Yoba
22 Elifwaza+ mwina Temanyi wakumbwile’mba:
2 “Nanchi Lesa wakonsha kwingijisha muntu nyi?
Nanchi Lesa wakonsha kumwenamo mu muntu uji na milangwe nyi?+
3 Nanchi wa Bulume Bonse utako* muchima na mambo a kuba’mba obewa waoloka nyi?
Nangwa umwenamo kintu na mambo a kuba’mba wi wa kishinka nyi?+
4 Nanchi aye wakonsha kukukabisha
Ne kuya ne obewa mu kije na mambo a kuba umwakamwa nyi?
5 Nanchi bubi bobe kechi bwabayisha nenyi?
Kabiji obewa kechi ukaleka kulenga mambo nenyi?+
6 Mambo ukwachilamo bintu byo wangata balongo bobe mu lunkanankana,
7 Kechi upapo mema muntu wakooka ne,
Kabiji utana kajo muntu wafwa nzala.+
8 Ntanda ya muntu uji na bulume,+
Kabiji muntu waubilwa bibusa ye wikalamo.
9 Wapanga banabakazhi bafwilwa mabokotu,
Kabiji wasansakanya maboko a baana babula bashabo.*
10 O ene mambo bitewa*+ o byakuzhokolokela,
Ne bintu bileta moyo o byakunzakamishisha;
11 O ene mambo o kwaikela mfishi yafiitatu bwii kya kuba wakankalwa kumona,
Ne muyulo wa mema wakulobesha.
12 Nanchi Lesa kechi uji mwiulu mwine nenyi?
Kabiji tala, tubangabanga tonse byo tuji kwalepesha.
13 Bino obewa washikisha’mba: ‘Ñanyi kintu Lesa kyo ayuka?
Abya wakonsha kuchiba mambo byo kuji mfishi ikatampe nyi?
14 Makumbi a muzhika kuba’mba abule kumona
Byo apitañana peulu* ya jiulu.’
15 Nanchi ukendanga mu jishinda ja kala
Mwaendanga bantu babi,
16 Bantu bo basendele* ku lufu kimye kyabo saka kikyangye kufika,
17 Baambijilenga Lesa wa kine amba: ‘Tulekai bunke bwetu!’
‘Ñanyi kintu kyakonsha kwituba wa Bulume Bonse?’
18 Bino, aye ye wayuzhizhe mazubo abo na bintu byawama.
(Amiwa kechi ñumvwañana na babi ne.)
19 Baoloka bakamonako lonaiko lwabo ne abo bakasangalala,
Ne bantu babula mambo bakebendelekanga ne kwamba’mba:
20 ‘Balwanyi betu baonaika,
Kabiji mujilo ukasoka bintu byabo byo bakasha.’
21 Yuka Lesa, kabiji ukekala mu mutende;
Kepo ukamona bintu byawama.
22 Swa mizhilo ifuma mu kanwa kanji,
Ne kulama byambo byanji mu muchima wobe.+
23 Umvwe ubwele ku wa Bulume Bonse, ukakubwezha byo wajinga kala;+
Umvwe ufumye bintu byatama mu tente wobe,
24 Kabiji umvwe wataya ngolode* mu lukungu
Ne ngolode ya ku Ofila+ wiitule mu kinkunenke* kiji na mabwe,
25 Wa Bulume Bonse po po akekala ngolode* yobe,
Kabiji ukekala ke jibwe jobe ja siliva jawamisha.
26 Kepo ukasekelanga mu wa Bulume Bonse,
Kabiji ukenuna kilungi kyobe kwi Lesa.
27 Ukamusashijila, ne aye ukakumvwa;
Kabiji ukafikizha luchipo lobe.
28 Kintu kyonse kyo ukakeba kuba, ukekyuba,
Ne kyeya kikasamina mu jishinda jobe.
29 Mambo obewa bakakupelula umvwe waamba na bwitote,
Pakuba aye ukapulusha bantu bepelula.*
30 Aye ukapokolola aba babula mambo;
Onkao mambo, umvwe maboko obe atoka, kine bakakupokolola.”