Yona
3 Kabiji Yehoba waambijile jibiji Yona amba:+ 2 “Imana uyenga ku Ninevwa+ muzhi mukatampe, ne kwibasapwila byambo byo nakubuula.”
3 Onkao mambo, Yona wakookejile byaambile Yehoba+ kabiji ponkapo waimene ne kuya ku Ninevwa.+ Ninevwa wajinga muzhi* mukatampe bingi wa kwendamo moba asatu. 4 Kepo Yona atwelele mu muzhi, kabiji byo aendele lwendo lwa juba jimo, watendekele kubijika’mba: “Kwashalatu moba 40, Ninevwa bakamonauna.”
5 Kabiji bantu ba mu Ninevwa bamwitabijile Lesa,+ kabiji batayile mbila ya kuzhikilwa na nzala ne kwinyinga bisapi bya majila, kutendekela ku mukulumpe kufika ne ku mwanyike. 6 Byambo byo byafikile ku mfumu wa Ninevwa, waimenepo pa jitanda janji ne kuvuula kivwalo kyanji kya bufumu ne kwikumbakanya kisapi kya majila ne kwikala mu buto. 7 Kabiji wakambizhe mu Ninevwa monse amba,
“Monka mwayila mukambizho wa mfumu ne babineme banji: Kafwako muntu nangwa nyama, bañombe nangwa mikooko wafwainwa kuja kintu nangwa kimo ne. Kechi bafwainwa kuja kajo, nangwa kutoma mema ne. 8 Bonsetu bantu ne banyama bevwete bisapi bya majila; kabiji bamwite Lesa na mukoyo ne kuleka mashinda abo atama ne byubilo bya bukapondo byo boba. 9 Ñanyi wayuka inge Lesa wa kine wakonsha kulangulukapo* pa kyo akeba kuba ne kuleka bukaji bwanji bukatampe pa kuba’mba tubule kuvila?”
10 Lesa wa kine byo amwene bintu byo baubile, byo balekele mashinda abo atama,+ walangulukilepo* pa malwa o akebelenga kwibaletela, kabiji kechi wialetele ne.+