Buku Mutanshi wa Bamfumu

11 Bino Mfumu Solomone watemenwe banabakazhi bavula+ ba mu byalo bingi bo anungile pa mukazhanji mwana wa kwa Felo:+ Banabakazhi bena Moabu,+ bena Amonyi,+ bena Edomu, bena Shidona+ ne bena Hiti.+ 2 Bafumine mu bisaka bya bantu Yehoba byo aambijile bena Isalela amba: “Kechi mukapwanañanenga nabo* ne, ne abo kechi bakapwanañanenga ne anweba ne, mambo kine bakongola michima yenu kuba’mba mukalondelenga balesa babo.”+ Bino Solomone wibatemenwe ne kwibakakachila. 3 Wajinga na bakazhi 700 baana ba bamfumu ne bantombo 300, kabiji bakazhi banji baongwelenga* muchima wanji pachepache. 4 Solomone byo akotele,+ bakazhi banji baongwejile* muchima wanji ku balesa bangi,+ kabiji kechi waingijile Yehoba Lesa wanji na* muchima wanji yense byonka byajinga muchima wa kwa Davida shanji ne. 5 Kabiji Solomone wapopwejilenga Ashatoleta,+ lesa wa mukazhi wa bena Shidona, ne Milikomu+ lesa wa bunya wa bena Amonyi. 6 Kabiji Solomone waubilenga bintu byatama ku meso a Yehoba, kabiji kechi walondejilenga Yehoba na muchima wanji yense byonka byaubanga shanji Davida ne.+

7 Kyo kimye Solomone kyo alengele mpunzha yatuntama+ ya kwa Kemoshi, lesa wa bunya wa bena Moabu, pa mutumba watalañana na Yelusalema ne ya kwa Moleka,+ lesa wa bunya wa bena Amonyi.+ 8 Abino byo byo aubijile bakazhi banji bonse ba mu byalo bingi basokelenga bya kufutumuna ne kutapisha ku balesa babo.

9 Yehoba wamuzhingijile Solomone, mambo muchima wanji wafumineko kwi Yehoba Lesa wa Isalela,+ yenka wamwekele kwi aye jibiji+ 10 ne kumujimunako pa mambo a kino kintu, kuba’mba kechi wafwainwa kupopwela balesa bangi ne.+ Bino aye kechi wakookejile mukambizho wa Yehoba ne. 11 Kepo Yehoba aambijile Solomone amba: “Na mambo a kuba wauba kino kintu kabiji kechi walama lulayañano lwami ne malamuna ami o nakukambizhe ne, kine nkakwangata bufumu, ne kwibupana ku umo wa mu bakalume bobe.+ 12 Nangwa byonkabyo, na mambo a kwa Davida shobe, kechi nkoba kino kintu mu moba a bumi bobe ne. Nkebwangata kufuma mu kuboko kwa mwanobe,+ 13 bino kechi nkangata bufumu bonse ne.+ Mukoka umo nkamupana ku mwanobe,+ na mambo a kwa Davida kalume wami ne na mambo a muzhi wa Yelusalema ye nasala.”+

14 Kepo Yehoba aletejile Solomone mulwanyi,+ aye Hadada mwina Edomu wa mu kikota kya ku bufumu bwa Edomu.+ 15 Davida byo ashinjile Edomu,+ Yoaba mukulumpe wa nzhita wayile na kuzhiika bo baipayile, kabiji wakebele kutapa banabalume bonse ba mu Edomu. 16 (Mambo Yoaba ne bena Isalela bonse baikele konkakwa bañondo batanu na umo kufikatu ne byo aipayile* banabalume bonse ba mu Edomu.) 17 Bino Hadada wanyemene pamo na bakalume ba bashanji bena Edomu, onkao mambo, bayile ku Ijipita; pa kyokya kimye Hadada wajingatu kalombwana. 18 Bafumine ku Mijanyi ne kuya ku Palana. Pa kufuma ku Palana+ basendele banabalume ne kuya nabo ku Ijipita kwi Felo mfumu wa Ijipita, kabiji wamupele nzubo, kajo ne mpunzha. 19 Hadada bamutemenwe bingi kwi Felo, kya kuba wamupele ne bukwe bwanji wa mukazhi mulongo wa mukazhanji Tapina muka mfumu, amba amusongole. 20 Mu kuya kwa moba, mulongo wa kwa Tapina wamusemijile mwana wa mulume, aye Genubata, kabiji Tapina wamukomeshe* mu nzubo ya kwa Felo, kabiji Genubata waikelenga mu nzubo ya kwa Felo pamo na baana ba kwa Felo.

21 Hadada byo ajinga mu Ijipita waumvwine’mba Davida bamutwala na kulaala kwalaala bashakulu banji+ ne kuba’mba Yoaba mukulumpe wa nzhita wafwa.+ Kepo Hadada aambijile Felo amba: “Nswishai ngyenga, kuba’mba mbwele ku kyalo kyami.” 22 Bino Felo wamushikishe’mba: “Ñanyi kintu kyo wakajilwa byo ubena kwikala ne amiwa, pa kuba’mba ukebenga kubwela ku kyalo kyobe?” Aye wamukumbwile’mba: “Kafwako, bino napopwela nswishai ngyenga.”

