Buku wa Bubiji wa Bamfumu

18 Mu mwaka wa busatu wa bukalama bwa kwa Hosheya+ mwana wa kwa Ela mfumu wa Isalela, Hezekiya+ mwana wa kwa Ahaza Mfumu+ wa Yuda mo mo aikele mfumu. 2 Wajinga na myaka ya kusemwa 25 kimye kyo aikele mfumu, kabiji walamine mu Yelusalema myaka 29. Inanji wajinga Abi* mwana wa kwa Zekaliya.+ 3 Waubilenga byaoloka ku meso a Yehoba,+ byonkatu byaubanga Davida mushakulu wanji.+ 4 Ye waonawine mapunzha atuntama,+ walalawile mashiki azhila ne kutetaula bichi bya milumbulumbu byazhila.*+ Kabiji wasansakenye ne muloolo wa mukuba Mosesa ye alengele;+ mambo kufikatu ne kyokya kimye, bena Isalela basokejilenga muloolo bya kufutumuna kabiji bamutelanga amba nkishi muloolo wa mukuba.* 5 Waketekejile mwi Yehoba+ Lesa wa Isalela; kechi kwajingapo bakwabo bamfumu ba mu Yuda balondejile pe aye bajinga nobe aye ne, nangwatu boba bajingako kala ne. 6 Wakakachijile kwi Yehoba.+ Kechi walekele kumulondela ne; walaminenga mikambizho Yehoba yo apele Mosesa. 7 Kabiji Yehoba wajinga ne aye. Konsetu ko ayilenga, waubilenga bintu na maana. Wamusatukijile mfumu wa Asilya kabiji wakaine kumwingijila.+ 8 Kabiji washinjile ne bena Filishitiya+ kukafika ne ku Gaza ne manyaunda ayo, kufuma ku kyamba kya usopa kufika ne ku muzhi* wa nsakwa yakosa.

9 Mu mwaka wa buna wa bukalama bwa Mfumu Hezekiya, mu mwaka wa butanu na bubiji wa bukalama bwa kwa Hosheya+ mwana wa kwa Ela mfumu wa Isalela, Shalamaneza Mfumu wa Asilya waishile na kulwa ne Samaliya kabiji wamuzhokolokele.+ 10 Bamushinjile+ ku mpelo ya mwaka wa busatu; mu mwaka wa butanu na umo wa bukalama bwa kwa Hezekiya, yenka wajinga mwaka wa butanu na buna wa bukalama bwa kwa Hosheya Mfumu wa bena Isalela, muzhi wa Samaliya bamushinjile. 11 Kepo mfumu wa Asilya atwajile bena Isalela mu buzha+ ku Asilya ne kwibekazha mu muzhi wa Hala ne wa Habola ku mukola wa Gozani ne mu mizhi ya bena Meda.+ 12 Kino kyamwekele na mambo a kuba kechi baumvwijile jiwi ja Yehoba Lesa wabo ne, pakuba abo batwajijile na kuzhilulula lulayañano lwanji ne bintu byonse Mosesa kalume wa Yehoba byo ebakambizhe.+ Kechi baumvwijile nangwa kukookela ne.

13 Mu mwaka wa bu 14 wa bukalama bwa Mfumu Hezekiya, Senakelibu mfumu wa Asilya+ waishile na kulukuka mizhi ya mu Yuda yonse yajinga na masakwa akosa ne kwiishinda.+ 14 Onkao mambo, Hezekiya Mfumu wa Yuda watumine mawi kwi mfumu wa Asilya ku Lakishi amba: “Yami natamisha. Fumaiko kwi amiwa, ne amiwa nkemupa byonse byo mukantongwela.” Mfumu wa Asilya watongwejile Hezekiya Mfumu wa Bayudea kupana matalenta* a siliva 300 ne matalenta a ngolode 30. 15 Onkao mambo, Hezekiya wapaine siliva yonse yajinga mu nzubo ya Yehoba ne yajinga mo balaminanga bya buneme mu nzubo* ya mfumu.+ 16 Pa kyonkakya kimye, Hezekiya Mfumu wa Yuda wafumishe* binzhilo bya ku nzubo+ ya Yehoba ne mashiki a ku bibelo o ashingileko ngolode+ ne kwiapana kwi mfumu wa Asilya.

17 Kepo mfumu wa Asilya atumine Talatani,* ne Labasalisi* ne Labashake* pamo na nzhita ikatampe kufuma ku Lakishi+ kuya kwi Mfumu Hezekiya mu Yelusalema.+ Bayile ku Yelusalema ne kukemana kwipi na mufolo wa kizhiba kya peulu, kyaikejile ku mukwakwa mukatampe wa ku bujimi bwa sendwe uchapa bivwalo.+ 18 Byo babijikile’mba mfumu alupuke, Eliakima+ mwana wa kwa Hilikiya wajinga mukulumpe wa pa nzubo* ya mfumu, ne Shebina+ munembeshi, ne Yoa mwana wa kwa Asafwa munembeshi wa mambo balupukile kuya ko baji.

