Byubilo bya Batumwa
6 Mu oa moba, baana ba bwanga byo bavujijilengako, Bayudea baambanga Kingiliki banyinyichilenga Bayudea baambanga Kihebelu, mambo banabakazhi babo bafwilwa kechi bebabijilengapo kajo ka pa juba pa juba ne.+ 2 Onkao mambo, batumwa Jikumi na Babiji baichile baana ba bwanga bonse ne kwibambila’mba: “Kechi kyawama atweba kuleka kufunjisha mambo a Lesa kuba’mba twabenga kajo ku matebulu ne.+ 3 Onkao mambo, anweba balongo kebaimo banabalume* batanu na babiji baji na byubilo byawama+ mwi anweba, bayula mupashi ne maana+ kuba’mba twibatongole bengilenga uno mwingilo;+ 4 pakuba atweba tusakutesha muchima ku milombelo ne ku mwingilo wa kusapwila mambo a Lesa.” 5 Jibumba jonse jatemenwe bingi bintu byo baambile, kabiji basajile Setepena mwanamulume wajinga na lwitabilo kabiji wayujile mupashi wazhila, ne Filipa,+ Polokolusa, Nikanola, Timona, Palamenasa ne Nikolasa wa ku Antioka, waalukile ke Muyudea. 6 Bebaletele ku batumwa, kabiji pa kupwisha kulomba, batumwa batentekele maboko pa bano banabalume.+
7 Byonkabyo, mambo a Lesa akomenenga,+ ne baana ba bwanga bavujijilengako bingi+ mu Yelusalema; ne bañanga bavula batendekele kwitabila.+
8 Setepena byo bamubijile bibusa kwi Lesa ne kumupa bulume, waubilenga bya kukumya* bikatampe ne biyukilo mu bantu. 9 Bino banabalume bamo, ba mu jibumba jatelwanga’mba Nshinagoga wa Baana ba Bene, baishile pamo na bena Kilene bamo, bena Alekesandiliya, bena Kilikya ne bena Asha na kwipachika ne Setepena. 10 Pano bino, bakankelwe kushinda maana ne mupashi wamukwashishenga kwamba.+ 11 Kepo bajimbaikile bantu mu bufyamfya kuba’mba bambe’mba: “Twaumvwa uno muntu na kwamba bintu bya kunena Mosesa ne Lesa.” 12 Kabiji batundaikile bantu, bakulumpe ne banembeshi, ne abo bamuvundumukijile, kumukwata ne kumutwala ku kije kya Saniedilini. 13 Kabiji baletele bakamonyi ba bubela baambile’mba: “Uno muntu kechi ukeba kwikileka kwamba mwenga pa ino mpunzha yazhila ne pa Mizhilo ne. 14 Twaji kumumvwa saka amba’mba, uno Yesu mwina Nazala ukonauna ino mpunzha ne kupimpula bisho byo etupele Mosesa.”
15 Kabiji bonse baikele mu kije kya Saniedilini byo bamutajile, bamwene kilungi kyanji nobe kya malaika.