Buku Mutanshi wa Bamfumu

20 Kabiji Benehadada+ Mfumu wa Silya+ wakonkenye nzhita yanji yonse pamo na bamfumu bakwabo 32 ne bambili babo ne makalaki abo; wayile ne kuzhokoloka muzhi+ wa Samaliya+ ne kulwa nanji. 2 Kabiji watumine baluwe kwi Ahaba+ Mfumu wa Isalela mu muzhi ne kumwambila’mba: “Benehadada waamba’mba, 3 ‘Siliva yobe ne ngolode yobe byo byami, ne bakazhi bobe bawama ne baana bobe bo bami.’” 4 Ponkapo mfumu wa Isalela wakumbwile’mba: “Monkatu mo mwaambila, anweba nkambo mfumu, amiwa ne bintu byonse byo nji nabyo byo byenu.”+

5 Kabiji baluwe baishile jibiji ne kwamba’mba: “Benehadada waamba’mba, ‘Natumine ano mawi kwi obewa namba: “Ukampe siliva yobe, ngolode yobe, bakazhi bobe ne baana bobe.” 6 Pano bino, kesha pa kyonka kino kimye nkatuma bakalume bami kwi obewa, ne abo bakapikita bulongo mu nzubo yobe ne mu mazubo a bakalume bobe, kabiji bintu byobe byonse byo wanemeka bakakwangata ne kwibisenda.’”

7 Ponkapo mfumu wa Isalela waichile bakulumpe bonse ba mu kyalo ne kwibambila’mba: “Yukai kino amba uno muntu wakebeshatu kuleta bya malwa, mambo wankambizhe kumupa bakazhi bami, baana bami, siliva yami ne ngolode yami, ne amiwa kechi nakaine ne.” 8 Kepo bakulumpe bonse ne bantu bonse bamwambijile’mba: “Kechi mumukookele nangwa kumvwina byo emwambila ne.” 9 Onkao mambo, waambijile baluwe ba kwa Benehadada amba: “Mwibabuule bankambo bamfumu amba, ‘Byonse byo mwankambizhe kimye kitanshi amiwa kalume wenu nsakwibyuba, pakuba kino kechi nsakwikyuba ne.’” Ponkapo aba baluwe bayile ne kubwezha sawakya kwi aye.

10 Kepo Benehadada amutumijile ano mawi amba: “Kine balesa bakankambule inge maloba a mu Samaliya akakwana kupapo muntu yense ukandondela mukono umo umo!” 11 Mfumu wa Isalela waambile’mba: “Mwibabuule’mba, ‘Awa uvwala kivwalo kya nkondo kechi wafwainwa kwitota nobe yewa wikivuula ne.’”+ 12 Byo aumvwinetu bino byambo, aye ne bamfumu bakwabo byo batomenenga mu matente* abo, waambijile bakalume banji amba: “Inengezhai kwibalukuka!” Byonkabyo, benengezhezhe kulukuka muzhi.

13 Bino ngauzhi waishile kwi Ahaba+ Mfumu wa Isalela ne kwamba’mba: “Yehoba waamba’mba, ‘Nanchi wijimona jino jibumba jonse jikatampe nyi? Mbena kwijipana mu kuboko kobe lelo jino, kepo usakuyuka’mba yami Yehoba.’”+ 14 Ahaba washikishe’mba: “Musakwingijisha bañanyi?” aye wakumbwile’mba: “Yehoba waamba’mba, ‘Nsakwingijisha ba mingilo ba babinemanga ba bibunji.’” Kepo amushikishe’mba: “Bañanyi basakutendeka nkondo?” aye wamukumbwile’mba: “Yenka anweba!”

15 Kepo Ahaba abajile ba mingilo ba babinemanga ba bibunji, ne abo bajinga 232; kabiji wabajile banabalume bena Isalela bonse, nabo bajinga 7,000. 16 Bayileko pa kushinkamana juba kimye Benehadada kyo atomenenga ne kupendwa mu matente* pamo na bamfumu bakwabo 32 bamukwashishenga. 17 Ba mingilo ba babinemanga ba bibunji byo batendekejilepo kulupuka, ponkapo Benehadada watumine baluwe. Ne abo bakamubuujile’mba: “Banabalume balupuka mu Samaliya.” 18 Kepo ebambijile’mba: “Inge baiya mu mutende, mwibakwatetu bomi; nangwa inge baiya na kulwa nkondo, napotu mwibakwate bomi.” 19 Bino abano byo balupukile mu muzhi, ko kuba’mba ba mingilo ba babinemanga ba bibunji ne nzhita ibalondejilenga, 20 muntu yense watapile mulwanyi wanji. Kepo bena Silya banyemene,+ kabiji bena Isalela bebapupijile, bino Benehadada Mfumu wa Silya wanyemene pa mbili pamo na banabalume benda pa bambili. 21 Bino mfumu wa Isalela walupukile ne konauna bambili ne makalaki, kabiji washinjile* bena Silya bavula bingi.

22 Kepo ngauzhi+ aishile kwi mfumu wa Isalela ne kumwambila’mba: “Yainga mukekoseshe ne kulangulukapo bulongo pa byo mukoba,+ mambo ku ntendekelo ya mwaka* ubena kwiya, mfumu wa Silya ukeya na kulwa nenu.”+

23 Kabiji bakalume ba mfumu wa Silya bamwambijile’mba: “Lesa wabo ye Lesa wa mitumba. O ene mambo o betushinjila. Bino inge tukalwe nabo pa mushiji waesakana, tukebashinda. 24 Kabiji mube ne kino: Mwibafumyepo bamfumu bonse+ pa bifulo byabo, ne kupingizhapo ba bitumbafumu. 25 Kabiji mukonkanye* nzhita yaesakana na nzhita yaonaikile, mbili pa mbili ne kalaki pa kalaki. Kabiji tuye na kulwa nabo pa mushiji waesakana, kabiji kine tusakwibashinda.” Waumvwine byo bamubuujile ne kuba byonkabyo.

