Musapwishi

11 Tayai* kajo kenu pa mema,+ mambo mukekataana jikwabo umvwe papita moba avula.+ 2 Abanyai kajo kamo ku bantu batanu na babiji nangwa ku batanu na basatu,+ mambo kechi mwayuka bintu byatama* bikamweka pano pa ntanda ne.

3 Umvwe makumbi afinda, anokesha mvula mukatampe pano pa ntanda; kabiji inge kichi kyaponena ku kabeta ka ku bulenge nangwa ku kabeta ka ku buyeke, kikekala konkakwa ko kyaponena.

4 Muntu utala bibena kwenda mwela kechi ukabyala nkunwa ne, ne yewa utala makumbi kechi ukanowa kajo ne.+

5 Byonkatu byo mwabula kuyuka bingila mupashi mu bikupa bya mwana* uji munda ya inanji,+ byo byo mwabula ne kuyuka bintu byonse byauba Lesa wa kine.+

6 Byalai nkunwa yenu lukelo kabiji mabanga kange mwikaletu ne;+ mambo kechi mwayuka ikamena ne, kana iye nyi, kana yoya, nangwa kana yonse ikamena.

7 Kyeya nakyo kyawama bingi, kabiji kyawama meso kumona kyeya. 8 Mambo inge muntu waikala myaka yavula, asangalele mu yoyo myaka yonse.+ Kabiji wafwainwa kuvuluka’mba moba a bya malwa akonsha kuvula. Bintu byonse bikamweka kulutwe, bikekala ke byatu.+

9 Obewa nsongwalume, sangalela mu moba a bunsongwalume bobe, kabiji muchima wobe asekele mu bwanyike bobe. Saka uba bintu monka mukebela muchima wobe ne kuya konse kukutangijila meso obe; bino yuka’mba Lesa wa kine ukakuchibila mambo* pa bintu byonse byo uba.+ 10 Onkao mambo, fumya makatazho mu muchima wobe ne kuzhikijila mubiji wobe ku bintu byatama, mambo moba a bwanyike ne a bunsongwalume o atu.+