Nkalata ya Bubiji ku Bena Kolinda
12 Nafwainwa kwitota. Nangwa kechi kyayilamo ne, pano nsakwamba pa bimwesho+ ne byambo bya lumwekesho byafuma kwi Nkambo.+ 2 Nayuka muntu uji mwi Kilishitu, myaka 14 yapitapo—kana na mubiji nangwa kwa kubula mubiji, kechi nayuka ne; Lesa ye wayuka—bamutwajile mu jiulu ja busatu. 3 Kine namuyuka uno muntu—kana bamutwajile mu mubiji nangwa kwa kubula mubiji, kechi nayuka ne; Lesa ye wayuka— 4 ye batwajile mu paladisa, kabiji waumvwine byambo byo bakonsha kubula kwamba kabiji byo babula kuswisha muntu kwamba. 5 Nketotela mu muntu wa uno mutundu, bino kechi nketota ne, poso mu kubula kukosa kwami. 6 Nangwa kya kuba nkeba kwitota, kechi nkekala muntu wabula maana ne, mambo nkamba bukine. Bino nekanya kuba kino, pa kuba’mba muntu nangwa umo abule kukilamo kunnemeka kukila pa bintu byo amona mwi amiwa nangwa byo omvwa kwi amiwa, 7 na mambotu a bintu byo bammwesha.
Pa kuba’mba babule kukizhamo kuntumbijika, bambikile mwiba mu mubiji,+ malaika wa kwa Satana, kuba’mba ampumepumenga pa kuba’mba babule kukizhamo kuntumbijika. 8 Namusashijile Nkambo bimye bisatu pa mambo a kino kintu namba kimfume. 9 Bino aye wañambijile’mba: “Lusa lwami lukatampe lwa kuwaina, mambo bulume bwami bubena kulumbulukila mu kubula kukosa.”+ Byonkabyo, na lusekelo nketotela mu kubula kukosa kwami, pa kuba’mba bulume bwa Kilishitu butwajijile kwikala pe amiwa nobe tente. 10 Onkao mambo, nsekela mu kubula kukosa, mu kutukwa, mu bimye bya kukajilwa, mu kumanyikwa ne mu makatazho na mambo a Kilishitu. Mambo umvwe nakooka, ngikala ke wakosa.+
11 Naaluka ke wabula maana. Yenu mwandengela kwikala bino, mambo yenu mwafwainwa kundumbulula. Mambo batumwa benu bawamisha kechi bankijile mu kintu nangwa kimo ne, nangwa kya kuba newatu.+ 12 Kine anweba mwimwenejile biyukilo bya butumwa bwami byamwekele mwi anweba na kuchinchika kukatampe,+ ne na biyukilo ne bya kukumya* ne mingilo ikatampe.+ 13 Nanchi ñanyi kintu kyalengejile’mba babule kwimubila bibusa byavula kukila bipwilo bikwabo byo nabujile amiwa kwimukatazhapo?+ Ndekelaiko mambo pa kino kintu kyo natamishe.
14 Umvwai! Kino kyo kimye kya busatu kyo nakeba kwiya ko muji, kabiji kechi nkemukatazhapo ne. Mambo kechi mbena kukebako bintu byenu ne,+ mbena kukebako anweba bene;+ mambo baana kechi baketekelwa kutujila bintu bansemi babo ne, bino bansemi bo bafwainwa kutujila baana babo. 15 Mambo amiwa nkapana na lusekelo bintu byami byonse ne kwipana ami mwine na mambo a anweba.*+ Amiwa byo nemutemwa bingi, nanchi anweba mwafwainwa kuntemwa pacheche nyi? 16 Nangwa byonkabyo, kechi nemukatezhepo ne.+ Pano bino, mwamba’mba, “nemujimbaikile” kabiji nemukwachile “mu bujimuku.” 17 Nanchi amiwa nemujimukijile kupichila mu umo wa boba bo nemutumijile nyi? 18 Nakambizhe Titusa ne kumutumina pamo na mulongo. Nanchi Titusa wimujimukijile nyi?+ Nanchi kechi twaendelenga mu mupashi umotu nenyi? Nanchi kechi twaendelenga mu ngayo imotu nenyi?
19 Nanchi kimye kyonsekye mwitulangulukijilenga amba tubena kwifumya mu mambo o mubena kwitupamo nyi? Tubena kwamba kwi Lesa byo tuji mwi Kilishitu. Bino anweba batemwe, bintu byonse byo tuba twibyuba’mba bimukomeshe. 20 Mambo nachina namba byo nkeya nkabule kwimutaana mwaikala mo mbena kubula kukebela, kabiji nkabule kwikala kwi anweba mo mubena kubula kukebela, bino kuchina’mba kwakekala lutobo, kichima, bukaji, mabano, miyebe, bya kutepeta,* kwilundumika ne biwowo. 21 Kampe byo nkabwela jibiji, Lesa wami wakeya kundengesha bumvu kwi anweba, ne amiwa nakajila na mambo a boba bavula balengele mambo kala bino babula kulapila ku bubipisho bwabo ne bulalelale* ne byubilo bya kwizozola* byo baubilenga.