Yelemiya
13 Yehoba wañambijile’mba: “Yanga ukapote mushipi wa kisapi kya linenyi ne kumunyinga mu lubunda wobe, bino kange umutumpe mu mema ne.” 2 Byonkabyo, napotele mushipi kabiji namunyingile mu lubunda byonkatu byaambile Yehoba. 3 Kabiji Yehoba wañambijile ja bubiji amba: 4 “Senda mushipi ye wapotele ye wanyinga mu lubunda, wimane uye ku mukola wa Ufelata ukamufye mu mulala wa jibwe.” 5 Ponkapo nayile ne kukamufya ku mukola wa Ufelata byonkatu byankambizhe Yehoba.
6 Bino byo papichile moba avula, Yehoba wañambijile’mba: “Imana uye ku mukola wa Ufelata ukasende mushipi ye nakwambijile’mba umufye kokwa.” 7 Ponkapo nayile ku Ufelata ne kufumya mushipi mu jibwe mo namufiile, kabiji nataaine mushipi waonaika; waonaikile kya kuba’mba kechi wakonsha kwingila jibiji ne.
8 Kepo Yehoba añambijile’mba: 9 “Yehoba waamba’mba, ‘Abino byo byo nkonauna ne bwitote bwa bena Yuda ne kwitota kwa bangikazhi ba mu Yelusalema.+ 10 Bano bantu batama bakana kukookela byambo byami,+ balondela bikeba michima yabo yatama,+ kabiji bongolokela ku balesa bangi na kwibengijila ne kwibafukamina, bakekala nobe uno mushipi waonaika ukabula kwingila jibiji.’ 11 Yehoba waamba’mba, ‘Mambo byonkatu mushipi byo akwata mu lubunda wa muntu, byo byo nalengejile bonse ba mu kisaka kya Isalela ne bonse ba mu kisaka kya Yuda kunkakachila kuba’mba bekale bantu bami,+ lukumo lwami,+ lutotelo lwami ne kintu kyawama kwi amiwa. Bino abo kechi bakookejile ne.’+
12 “Kabiji wafwainwa kwibambila bino byambo amba, ‘Yehoba Lesa wa Isalela waamba’mba: “Milondo ikatampe yonse bafwainwa kwiiyuzha binyu.”’ Bino abo bakakukumbula’mba, ‘Nanchi kechi twayukila jimo kuba’mba milondo ikatampe yonse bafwainwa kwiiyuzha binyu nenyi?’ 13 Kepo ukebambile’mba, ‘Yehoba waamba’mba: “Amiwa mbena kulengela bantu bonse bekala mu kino kyalo kupendwa binyu,+ bamfumu baikala pa jitanda ja Davida, bañanga ne bangauzhi ne bantu bonse bekala mu Yelusalema. 14 Kabiji amiwa nkebakunkanya pamo, au na mukwabo, au na mukwabo, bashabo ne baana babo pamo”+ byo byamba Yehoba. “Kechi nkebobila lusa nangwa bulanda ne; kafwako kintu nangwa kimo kikandengela kubula kwibonauna ne.”’+
15 Umvwai ne kutako muchima.
Kange mwitote ne, mambo Yehoba ye waamba.
16 Mupai lukumo Yehoba Lesa wenu,
Saka akyangye kuleta mfishi
Kabiji maulu enu saka akyangye kwituntula pa mitumba kimye kya muntuwa muntuwa.
Anweba mukakebanga kyeya,
Bino aye ukaleta mfishi ikatampe;
Ukalula kyeya ke mfishi ine yafiitatu bwii.+
17 Kabiji umvwe mwakana kuteleka,
Amiwa* nkajila mu bufyamfya na mambo a bwitote bwenu.
Nkajila mipolo, kabiji mu meso ami mukalukumukangatu mipolo,+
Mambo jitanga ja Yehoba+ bejitwala mu buzha.
18 Ambila mfumu ne inamfumu+ amba, ‘Ikalai pa kipona kya panshi,
Mambo munchinya wenu wa buya ukaponako ku mutwe wenu.’
19 Mizhi ya ku kabeta ka ku bulenge beishinka,* kabiji kafwako wa kwiishinkula ne.
Bena Yuda bonse bebatwala mu buzha, bebasendatu bonse mu buzha.+
20 Inuka umone boba babena kufuma ku kabeta ka ku buyeke.+
Nga jitanga jo bakupele jiji pi, ko kuba’mba mikooko yobe yawama?+
21 Ukamba’mba ka kimye kya kukukambula byo kikafika
Ku balunda bo wisampile nabo bulunda patanshi?+
Nanchi bisanso kechi bikakufikila, bisanso nabiji byobya bikala na mwanamukazhi ubena kupaapa nenyi?+
22 Kabiji umvwe wiipuzha mu muchima wobe amba, ‘Mambo ka bino bintu o byaishila pe amiwa?’+
Bakuvuula kifunga kyobe na mambo a bubi bobe bukatampe,+
Kabiji tushiko tobe betupobola.
23 Nanchi mwina Kushi* wakonsha kwalula kikoba kyanji, nangwa kisumpa kwalula kubalala kwanji nyi?+
Umvwe bakonsha kwalula, ko kuba’mba wakonsha kuba byawama,
Obewa ye bafunjisha kuba byatama.
24 Onkao mambo, amiwa nkebapalañanya nobe nenge yo basenda ku mwela upupa mu kiselebwa.+
25 Yehoba waamba’mba, “Akino kyo kintu kyo nakwabilapo, ko kuba’mba mpunzha yo nakuchibilako,
26 Onkao mambo, amiwa nkakupimpula kifunga kyobe ne kwikikupika ku mutwe wobe,
Kabiji bakakutambila,+
27 Byubilo byobe bya bukende+ ne kongolañana kobe,
Bupite bobe bwakilamo kutama.*
Pa tutumbatumba ne mungye,
Namona byubilo byobe bya bunya.+
Malwa obe obewa Yelusalema!
Nanchi ukatwajijila kwikala wa bunya kufika ñanyi kimye?”+