Nkalata ya Bubiji ku Bena Kolinda
4 Onkao mambo, byo tuji na uno mwingilo monka mwayila lusa lo betumwesheshe, kechi tubwela panyuma ne. 2 Bino atweba twakana bintu byafyamika bya bumvu, kechi twenda mu bujimbijimbi ne, kabiji kechi tuwelula mambo a Lesa ne;+ pakuba byo tumwesha bukine, tutokesha jiwi ja mu muchima ja bantu bonse konka ku meso a Lesa.+ 3 Umvwe kya kuba mambo awama o tusapwila beavweta, ko kuba’mba beavweta ku boba babena konaika, 4 mwi abo lesa wa buno bwikalo*+ wapofula michima ya babula kwitabila+ kuba’mba kyeya kya lukumo lwa mambo awama aamba pe Kilishitu aye kipasha kya Lesa,+ kibule kwibasamina.+ 5 Mambo kechi tubena kwisapwila atwe bene ne, bino tubena kusapwila pe Yesu Kilishitu amba Nkambo, kabiji atweba twi bakalume benu na mambo a Yesu. 6 Mambo Lesa ye waamba’mba: “Kyeya kisamine mu mfishi,”+ kabiji wikisamisha mu michima yetu kuba’mba kipane kyeya+ kya lukumo lwa kuyuka Lesa mu michima yetu kupichila mu kilungi kya Kilishitu.
7 Nangwa byonkabyo, tuji na kino kya buneme+ mu bipe* bya buchimba,+ kya kuba’mba bulume bwakila bwa bantu bufuma kwi Lesa, kechi kwi atweba ne.+ 8 Twazhokolokwa na makatazho apusana pusana, bino kechi twashinkilwa ne; twasusubala, bino kechi twabula pa kulupukila* ne;+ 9 tumanyikwa, bino kechi twashalatu bunke ne;+ betunyakwila panshi, bino kechi twaonaika ne.+ 10 Kimye kyonse, tuchinchika mu mibiji yetu bintu byatama bileta lufu byapichilemo Yesu,+ kuba’mba bumi bwa kwa Yesu bumwekele mu mibiji yetu. 11 Mambo atweba bomi tubena kutalañana na lufu+ na mambo a Yesu, pa kuba’mba bumi bwa Yesu bumwekele ne mu mibiji yetu ifwa. 12 Onkao mambo, lufu lwingila mwi atweba, bino bumi buji mwi anweba.
13 Mambo tuji na lwitabilo lumo monka mo kyanembelwa’mba: “Nji na lwitabilo, kyo kyo mbena kwambila”;+ ne atweba tuji na lwitabilo, kyo kyo twambila, 14 byo twayuka’mba awa wasangwile Yesu ye uketusangula byonka byo asangwile Yesu, kabiji uketufikizha atweba ne anweba pamo kwi aye.+ 15 Mambo bintu byonse byamweka na mambo a anweba, kuba’mba kuvula kwa lusa lukatampe lwa Lesa kuyengatu na kuvujilako mambo bantu bavula babena kumusanchila Lesa, onkao mambo, babena kumuletela lukumo.+
16 Onkao mambo, kechi tubwela panyuma ne, nangwa kya kuba pangye tubena konaika, pano bino mukachi babena kwitwalula ke bapya pa juba pa juba. 17 Nangwa kya kuba bya malwa* byo tupitamo bya pa kakimye kacheche kabiji byapela, bitulengela kutambula lukumo lukatampe* kabiji lwa myaka ne myaka;+ 18 kechi tutwajijila kulanguluka pa bintu bimweka ne, bino tulanguluka pa bintu bibula kumweka.+ Mambo bintu bimweka byo bya pa kakimye kacheche, pakuba bintu bibula kumweka byo bya myaka ne myaka.