23 Kabiji Lesa waletejile Solomone mulwanyi mukwabo,+ aye Lezoni mwana wa kwa Eliada,+ yenka wanyemene nkambo yanji, aye Hadadeza mfumu wa Zoba. 24 Wakonkenye banabalume ko ajinga ne kwikala mukulumpe wabo wa nzhita kimye Davida kyo ebashinjile.*+ Kepo bayile ku Damasakasa+ ne kwikala konkakwa ne kutendeka kulama mu Damasakasa. 25 Kabiji waikele mulwanyi wa bena Isalela mu moba onse a bumi bwa kwa Solomone kununga pa makatazho aletele Hadada, kabiji wibashikilwe bena Isalela kimye kyo alaminenga Silya.

26 Kabiji kwajinga ne Yeloboma+ mwana wa kwa Nebati, mwina Efelaimu wa ku Zeleda, kalume wa kwa Solomone,+ inanji wajinga Zeluwa, mwanamukazhi wafwilwa. Aye naye wasatukijile* mfumu.+ 27 Kyalengejile’mba asatukile mfumu ke kino: Solomone walengele Kituntaulo*+ ne kushinka nsakwa ku mapunzha a Muzhi wa shanji Davida.+ 28 Kabiji uno Yeloboma wajinga muntu wakosa. Solomone byo amwene’mba uno nsongwalume wingila bingi na ngovu, wamutongwele kwikala mukulumpe pa bonse+ ba mu nzubo ya kwa Yosefwa bo bakambizhe kwingila mingilo. 29 Pa kyonkakya kimye Yeloboma wafumine mu Yelusalema, kabiji ngauzhi Ahiya+ mwina Shilo wamutaaine mu jishinda. Ahiya wavwajile kivwalo kya katataka, kabiji bajingatu bubiji bwabo mungye. 30 Ahiya wakwachile kivwalo kya katataka kyo avwajile ne kwikitabaula mu tubisapi 12. 31 Kepo aambijile Yeloboma amba:

“Itolelepo obe mwine tubisapi jikumi, mambo Yehoba Lesa wa Isalela waamba’mba: ‘Nkatabula bufumu mu kuboko kwa kwa Solomone, kabiji nkakupapo mikoka jikumi.+ 32 Bino mukoka umo ukashala wanji+ na mambo a kalume wami Davida+ ne na mambo a Yelusalema, muzhi ye nasala mu mikoka yonse ya bena Isalela.+ 33 Nkooba kino mambo bankaana,+ kabiji babena kufukamina Ashatoleta lesa wa mukazhi wa bena Shidona, ne Kemoshi lesa wa bena Moabu, ne Milikomu lesa wa bena Amonyi, kabiji baleka kwenda mu mashinda ami mambo kechi babena kuba byaoloka ku meso ami ne kulama malamuna ami ne mizhilo yami byonkatu byaubanga shanji Davida ne. 34 Bino kechi nkangata mu kuboko kwanji bufumu bonse ne, kabiji nkamuleka kwikala mfumu moba onse a bumi bwanji, na mambo a kwa Davida kalume wami ye nasajile,+ mambo wakookejile mikambizho yami ne malamuna ami. 35 Bino nkangata bufumu mu kuboko kwa mwananji ne kwibupana kwi obewa, ko kuba’mba mikoka jikumi.+ 36 Mwananji nkamupa mukoka umo, pa kuba’mba Davida kalume wami kimye kyonse akekalenga na lampi ku meso ami mu Yelusalema,+ muzhi ye nesajila mwa kubika jizhina jami. 37 Nkakutongola, ne obewa ukekala na luusa pa byonse byo ukakebanga,* kabiji ukekala mfumu wa bena Isalela. 38 Kabiji inge ukakookelenga byonse byo nakukambizha ne kwenda mu mashinda ami ne kuba byaoloka ku meso ami kupichila mu kukookela malamuna ami ne mikambizho yami, byonkatu Davida kalume wami byo aubanga,+ ne amiwa nkekalanga ne obewa. Nkakushimikila nzubo ya myaka, byonkatu byo nashimikila Davida,+ kabiji nkakupa bena Isalela. 39 Kabiji nkebalengesha bumvu baana ba kwa Davida na mambo a kino,+ bino kechi kikatwajijila ne.’”+

40 Onkao mambo, Solomone wakebelenga kumwipaya Yeloboma, bino Yeloboma wanyemejile ku Ijipita kwi Shishaka+ mfumu wa Ijipita,+ kabiji waikelenga mu Ijipita kufikatu ne kimye kyafwile Solomone.

41 Pa mambo a bintu bikwabo byapichilemo Solomone, ne byonse byo aubile ne maana anji, nanchi kechi byanembwa mu buku wa bintu bapichilemo Solomone nenyi?+ 42 Solomone walamine bena Isalela bonse myaka 40 mu Yelusalema. 43 Kepo Solomone bamutwajile na kulaala kwalaala bashakulu banji kabiji bamuzhiikile mu Muzhi wa Davida shanji; kabiji mwananji aye Lehoboma+ wamuswaine pa bufumu.