Byubilo bya Batumwa
17 Byo bapichile mu Amafipolisa ne mu Apolonya bafikile ku Tesalonika+ kwajinga nshinagoga ya Bayudea. 2 Monka mo aubilanga kimye kyonse,+ Paulo watwelele mo bajinga, kabiji pa moba a sabado asatu wisambilenga nabo pa Binembelo,+ 3 saka ebalumbulwila ne kwibashiina na binembelo amba kyamufwainwe Kilishitu kumanama+ ne kusanguka mu bafu,+ ne kwamba’mba: “Uno ye Kilishitu, uno Yesu yenka ye mbena kwimusapwila.” 4 Ponkapo bamo baitabijile ne kupwanañana na Paulo ne Silasa,+ ne jibumba jikatampe ja Bangiliki bapopwelanga Lesa, ne banabakazhi bashiñama nabo baitabijile.
5 Bino Bayudea byo baubile kichima,+ bakonkenye pamo bantu babi balulumbanga mu kisankanyi ne kulenga kiombe kya bantu kabiji babushishe kiwowo kikatampe mu muzhi. Balukukile nzubo ya kwa Yasona kuba’mba balupulemo Paulo ne Silasa ne kwibaleta ku kiombe kya bantu. 6 Byo babujile kwibataanamo, bamukulumwinemo Yasona ne balongo bamo ne kwibatwala ku bakulumpe ba mu muzhi ne kwamba’mba: “Bano bantu bakuvumika* ntanda baji ne kuno,+ 7 kabiji Yasona wibatambwila. Bano bantu bonse balengulula mizhilo ya kwa Kesala amba kafwako mfumu mukwabo ne, kanatu Yesu.”+ 8 Byo baumvwine bino bintu, bantu ne bakulumpe ba mu muzhi baubile bingi moyo; 9 kabiji Yasona ne bo ajinga nabo byo bapaineko mali a kwibakasulwilamo, bebalekele amba bayenga.
10 Ponkapo balongo batumine Paulo ne Silasa bufuku ku Beliya. Byo bafikile, batwelele mu nshinagoga ya Bayudea. 11 Bano bena Beliya bakebeshenga bingi kufunda kukila bena Tesalonika, mambo abo batambwijile mambo a Lesa na muchima yense ne kubalaula bulongo Binembelo moba onse kuba’mba bayuke kana bino bintu bya kine nangwa ne. 12 Onkao mambo, bantu bavula baitabijile, kabiji banabakazhi bamo bashiñama Bangiliki ne banabalume nabo baitabijile. 13 Bino Bayudea bajinga mu Tesalonika byo baumvwine’mba Paulo ubena kusapwila mambo a Lesa mu Beliya, bayileko na kutundaika ne kuvulumuna mabumba amba bebalukilemo.+ 14 Ponkapotu balongo bamunyemeshe Paulo ku kalunga ka mema,+ bino Silasa ne Timoti bakishajile konka. 15 Nangwa byonkabyo, aba bashinjikinyengako Paulo bamufikizhe ku Atene, kabiji bano balongo bafumineko byo bebakambizhe’mba bakabuule Silasa ne Timoti+ kwiya bukiji kwi Paulo.
16 Paulo byo akibapembejilenga mu Atene, kyamukolele bingi ku muchima pa kumona muzhi byo ayujile na bankishi. 17 Onkao mambo, watendekele kwisamba na Bayudea mu nshinagoga ne bantu bakwabo bapopwelanga Lesa, kabiji pa juba pa juba wisambanga na boba batanwanga pa kisankanyi. 18 Bino bantemwamaana bamo bena Epikyulya ne bena Sitoiki bepachikilenga ne Paulo, bamo baambilenga’mba: “Nga uno kyabauki, ñanyi kintu kyo asakwitubuula?” Bakwabo nabo baambilenga’mba: “Uji nobe musapwishi wa balesa bangi.” Baambile bino na mambo a kuba wasapwijilenga mambo awama aamba pe Yesu ne pa lusanguko.+ 19 Onkao mambo, bamukwachile ne kumutwala ku Aleopagusa ne kwamba’mba: “Tubuule mwatala luno lufunjisho lwa katataka lo ubena kufunjisha. 20 Mambo ubena kufunjisha bintu byo tukyangye kumvwapo, onkao mambo, tubena kukeba’mba witubuule mwatala bino bintu.” 21 Bena Atene bonse ne bantu bafumine mu byalo bingi baikalangamo, mu kimye kyabo kya kukokoloka bashimikizhanga nangwa kuteleka ku bintu bya katataka. 22 Ponkapo Paulo waimene pakachi ka Aleopagusa+ ne kwamba’mba:
“Anweba bena Atene, namona kuba’mba mu bintu byonse mwakamwa balesa* kukila byuba bantu bakwabo.+ 23 Byo nabapitenga ne kumona bintu byo munemeka,* naji kutaana kya kusokelapo bitapisho panembwa’mba, ‘Kwi Lesa Wabula Kuyukanyikwa.’ Onkao mambo, Lesa yenka ye mubena kupopwela ye mwabula kuyuka, ye ye mbena kwimusapwila. 24 Lesa walengele ntanda ne byonse bijimo, aye ye Nkambo wa mwiulu ne pano pa ntanda,+ kechi wikala mu mazubo ashimikwa na maboko a bantu ne;+ 25 kabiji kechi ukeba kumwingijila na maboko a bantu uba nobe paji kyo akajilwa ne,+ mambo aye ye upa bantu bonse bumi, muya+ ne bintu byonse. 26 Kabiji ku muntu umo+ ko ko alengele bisaka byonse bya bantu kuba’mba bikale pano pa ntanda ponse,+ kabiji watongwele bimye ne kuchiba mipaka mwafwainwa kwikala bantu,+ 27 kuba’mba bamukebe Lesa, inge bakonsha kupapata ne kumutaana,+ nangwa kya kuba kechi uji kwalepa ne atweba bonse ne. 28 Mambo aye ye ulengela’mba twikale na bumi ne kwenda, monka mwayila byambo byo mwamba bya kuba’mba, ‘Mambo ne atweba twi baana banji.’
29 “Onkao mambo, byo tuji baana ba Lesa,+ kechi twafwainwa kulangulukanga’mba, Lesa uji nobe ngolode nangwa siliva nangwa jibwe, nangwa nobe kintu kyo basonga na maana a bantu ne.+ 30 Kya kine, Lesa wikivulamako kimye bantu kyo bajinga mu bulubi;+ pano bino ubena kubuula bantu bonse konse konse kuba’mba bafwainwa kulapila. 31 Mambo aye watongola juba jo akebachibilamo mambo+ ba pano pa ntanda mu bololoke kupichila mu muntu ye atongola, kabiji wapana kishiino ku bantu bonse kupichila mu kumusangula mu bafu.”+
32 Byo baumvwine pa mambo a lusanguko lwa bafu, bamo batendekele kumwendeleka,+ bakwabo baambilenga’mba: “Tukemuteleka ne pa kimye kikwabo.” 33 Onkao mambo, Paulo wibashile, 34 bino banabalume bamo bakwatankene nanji ne kwitabila. Pa bano baitabijile pajinga Dionisiusa, mutonyi wa mu kije kya Aleopagusa, ne mwanamukazhi wa jizhina ja Damalisa, ne bantutu bakwabo.