26 Ku ntendekelo ya mwaka,* Benehadada wakonkenye bena Silya ne kuya ku Afeki+ na kulwa na bena Isalela. 27 Bena Isalela nabo bakonkene kabiji bajinga na mpao, ne abo bayile na kusambakana nabo. Bena Isalela byo batebelejile kulutwe yabo, bamwekelengatu nobe tumatanga tucheche tubiji twa bambuzhi, pakuba bena Silya bakumbenetu mpunzha yonse.+ 28 Kepo muntu wa Lesa wa kine aishile kwi mfumu wa Isalela ne kumwambila’mba: “Yehoba waamba’mba, ‘Na mambo a kuba bena Silya baamba’mba: “Yehoba ye Lesa wa mitumba, kechi ye Lesa wa misanza ne,” nsakupana jino jibumba jikatampe jonse mu kuboko kobe,+ ne obewa usakuyuka’mba amiwa yami Yehoba.’”+

29 Baikele mu makampu moba atanu na abiji saka batalañana, kabiji pa juba ja butanu na bubiji nkondo yatendekele. Bena Isalela baipayile bashilikale bena Silya benda panshi 100,000 mu juba jimo. 30 Bonse bashajilepo banyemejile mu muzhi wa Afeki.+ Bino nsakwa yaponejile pa banabalume 27,000 bashajilepo. Benehadada naye wanyemejile mu muzhi ne kukafyama mu kibamba kya mukachi.

31 Kepo bakalume banji bamwambijile’mba: “Twaumvwa’mba bamfumu ba mu nzubo ya Isalela ke bamfumu baji na lusa.* Tuswishai twinyinge bisapi bya majila mu mbunda yetu ne kukasa mishipwa ku mitwe yetu kabiji tuye ku mfumu wa Isalela. Kampe usakwimuleka na bumi.”*+ 32 Onkao mambo, benyingile bisapi bya majila mu mbunda yabo ne kukasa mishipwa ku mitwe yabo ne kuya ku mfumu wa Isalela ne kumwambila’mba: “Bakalume benu ba Benehadada baamba’mba, ‘Napopwela mundeke ngikale* na bumi.’” Waambile’mba: “Nanchi ukiji mumi nyi? Aye ye mulongo wami.” 33 Bano banabalume bamwene kino amba ke kiyukilo kyawama kabiji balondejile byo aambile ne kupelawizha kwamba’mba: “Ba Benehadada balongo benu.” Ponkapo aye waambile’mba: “Yainga mukamulete.” Kepo Benehadada aishile kwi aye, kabiji wamukanjizhe mu kalaki.

34 Kepo Benehadada amwambijile’mba: “Mizhi batata yo baangachile bashobe nsakukubwezhezhayo, kabiji wakonsha kushimika bisankanyi* mu Damasakasa, byonkatu batata byo baubile mu Samaliya.”

Ahaba wamukumbwile’mba: “Na mambo a luno lulayañano, nsakukuleka uyenga.”

Byonkabyo, balayañene lulayañano* ne aye, kabiji wamuswishishe kuya.

35 Kabiji monka mwayijile byambo bya Yehoba, mwana wa bangauzhi*+ umo waambijile mukwabo amba: “Napopwela, nkozhe.” Bino aye wakaine kumukozha. 36 Onkao mambo, wamwambijile’mba: “Na mambo a kuba wakana kumvwina jiwi ja Yehoba, byo usakufumatu kwi amiwa bokwe usakukwipaya.”* Byo afuminekotu kwi aye, bokwe wamutaaine ne kumwipaya.

37 Kabiji wataaine muntu mukwabo ne kumwambila’mba: “Napopwela nkozhe.” Ne aye wamupumine ne kumukozha.

38 Kepo uno ngauzhi ayile na kupembelela mfumu ku jishinda, kabiji wafile kilungi mambo wakashile kisapi pa meso. 39 Mfumu byo apichilenga, aye wabijikile mfumu amba: “Amiwa kalume wenu nayile konka kwakosejile nkondo, kabiji kwajinga muntu waletele muntu kwi amiwa ne kuñambila’mba, ‘Sopanga uno muntu. Inge anyeme, bumi bobe busakupingakena pa bumi* bwanji,+ inge ne, usakupainamo lutalenta* umo wa siliva.’ 40 Kabiji amiwa kalume wenu byo napayankene, ponkapo uno muntu wanyemene.” Mfumu wa Isalela wamwambijile’mba: “Ne mambo obe mo mo basakwiachibila; obe mwine wichibilao.” 41 Ponkapo wafumisheko kisapi kyo akashile ku meso, kabiji mfumu wa Isalela wamuyukile’mba ke umo wa mu bangauzhi.+ 42 Wamwambijile’mba: “Yehoba waamba’mba, ‘Na mambo a kuba wapulusha muntu ye naambile’mba wafwainwa kumwipaya,+ bumi bobe bukapingakena pa bumi* bwanji+ ne bantu bobe bakapingakena pa bantu banji.’”+ 43 Ponkapo mfumu wa Isalela wayile ku nzubo ku Samaliya+ saka apopomenwa kabiji wajinga bingi na bulanda.