Ezikyo
28 Yehoba wañambijile jikwabo amba: 2 “Obewa mwana muntu, ambila ntangi wa bena Tila amba, ‘Nkambo Mfumu Yehoba waamba’mba:
“Na mambo a kwitota,+ obewa wamba’mba, ‘Amiwa yami lesa.
Naikala pa jitanda ja lesa pakachi ka kalunga ka mema.’+
Pano bino, kechi wi lesa ne, wi muntutu
Nangwa kya kuba mu muchima wobe ulanguluka’mba wi lesa.
3 Tala! Obewa wimona kwikala na maana kukila Danyela.+
Ulanguluka’mba kafwako kintu nangwa kimo kyafyamika kwi obewa ne.
4 Winonkesha obe mwine na mambo a maana ne milangwe yobe,
Kabiji watwajijila kuyuzha ngolode ne siliva mo ulamina nsabo yobe.+
5 Kuyuka bulongo bya kuba busulu kwakulengejile kunonka bingi,+
Kabiji witotelenga na mambo a bunonshi bobe.”’
6 “‘Onkao mambo, Nkambo Mfumu Yehoba waamba’mba:
“Na mambo a kulanguluka’mba, wi lesa,
7 Amiwa mbena kukuletela bantu bafuma ku kyalo kingi ba kukulukuka, ko kuba’mba bisaka bya bantu byakilamo kukanama,+
Bakasomona mapoko abo ne konauna bintu byawama byo waikele nabyo na mambo a maana obe
Kabiji nkakulengulwisha ku bantu.+
9 Nanchi ukatwajijila kwamba ku yewa ukakwipaya amba, ‘Amiwa yami lesa’ nyi?
Ku boba bakakulengulula, ukekala muntutu kechi lesa ne.”’
10 “Nkambo Mfumu Yehoba waamba’mba, ‘Bakakwipaya ku bantu bangi byonkatu byo bepaya bantu babula kuya ku mukanda,
Mambo amiwa yami naamba.’”
11 Kabiji Yehoba wañambijile jikwabo amba: 12 “Obewa mwana muntu, imba lwimbo wa bulanda* pa mambo a mfumu wa Tila ne kumwambila’mba, ‘Nkambo Mfumu Yehoba waamba’mba:
13 Obewa waikelenga mu Edena, bujimi bwa Lesa.
Bakuvwikile mabwe a buneme apusana pusana
Ko kuba’mba a lubi, topaze ne yasipa;
Kisolite, onika ne Jedi; safila, takozi+ ne emalode;
Kabiji bintu byo basokekelemo ano mabwe bebilengele na ngolode.
Beanengezhezhe juba jo bakulengele.
14 Nakutongwele kwikala kelubi ye bashinga manyi wa kuzhikijila bintu.
Waikelenga pa mutumba wazhila wa Lesa+ kabiji waendanga pa mabwe a mujilo.
15 Byo nakulengele waubanga bintu byaoloka
Kufikatu ne kimye kyo watatwile kuba bintu byabula koloka.+
Onkao mambo, obewa kelubi uzhikijila bintu, nkakufumya pa mutumba wa Lesa nobe kintu kya bunya kabiji nkakonauna,+
Ne kukulekesha kwenda pa mabwe a mujilo.
17 Buya bobe bwakulengejile kwitota.+
Na mambo a kukeba kunemekwa, waingijishe maana obe kubilamo bintu byatama.+
Amiwa nkakutaya panshi.+
Ne bamfumu bakasakisha bingi kukumona.
18 Na mambo a kuzhatwa na mambo ne kubula bukishinka mu busulu bobe, wazhilulula mapunzha obe azhila.
Nkakwambwila mujilo kabiji ukakusoka.+
Nkakulengela kwikala ke butotu pano pa ntanda ne bantu bonse saka bakutala.
19 Bantu bonse bakuyukile, bakakutala ne kukumya bingi.+
Ukafwa lufu lwatama lwa kubazhimukilatu,
Kabiji kechi ukekalako jibiji ne.”’”+
20 Kabiji Yehoba wañambijile jikwabo amba: 21 “Obewa mwana muntu, tala ku muzhi wa Shidona+ kabiji waule bintu bikamumwekela. 22 Ukambe’mba, ‘Nkambo Mfumu Yehoba waamba’mba:
“Nakuzhingijila obewa muzhi wa Shidona, kabiji nkatumbijikwa mwi obewa;
Kabiji bantu bakayuka’mba amiwa yami Yehoba byo nkakukambula ne kuzhijikwa mwi obewa.
23 Nkakutumina mwalo kabiji bakechila mashi a bantu mu mikwakwa yobe.
Bantu bobe bakafwa kimye mpoko kyo ikeya pe obewa kufuma konse konse;
Kabiji bantu po po bakayuka’mba amiwa yami Yehoba.+
24 “‘“Kabiji kisaka kya Isalela kechi bakekizhokolokapo jibiji ku miba ya mikutankwaji ne mibatu ikwabo yasañana ne,+ ko kuba’mba aba bebendeleka; kabiji bantu po po bakayuka’mba amiwa yami Nkambo Mfumu Yehoba.”’
25 “‘Nkambo Mfumu Yehoba waamba’mba: “Byo nkakonkanya jibiji bena Isalela kufuma mu mitundu ya bantu mo bapalañenejile,+ nkatumbijikwa mwi abo ku bisaka bya bantu.+ Kabiji bakekala mu kyalo kyabo+ kyo napaine kwi kalume wami Yakoba.+ 26 Bakekalanga mu kyalo mu mutende,+ bakashimika mazubo, bakajimba miñanzañanza+ kabiji bakekala ku matwi nzoo byo nkakambula bantu bonse bebendeleka;+ kabiji po po bakayuka’mba amiwa yami Yehoba Lesa wabo.”’”