Byubilo bya Batumwa
14 Paulo ne Banabasa byo bafikile mu Ikonyuma, batwelele mu nshinagoga ya Bayudea ne kwamba mu jishinda jalengejile jibumba jikatampe ja Bayudea ne Bangiliki kwitabila. 2 Bino Bayudea babujile kwitabila, balengejile bantu ba mu bisaka bya bantu kwalukilamo balongo.+ 3 Onkao mambo, baikeleko kimye kyabaya kokwa saka bamba na kuchinchika na luusa lwibapele Yehoba,* yenka washimwine byambo bya lusa lwanji lukatampe kupichila mu kwibaswisha kuba biyukilo ne bya kukumya.*+ 4 Nangwa byonkabyo, bantu bavula mu yewa muzhi baabenejilemo; bamo bakebelengako Bayudea, bakwabo bakebelengako batumwa. 5 Bantu ba mu bisaka bya bantu ne Bayudea pamo ne bantangi babo, byo bakebelenga kwibamanyika ne kwibasa mabwe,+ 6 bebabuujile pa mambo a kino, ne abo banyemejile ku mizhi ya Likonya, Lisitila, Delebe ne mizhi yajinga pepi.+ 7 Akwa basapwijilenga mambo awama.
8 Mu Lisitila mwajinga mwanamulume waikele panshi walemene maulu. Aye wasemekelwetu saka alemana kabiji kechi waendelepo ne. 9 Uno muntu watelekelenga ku byaambilenga Paulo. Paulo byo amutajishe ne kumona’mba uji na lwitabilo lwa kuba’mba usakubukwa,+ 10 waambile na jiwi ja peulu amba: “Imana.” Ponkapo uno muntu wakilaukile ne kutatula kwenda.+ 11 Mabumba byo amwene kino kintu kyaubile Paulo, abijikile mu Mulaka wa Likonya amba: “Balesa baaluka ke bantu kabiji betwikijila!”+ 12 Batatwile kutela Banabasa amba Zuse, ne Paulo amba Helimesa, mambo Paulo ye waambanga javula. 13 Kabiji ñanga wa kwa Zuse, wajinga na nzubo yo bamupopwelangamo yatajile ku muzhi, waletele ku kibelo bañombe balume ne minchinya ya maluba ne kukeba kutapisha bitapisho pamo na mabumba.
14 Nangwa byonkabyo, batumwa abo ba Banabasa ne Paulo byo baumvwine kino, batabwile bivwalo byabo ne kuswatukila mu jibumba ne kwamba na jiwi ja peulu amba: 15 “Anweba bakwetu, mambo ka o mubena kubila bino bintu? Ne atweba twi bantutu byonka byo muji.+ Tubena kwimusapwila mambo awama kuba’mba mufumeko ku bino bintu byatu ne kwalulukila kwi Lesa mumi, walengele jiulu ne ntanda ne kalunga ka mema ne byonse bijimo.+ 16 Mu bisemi bya kala, Lesa waswishishe bisaka bya bantu kuya mu mashinda abyo,+ 17 nangwa kya kuba kechi waikeletu kwa kubula kwiyukisha aye mwine kwi anweba ne,+ waubile byawama kupichila mu kwimupa mvula ne kimye kipilamo kajo+ saka emupa kajo kavula ne kulengela michima yenu kusangalala.”+ 18 Nangwa kya kuba baambile bino, kibakatezhe bingi kukanya bantu kutapisha bitapisho kwi abo.
19 Bino Bayudea bafumine ku Antioka ne ku Ikonyuma, baitabishe mabumba,+ kabiji Paulo bamwashile mabwe ne kumukululwila pangye ya muzhi, kabiji balangulukile’mba wafwa.+ 20 Nangwa byonkabyo, baana banji ba bwanga byo bamuzhokolokele, wabuukilepo ne kutwela mu muzhi. Juba jalondejilepo aye ne Banabasa bafumineko ne kuya ku Delebe.+ 21 Byo basapwijile mambo awama mu yewa muzhi ne kukwasha bantu bamo kwikala baana ba bwanga, babwelele ku Lisitila, Ikonyuma ne ku Antioka. 22 Akwa bakoseshenga baana ba bwanga+ ne kwibatundaika kukosela mu lwitabilo ne kwamba’mba: “Pa kutwela mu Bufumu bwa Lesa, twafwainwa kupita mu bya malwa byavula.”+ 23 Kabiji bebatongwejile bakulumpe mu kipwilo kimo kimo,+ saka bazhikilwa na nzala ne kulomba,+ kabiji bebapaine kwi Yehoba* yenka ye baitabijile.
24 Kepo bakapichile mu Pisidya kukafika ne ku Pamifilya,+ 25 kabiji byo basapwijile mambo a Lesa mu Pelega, bayile ku Atalya. 26 Byo bafumineko bayile na bwato ku Antioka, ko bebalombejileko ku balongo amba Lesa ebamweshe lusa lukatampe pa mwingilo ye baingijile.+
27 Byo bafikile ne kukonkanya pamo kipwilo, bashimikizhe bintu byavula Lesa byo aubile kupichila mwi abo, ne kuba’mba Lesa washinkwila bisaka bya bantu kibelo kya lwitabilo.+ 28 Onkao mambo, baikeleko moba amo na baana ba bwanga.