Yelemiya

42 Ponkapo bakulumpe ba bashilikale bonse ne Yohanana+ mwana wa kwa Kalea, Yezaniya mwana wa kwa Hoshaya ne bantu bonse kutendekela ku bayanji kufika ne ku babinemanga baishile 2 ne kwambila ngauzhi Yelemiya amba: “Umvwai, bintu byo tubena kukeba kabiji mwitulombeleko kwi Yehoba Lesa wenu atweba ne bano bantu bonse bashalapo, mambo pashalatu bantu bacheche+ byonka byo mwamona. 3 Yehoba Lesa wenu etubuule jishinda jo twafwainwa kuyamo ne bintu byo twafwainwa kuba.”

4 Ngauzhi Yelemiya wibakumbwile’mba: “Naumvwa byo mwaamba, kabiji mbena kwimulombelako kwi Yehoba Lesa wenu kwesakana na bintu byo mwalomba; ne bintu byonse bisakwamba Yehoba nsakwimubuulabyo. Kechi nsakwimufyapo kintu nangwa kimo ne.”

5 Abo baambijile Yelemiya amba: “Yehoba ekale kamonyi wetu wa kine kabiji wa kishinka inge twabula kuba bintu Yehoba Lesa wobe byo etukambizha kuba kupichila mwi obewa. 6 Nangwa akambe bintu byawama nangwa byatama biketumwekela, atweba tukakookela byamba Yehoba Lesa wetu ye tubena kukutumako, kuba’mba bintu biketuwamine na mambo a kuba tukakookela byamba Yehoba Lesa wetu.”

7 Byo papichile moba jikumi, Yehoba wisambile ne Yelemiya. 8 Onkao mambo, waichile Yohanana mwana wa kwa Kalea ne bakulumpe ba bashilikale bonse bo ajinga nabo ne bantu bonse kutendekela ku bayanji kufika ne ku babinemanga.+ 9 Wibabuujile’mba: “Yehoba Lesa wa Isalela ye mwantumineko kuba’mba nemulombeleko bintu byo mwakebelenga, waamba’mba: 10 ‘Umvwe mushale mu kino kyalo, amiwa nkemushimika bino kechi nkemukundula ne; nkemujimba bino kechi nkemutupula ne, mambo amiwa nkelangulusha* na mambo a bya malwa byo nemuletela.+ 11 Kange mube moyo na mambo a mfumu wa Babilona yenka ye muchina ne.’+

“Yehoba waamba’mba, ‘Kange mumuchine ne, mambo amiwa nji nenu kabiji nkemupulusha ne kwimupokolola mu kuboko kwanji. 12 Kabiji nkemubila lusa,+ ne aye ukemubila lusa ne kwimubwezha mu kyalo kyenu.

13 “‘Pano bino, inge mwakana’mba, “Atweba kechi tusakushala mu kino kyalo ne!” kabiji mwalengulula byaamba Yehoba Lesa wenu 14 ne kwamba’mba, “Atweba tusakuya ku kyalo kya Ijipita+ ko tukabula kumona nkondo, kumvwa kuvuma kwa lusengo nangwa kufwa nzala; akwa ko ko tukekala,” 15 pano anweba mwashalapo mu Yuda mumvwe byaamba Yehoba. Yehoba wa mabumba, Lesa wa Isalela waamba’mba: “Umvwe kine mwakebesha kuya ku Ijipita ne kukekala* konka, 16 ko kuba’mba mpoko yonka yo muchina ikemutaana monka mu kyalo kya Ijipita, ne kipowe kya nzala kyo muchina nakyo kikemulondela ku Ijipita kabiji mukafwila konkakwa.+ 17 Kabiji bantu bonse bakebesha kuya ku Ijipita na kwikala konka bakafwa ku mpoko, ku kipowe kya nzala ne ku mwalo.* Kafwako muntu nangwa umo ukapuluka nangwa kunyema bya malwa byo nkebaletela ne.”’

18 “Mambo Yehoba wa mabumba, Lesa wa Isalela waamba’mba: ‘Byonkatu byo nazhingijile ne kubuukila bukaji bangikazhi ba mu Yelusalema,+ byo byo nkemuzhingijila ne anweba inge mwaya ku Ijipita. Kabiji mukafingwa, mukalengela bantu kukankamana, bakemuba mwenga+ kabiji ino mpunzha kechi mukeimonapo jibiji ne.’

19 “Yehoba wimukanya anweba bashalapo mu Yuda. Kange muye ku Ijipita ne. Umvwai, mbena kwimujimunako lelo jino namba 20 bubi bwenu bukemwipaisha. Mambo anweba mwantumine kwi Yehoba Lesa wenu amba, ‘Tulombeleko kwi Yehoba Lesa wetu ne kwitubuula bintu byonse byaamba Yehoba Lesa wetu kabiji amba tusakwibyuba.’+ 21 Kabiji lelo mbena kwimubuula bino byambo, bino kechi musakukookela byaamba Yehoba Lesa wenu nangwa kuba bintu byo antuma kuba’mba nemubuule ne.+ 22 Onkao mambo, yukai kuba’mba kine mukafwa ku mpoko, ku kipowe kya nzala ne ku mwalo mu yonkaya mpunzha yo mwakebesha kuya na kwikalamo.”+