Ku Bena Ngalatiya
5 Na mambo a buno bwana bwa bene, Kilishitu witukasulula. Onkao mambo, kosai+ kabiji kange mwikase jibiji ku kikonkoji kya buzha ne.+
2 Amiwa Paulo mbena kwimwambila namba umvwe mwaya ku mukanda, kechi mukamwenamo byawama mwi Kilishitu ne.+ 3 Kabiji mbena kuvululako muntu yense uya ku mukanda namba wafwainwa kulama Mizhilo yonse.+ 4 Mwaabana ne Kilishitu anweba mubena kukeba kutelwa’mba baoloka na mambo a mizhilo;+ mwafumako ku lusa lwanji lukatampe. 5 Atweba tubena kupembela kwikala baoloka na mambo a mupashi ne na lwitabilo lwetu. 6 Mambo mwi Kilishitu Yesu, kuya ku mukanda ne kubula kuya ku mukanda byo byatu,+ kana lwitabilo lwingila mu butemwe.
7 Mwanyemenenga bulongo.+ Ñanyi wimulengela’mba muleke kukookela bukine? 8 Lesa wimwichile kechi wimwitabishe amba muleke kukookela bukine ne. 9 Tumbizho tucheche tulengela muvuba yense kututumuka.+ 10 Naketekela’mba anweba muji mwi Nkambo+ kechi mukalangulukila mungi ne; bino awa ubena kwimukatazha,+ nangwa muntu wa byepi nangwa wa byepi, bakamuzhachisha luzhachisho lwamufwainwa. 11 Balongo bami, amiwa umvwe nkisapwila mukanda, mambo ka o mbena kukimanyikilwa? Ko kuba’mba kichi* kya lumanamo kechi+ kyaikala ke kya kwituntulako ne. 12 Bantu babena kwimubuula’mba muye ku mukanda, abo bene bakayeko.*
13 Balongo bami, mwaichilwe kwikala baana ba bene; bino kange mwingijishenga buno bwana bwa bene kubilamo bisakasaka mubiji ne,+ poso kwiingijila anwe bene na bene mu butemwe.+ 14 Mambo Mizhilo yonse yapwila mu uno mukambizho umo wa kuba’mba: “Wafwainwa kutemwa mukwenu byonka byo witemwa obe mwine.”+ 15 Umvwe saka mwisuma ne kwija anwe bene na bene,+ mwafwainwa kujimuka kuchina’mba mwakeonauna anwe bene na bene.+
16 Nemwambila namba, Endainga monka mwayila lutangijilo lwa mupashi+ kabiji kechi mukoba bisakasaka mubiji ne.+ 17 Mambo mubiji ulwa na mupashi, kabiji mupashi naye ulwa na mubiji; abino bintu kechi byendela pamo ne, kuba’mba mubule kuba bintu byo mukeba kuba.+ 18 Kabiji umvwe mubena kutangijilwa na mupashi kechi muji mu mizhilo ne.
19 Mingilo ya mubiji yamwekeshatu patoka, kabiji yo ino, bulalelale,*+ bubipisho, byubilo bya kwizozola,*+ 20 kupopwela bankishi, kupopwela mipashi,*+ kushinta, lutobo, kichima, bukaji, mapata, mabano, mepatulo, 21 lunkumbwa, kupendwapendwa,+ kusangalala kubi* ne bintutu bikwabo byapasha bino.+ Mbena kwimujimwinako jimo pa mambo a bino bintu byonkatu byo nemujimwineko kala namba, aba boba bino bintu kechi bakaswana Bufumu bwa Lesa ne.+
22 Pakuba bipangwa bya mupashi ke butemwe, lusekelo, mutende, kutekanya,* lusa, buwame,+ lwitabilo, 23 kukooka muchima ne kwikanya.+ Ku bintu bya uno mutundu kechi kuji muzhilo ne. 24 Kabiji aba ba kwa Kilishitu Yesu bapopela pa kichi mubiji pamo na bya lwiso ne bya kusakasaka.+
25 Umvwe tubena kwikela mwayila lutangijilo lwa mupashi, twendenga bulongo monka mwayila lutangijilo lwa mupashi.+ 26 Kange twikale ba kwitota kwatu,+ kwikyombesha ne kwiubila kichima ne.+