Buku wa Bubiji wa Bamfumu
20 Mu oa moba, Hezekiya wakolelwe bingi kabiji kwashajiletu pacheche kufwa.+ Ngauzhi Isaya mwana wa kwa Amozi wayile kwi aye ne kumwambila’mba, “Yehoba waamba’mba: ‘Pana mikambizho ku ba mu kisemi kyobe, mambo obewa ubena kufwa; kechi usakukosa ne.’”+ 2 Ponkapo wakungamijile ku lubumbulu ne kulomba kwi Yehoba amba: 3 “Kine, anweba Yehoba nemusashijilapo, vulukai byo naenda mu bukishinka ku meso enu ne na muchima yense, kabiji nauba bintu byawama ku meso enu.”+ Kabiji Hezekiya wajijile bingi.
4 Isaya saka akyangye ne kufika pakachi ka lubanza, jiwi ja Yehoba jaishile kwi aye amba:+ 5 “Bwela kwi Hezekiya, ntangi wa bantu bami ukamubuule’mba, ‘Yehoba Lesa wa Davida mushakulu wobe waamba’mba: “Naumvwa lulombelo lobe. Namona mipolo yobe.+ Nsakukubuka.+ Pa juba ja busatu ukaya ku nzubo ya Yehoba.+ 6 Mbena kukunungilako myaka 15 ku bumi* bobe, kabiji nkakupokolola obewa ne uno muzhi mu kuboko kwa mfumu wa Asilya,+ kabiji nkazhikijila uno muzhi na mambo a jizhina jami ne na mambo a Davida kalume wami.”’”+
7 Ponkapo Isaya waambile’mba: “Letai shinkwa ye balenga na makuyu auma.” Byonkabyo, bamuletejile ne kumushinga pa kipute, ne aye wakoselenga pachepache.+
8 Ponkapo Hezekiya waipwizhe Isaya amba: “Ñanyi kiyukilo+ kyo nsakuyukilako kuba’mba Yehoba usakumbuka ne kuba’mba pa juba ja busatu nkaya ku nzubo ya Yehoba?” 9 Isaya wakumbwile’mba: “Kino kyo kiyukilo kyafuma kwi Yehoba kya kukumwesha’mba Yehoba ukafikizha byambo byo aamba: Nanchi mubena kukeba kuba’mba kimvule kiji pa kya kukanjijilapo* kiye kulutwe ntampulo jikumi nangwa kiye kunyuma ntampulo jikumi nyi?”+ 10 Hezekiya waambile’mba: “Kyapela kimvule kuya kulutwe ntampulo jikumi, kukila kubwela kunyuma ntampulo jikumi.” 11 Onkao mambo, ngauzhi Isaya walombele kwi Yehoba, ne aye walengejile kimvule kyajinga pa kya kukanjijilapo kya kwa Ahaza kubwela kunyuma ntampulo jikumi saka kyakunkuluka kala pa kya kukanjijilapo.+
12 Pa kyokya kimye, mfumu wa Babilona, Melodaka-baladana mwana wa kwa Baladana, watumine makalata ne bupe kwi Hezekiya, mambo waumvwine’mba Hezekiya wakolelwenga.+ 13 Hezekiya wibatambwijile* baluwe ne kwibamwesha byonse byajinga mu nzubo yanji mo alaminanga bintu bya buneme,+ ko kuba’mba siliva, ngolode, manyi a balasama ne manyitu akwabo a mutengo, byela byanji bya nkondo ne bintu byonse byajinga mo balaminanga bya buneme byanji. Kafwako kintu nangwa kimo Hezekiya kyo abujile kwibamwesha kyajinga mu nzubo* yanji ne mu bufumu bwanji bonse ne.
14 Kepo ngauzhi Isaya ayile kwi Mfumu Hezekiya ne kumushikisha’mba: “Nanchi bano banabalume baji kwamba’mba ka, kabiji bafuma pi?” Ponkapo Hezekiya wakumbwile’mba: “Bafuma ku kyalo kwalepa, ku Babilona.”+ 15 Kabiji wamwipwizhe jikwabo amba: “Ñanyi bintu byo baji kumona mu nzubo* yenu?” Hezekiya wamukumbwile’mba: “Baji kumona bintu byonse biji mu nzubo* yami. Kafwako kintu nangwa kimo kya buneme kiji mu nzubo yami kyo naji kubula kwibamwesha ne.”
16 Ponkapo Isaya waambijile Hezekiya amba: “Umvwai byaamba Yehoba+ amba, 17 ‘Umvwa! Moba abena kwiya kabiji bintu byonse biji mu nzubo* yobe ne bintu byonse bya bashakulu bobe byo walama kufika ne lelo, bakebitwala ku Babilona.+ Kafwako kintu nangwa kimo kikashala ne,’ byo byaamba Yehoba. 18 ‘Kabiji baana bobe bamo bo ukasema bakebasenda+ kabiji bakekala babitumbafumu mu jilapa ja mfumu wa Babilona.’”+
19 Ponkapo Hezekiya waambijile Isaya amba: “Byambo bya Yehoba byo waamba, byawama bingi.”+ Kabiji wanungilepo amba: “Kyawama inge kya kuba mu moba a bumi bwami nkekale mu mutende ne ku matwi nzoo.”*+
20 Bintu bikwabo byapichilemo Hezekiya, mingilo yanji yonse ikatampe, ne byo alengele kizhiba ne mufolo+ ne kuleta mema mu muzhi,+ nanchi kechi byanembwa mu buku wa bintu byapichilengamo bamfumu ba mu Yuda nenyi? 21 Kepo Hezekiya bamutwajile na kulaala kwalaala bashakulu banji;+ kabiji mwananji aye Manase+ waswaine pa bufumu.+