
11 Ponkapo Yehoba wañambijile’mba: “Isalela wabula bukishinka wimwesha aye mwine* koloka kukila Yuda wa bujimbijimbi.+ 12 Yanga ukabuule bantu bekala ku kabeta ka ku buyeke amba:+
‘Yehoba waamba’mba,+ “Bwela obewa Isalela wapondoka.” Kabiji Yehoba waamba’mba, “Amiwa kechi nkakutala na bukaji* ne,+ mambo newakishinka. Kabiji kechi nkakuzhingijila myaka ne myaka ne. 13 Obewa swatu kuba’mba walenga mambo, mambo wasatukila Yehoba Lesa wobe. Kabiji obewa watwajijile kuba bulalelale na bantu bangi* munshi ya bichi byafunkama, bino kechi waswile kukookela byo naambile ne, byo byaamba Yehoba.’”
14 Yehoba waamba’mba: “Bwelai anweba baana bapondoka. Mambo amiwa yami nkambo* yenu wa kine; kabiji amiwa nkemusenda, umo nkamufumya mu muzhi, ne babiji nkebafumya mu mukoka umo, kabiji nkemutwala ku Ziona.+ 15 Amiwa nkemupa bakafunga bo natemwa,+ ne abo bakemukwasha kuyuka bintu byavula ne kwikala ba milangwe.” 16 Yehoba waamba’mba: “Mu oa moba, anweba mukasemununa ne kuvula bingi mu kyalo.+ Kechi bakambapo jibiji amba, ‘Jikwachi ja lulayañano lwa Yehoba ne!’ Kabiji kechi bakejivulukapo jibiji, kwijilangulukapo nangwa kwijitonga ne, kabiji kechi bakejilengapo jibiji ne. 17 Pa kyokya kimye, Yelusalema bakamutela’mba jitanda ja Yehoba;+ ne bisaka bya bantu byonse bakebikonkanya pamo kuba’mba binemeke jizhina ja Yehoba mu Yelusalema.+ Kabiji kechi bakoobapo jibiji bintu bikeba michima yabo yatama ne.”
18 “Mu oa moba, kisaka kya Yuda ne kisaka kya Isalela bakendelanga pamo,+ kabiji bonse bakafuma mu kyalo kya ku kabeta ka ku buyeke kuya mu kyalo kyo napele bashakulu benu kwikala ke kyabo.+ 19 Kabiji nalangulukile namba, ‘Naubile bingi bulongo kwimwikazha mu baana ba bantu ne kwimupa kyalo kyawama, kyakilamo kuwama mu bisaka bya bantu* kwikala ke kyenu!’+ Nalangulukile jikwabo namba mukangita’mba, ‘Tata!’ kabiji amba kechi mukafuma kwi amiwa ne. 20 Yehoba waamba’mba, ‘Byonkatu mwanamukazhi wabula bukishinka byo asha mwatawanji,* ne anweba kisaka kya Isalela byo byo mwansha na mambo a kubula bukishinka kwenu.’”+
21 Mawi aumvwanyikila pa tutumbatumba pabula bintu,
O mawi a kujila ne misashijilo ya bena Isalela,
Mambo abo batamisha mashinda abo;
Bamuvulamako Yehoba Lesa wabo.+
22 “Bwelai, anweba baana basatuka.
Amiwa nsakwimukwasha nangwatu mwasatuka.”+
“Atweba bano! Twaiya kwi anweba,
Mambo anweba Yehoba, yenu Lesa wetu.+
23 Tutumbatumba ne kiwowo kiji pa mitumba byo byatu.+
Kine, lupulukilo lwa bena Isalela lukafuma kwi Yehoba Lesa wetu.+