Amosi
7 Nkambo Mfumu Yehoba wammwesheshe bino: Watumine nzhiye kimye kajo kapelako* kyo katendekele kumena. Kano kajinga kajo kapelako byo bapwishishe kuyokola nsono ya mfumu ya kujiisha banyama. 2 Nzhiye byo yapwishishe kuja bijimwa bya mu kyalo, naambile’mba: “Anweba Nkambo Mfumu Yehoba, napopwela balekelaiko mambo!+ Yakoba wakonsha kupuluka* byepi? Mambo aye kechi wakosa ne!”+
3 Onkao mambo, Yehoba walangulukilepo* pa kino.+ Yehoba waambile’mba: “Kechi kikobiwa ne.”
4 Nkambo Mfumu Yehoba wammwesheshe bino: Nkambo Mfumu Yehoba wibakambwile na mujilo. Kabiji waumishe mema avula, ne kusoka lubaji lumo lwa kyalo. 5 Kepo naambile’mba: “Anweba Nkambo Mfumu Yehoba, napopwela kange mube kino ne.+ Yakoba wakonsha kupuluka* byepi? Mambo aye kechi wakosa ne!”+
6 Onkao mambo, Yehoba walangulukilepo* pa kino.+ Nkambo Mfumu Yehoba waambile’mba: “Kino nakyo kechi kikobiwa ne.”
7 Akino kyokyo ammwesheshe: Yehoba waimene pa lubumbulu ye bashimikile na lutambo wa kolwelako, kabiji wajinga na lutambo wa kolwelako mu kuboko kwanji. 8 Kepo Yehoba angipwizhe’mba: “Amosi, wamona ka?” Ne amiwa nakumbwile’mba: “Namona lutambo wa kolwelako.” Kepo Yehoba aambile’mba: “Mbena kupima bantu bami bena Isalela na uno lutambo. Kechi nkebalekelako mambo ne.+ 9 Mapunzha atuntama a kwa Izaka+ bakeonauna, ne mazubo azhila a kwa Isalela bakeapalañanya;+ kabiji nkeya na kulwisha ba mu nzubo ya kwa Yeloboma na mpoko.”+
10 Amaziya ñanga wa ku Betele+ watumine ano mawi kwi Yeloboma Mfumu+ wa Isalela amba: “Monka mukachi ka bena Isalela,+ Amosi ubena kulanguluka kwimuba kyatama. Kabiji bantu kechi basekelamo mu byambo byanji byonse ne.+ 11 Mambo Amosi waamba’mba, ‘Yeloboma bakamwipaya na mpoko, ne Isalela kine ukaya mu buzha kufuma mu kyalo kyanji.’”+
12 Kepo Amaziya aambijile Amosi amba: “Obewa umona bimwesho, yanga, nyemena ku kyalo kya Yuda, ukatambulenga kajo* kobe konkakwa, kabiji ukawilenga konkakwa.+ 13 Bino kechi wafwainwa kwaulanga mu Betele ne,+ mambo yo nzubo yazhila ya mfumu+ kabiji jo jilapa ja bufumu.”
14 Kepo Amosi aambijile Amaziya amba: “Amiwa kechi najinga ngauzhi ne, kabiji kechi nemwana wa ngauzhi ne; bino najinga kafunga,+ kabiji nawamishanga bichi bya mikuyu. 15 Bino Yehoba wamfumishe ku mwingilo wa kufunga jitanga, kabiji Yehoba wañambijile’mba, ‘Yanga ukaule ku bantu bami bena Isalela.’+ 16 Pano umvwa byaamba Yehoba: ‘Obewa ubena kwamba’mba, “Kange waule pe Isalela ne,+ kabiji kange usapwile+ byatama pa ba mu nzubo ya kwa Izaka ne.” 17 Onkao mambo, Yehoba waamba’mba: “Mukazhobe ukekala ke pite mu muzhi, kabiji baana bobe ba balume ne baana bobe ba bakazhi bakafwa ku mpoko. Mpunzha yobe bakeyabana na lutambo wa kupiminako, ne obewa mwine ukafwila mu kyalo kyo bazhilulula; kabiji Isalela kine bakamutwala mu buzha kufuma mu kyalo kyanji.”’”+