Ku Bena Loma
11 Nanchi Lesa wakaine bantu banji nyi?+ Ine! Mambo ne amiwa nemwina Isalela wa mu baana* ba kwa Abalahama, ne wa mu mukoka wa bena Benjamina. 2 Lesa kechi wakaine bantu banji bo ayukijile jimo ne.+ Nanchi kechi mwayuka kinembelo byo kyaamba pe Elaija byo asashijile Lesa na mambo a bena Isalela nenyi? amba, 3 “Yehoba,* baipaya bangauzhi benu, bakundula bya kusokelapo bitapisho byenu, yami yenka nashalapo kabiji babena kukeba konauna ne bumi* bwami.”+ 4 Bino Lesa wamwambijile’mba ka? Wamwambijile’mba, “Nashamo banabalume 7,000 bonka babula kufukaminapo Baela.”+ 5 Byonkabyo, ne pa kino kimye kuji bashalapo,+ bonka bo asala Lesa monka mwayila lusa lwanji lukatampe. 6 Umvwe kusalwa kwaimena pa lusa lukatampe lwa Lesa,+ ko kuba’mba kechi kwaimena pa mingilo ne;+ mambo umvwe kyajinga bino, inge lusa lukatampe lwa Lesa lwaaluka ke lwatu.
7 Pano tusakwamba’mba ka? Kintu kyo babena kukebesha bena Isalela, kechi bekitambwile ne, bino aba bo asala bo bekitambwile.+ Bakwabo bashajilepo bebalekele’mba bakoseshe michima yabo,+ 8 Byonkatu byo kyanembwa’mba: “Lesa wibalengejile kulaala tulo tukatampe,+ wibapele meso abula kumona ne matwi abula kumvwa, kufikatu ne lelo jino.”+ 9 Kabiji Davida naye waambile’mba: “Tebulu wabo ekale kitewa, kakose, kintu kya kwituntulako ne kya kwibaletela malwa. 10 Lengelai meso abo kufiita kuba’mba babule kumona, kabiji kimye kyonse bendenga saka babandama.”+
11 Nanchi kino kibena kulumbulula’mba betuntwile kya kuba’mba babule kubuukapo nyi? Ine! Bino kuzhilulula mizhilo kwabo kwalengela bantu ba mu bisaka bya bantu kupuluka, kuba’mba bebazhingijishe.+ 12 Umvwe kya kuba kuzhilulula mizhilo kwabo kwaletela bibusa ba pano pa ntanda kabiji kukepelako kwabo nako kwaletela bibusa bantu ba mu bisaka bya bantu,+ ko kuba’mba bibusa byabo bikakilapo kuvula na mambo a kuvula kwabo!
13 Pano mbena kwamba kwi anweba ba mu bisaka bya bantu. Byo nji mutumwa wa ku bisaka bya bantu,+ ntumbijika* mwingilo wami,+ 14 kuba’mba mmone kana nakonsha kuzhingijisha balongo* bami ne kupulushapo bamo. 15 Mambo umvwe kya kuba kwibataya+ kwalengejile ba pano pa ntanda kupwana ne Lesa, nanchi kwibabwezha kechi kukalumbulula’mba baikala na bumi jibiji kufuma mu bafu nenyi? 16 Kabiji umvwe lubaji lumo lwa muvuba belusenda kwikala nsomo yazhila, ko kuba’mba muvuba yense wazhila; kabiji umvwe muzhazhi wazhila, ne misampi nayo yazhila.
17 Nangwa byonkabyo, umvwe misampi imo beikopweleko, ne anweba nangwa kya kuba mwi kichi kya maolivi kya mungye bemunungakenyeko kwi ayo ne kumwenamo mu bibusa bya muzhazhi wa kichi kya maolivi, 18 kange mwitotenga ku misampi ne. Umvwe ke mwitote pe ayo,+ yukai’mba kechi yenu mulama muzhazhi ne, bino muzhazhi ye wimulama. 19 Pano musakwamba’mba: “Misampi beikopweleko kuba’mba banungakanyeko amiwa.”+ 20 Kino kya kine! Na mambo a kuba kechi bajinga na lwitabilo ne, bebakopweleko,+ bino anweba mwatwajijila kwikala bino na mambo a lwitabilo.+ Kange mwilundumikenga ne, bino akamwainga. 21 Mambo Lesa inge kechi walekele misampi yine ne, ne anweba kechi ukemuleka ne. 22 Onkao mambo, langulukai pa lusa lwa Lesa+ ne pa bukaji bwanji. Lesa ukambula bantu bapona,+ bino anweba wimubila lusa, inge mwatwajijila kwikala mu lusa lwanji; mambo inge ne, ne anweba bakemukopolako. 23 Ne abotu, umvwe batatula kwikala na lwitabilo, bakebanungakanyako jibiji,+ mambo Lesa wakonsha kwibanungakanyako jibiji. 24 Umvwe kya kuba bemukopweleko ku kichi kya maolivi kya mungye ne kwimunungakanya ku kichi kya maolivi kya kujimba, nangwa kya kuba kechi kyayilamo kuba kino ne, ko kuba’mba kikapela bingi misampi ine kwiinungakanya jibiji ku kichi kyayo kya maolivi!
25 Balongo bami, mbena kukeba namba muyuke kino kyafyamika kyazhila,+ kuba’mba mubulenga kulanguluka’mba mwayuka bintu byonse: Bena Isalela bamo bakatwajijila kukana kufikatu ne kimye kuvula kwa bantu ba mu bisaka bya bantu bo asala Lesa byo kukafikilamo, 26 kabiji mu jonka jino jishinda bena Isalela bonse+ mo mo bakapulukila. Byonkatu byo kyanembwa’mba: “Mupokolweshi* ukafuma mu Ziona+ ne kulengela baana ba kwa Yakoba kuleka byubilo byatama. 27 Luno lo lulayañano lwami lo nalayañana nabo,+ byo nkafumyapo bubi bwabo.”+ 28 Kine na mambo a mambo awama, abo baikala ke balwanyi na mambo a anweba; bino na mambo a kusala kwa Lesa, abo bebatemwa na mambo a bashakulu babo.+ 29 Mambo bya bupe ne lwito lwa Lesa kechi bintu byo akonsha kwilangulushapo ne. 30 Mambo byonkatu byo mwabujile kukookela Lesa,+ bino luno wimubila lusa+ na mambo a kubula kukookela kwabo,+ 31 byonkabyo, wimubila lusa na mambo a kubula kukookela kwabo, bino na mambo a kino wakonsha kwibobila lusa. 32 Lesa wibashinkila pamo bonse mu kubula lukookelo,+ pa kuba’mba bonse ebobile lusa.+
33 Byo bwavulapo bunonshi bwa Lesa, ne maana ne byo ayuka! Bunchibamambo bwanji byo bwakatazhapo kwibuyuka ne mashinda anji byo akatazhapo kwialondalonda! 34 Mambo “ñanyi wayuka milanguluko ya Yehoba,* nangwa ñanyi waikala wa kumubuulako maana?”+ 35 Nangwa “ñanyi watatwijilepo kumupapo kintu kuba’mba amubwezhezhekyo?”+ 36 Mambo bintu byonse bifuma kwi aye kabiji ye walengela’mba bikaleko ne kwikala byaikalako na mambo a aye. Lukumo lwikale kwi aye myaka ne myaka. Amena.