19 Ponkapo Labashake wibambijile’mba: “Kamwambilai Hezekiya amba, ‘Mfumu mukatampe, mfumu wa Asilya waamba’mba: “Nanchi waketekela mu ñanyi kintu?+ 20 Obewa ubena kwamba’mba, ‘Nayuka mwa kulwila nkondo kabiji nji na bulume bwa kulwa nkondo,’ abyo ke byambo byatutu. Nanchi waketekela mwi ñanyi, byo ukeba kunsatukila?+ 21 Umvwa! Obewa waketekela kutambula bukwasho mu Ijipita+ uji nobe jitete jo bachimauna, umvwe muntu wakoselako jikamutwela mu kuboko kwanji ne kupulankana. Bino byo biji ne Felo mfumu wa Ijipita ku bonse baketekela mwi aye. 22 Pano umvwe umbuule’mba, ‘Atweba twaketekela mwi Yehoba Lesa wetu,’+ nanchi aye kechi ye mwina mapunzha atuntama ne bitapisho byakundawile Hezekiya+ byo aambijilenga ba mu Yuda ne mu Yelusalema amba, ‘Mwafwainwa kufukamanga ku kino kya kusokelapo bitapisho kiji mu Yelusalema’ nenyi?”’+ 23 Pano nakusashijila namba, ulayañane na nkambo yami mfumu wa Asilya: Amiwa nsakukupa bambili 2,000 tumone inge obewa wakonsha kutaana bantu ba kwendapo.+ 24 Pano wakonsha kushinda byepi kinemanga wakepesha pa bakalume ba nkambo yami, saka waketekela mu makalaki ne bantu benda pa bambili ba mu Ijipita? 25 Nanchi naiya na konauna ino mpunzha kwa kubula luusa kufuma kwi Yehoba nyi? Yehoba mwine ye wañambijile’mba, ‘Yanga ukalukuke kyokya kyalo ne kwikyonauna.’”

26 Ponkapo, Eliakima mwana wa kwa Hilikiya, ne Shebina,+ ne Yoa baambijile Labashake+ amba: “Twapopwela mwane, twambilai atweba bakalume benu mu mulaka wa Kialamaiki,*+ mambo twamuyuka; kange mwambenga kwi atweba mu mulaka wa Bayudea ne bantu baji pa nsakwa saka bomvwako ne.”+ 27 Pakuba Labashake wibambijile’mba: “Nanchi nkambo yami wantuma kwamba bino byambo kwi nkambo yenu ne kwi anwebatu nyi? Nanchi kechi wantuma ne ku bantu bekala pa nsakwa, bonka bakaja tuvwi twabo ne kutoma masukula abo pamo ne anweba nenyi?”

28 Kepo Labashake aimene ne kubijika mu mulaka wa Bayudea amba: “Umvwai byaamba mfumu mukatampe, mfumu wa Asilya.+ 29 Mfumu waamba’mba, ‘Kange muleke Hezekiya emujimbaike ne, mambo aye kechi wakonsha kwimupokolola mu kuboko kwami ne.+ 30 Kabiji kange muleke Hezekiya emulengele kuketekela mwi Yehoba byo abena kwamba’mba: “Kine Yehoba usakwitupokolola, ne uno muzhi kechi usakumupana mu kuboko kwa mfumu wa Asilya ne.”+ 31 Kange mumumvwine Hezekiya ne, mambo mfumu wa Asilya waamba’mba: “Mupwane ne amiwa ne kwiya kwi amiwa,* kabiji anweba bonse pa muntu pa muntu mukajanga ku miñanzañanza yenu ne ku bichi byenu bya mikuyu kabiji mukatomanga mema mu mishima* yenu, 32 poso nkeye ne kwimutwala ku kyalo kiji nobe kyalo kyenu,+ kyalo muji kajo ne binyu bya katataka, kyalo muji bashinkwa ne majimi a miñanzañanza, kyalo muji bichi bya maolivi ne buki. Kepo mukekala na bumi kabiji kechi mukafwa ne. Kange mumumvwine Hezekiya ne, mambo ubena kwimutwala mungi byo abena kwamba’mba, ‘Yehoba uketupokolola.’ 33 Nanchi kujipo balesa ba bisaka bya bantu bakipokololapo kala kyalo kyabo mu kuboko kwa mfumu wa Asilya nyi? 34 Nanchi balesa ba ku Hamata+ ne ba ku Alapada baji pi? Nga balesa ba ku Sefwabaimu,+ ne ba ku Hena, ne ba ku Iva baji pi? Nanchi bapokolwele Samaliya mu kuboko kwami nyi?+ 35 Ñanyi mu balesa bonse ba mu byalo, wakipokololapo kala kyalo kyanji mu kuboko kwami, kya kuba’mba Yehoba apokolole Yelusalema mu kuboko kwami?”’”+

36 Bino bantu bazhindaminetu nzoo kabiji kechi bamukumbwilepo ne, mambo mfumu wibakambizhe’mba, “Kange mumukumbule ne.”+ 37 Pakuba Eliakima mwana wa kwa Hilikiya, wajinga mukulumpe wa pa nzubo* ya mfumu, ne Shebina munembeshi, ne Yoa mwana wa kwa Asafwa munembeshi wa mambo baishile kwi Hezekiya saka batabula bivwalo byabo ne kumubuula byambo byaambile Labashake.