Ezikyo

16 Yehoba wañambijile jikwabo amba: 2 “Obewa mwana muntu, buula Yelusalema pa mambo a byubilo byanji bya bunya.+ 3 Ukamubuule’mba, ‘Nkambo Mfumu Yehoba waambila Yelusalema amba: “Obewa wafumine mu kyalo kya Kenana kabiji mo mo wasemekejilwe. Shobe wajinga mwina Amoli,+ ne inobe wajinga mwina Hiti.+ 4 Pa juba jo wasemekelwe, kechi bakuchibile kalongolo ne kukovwa mu mema kuba’mba utoke ne. Kabiji kechi bakushingile mukele ne kukupombakanya mu bisapi ne. 5 Kafwako muntu nangwa umo wakumvwijile lusa ne kukubila bino bintu ne. Kabiji kafwako nangwa umo wakubijile kifyele ne. Pakuba obewa bakutayile kungye mambo bakushikilwe pa juba jo wasemenwe.

6 “‘“Byo napichilenga, nakumwene byo walaajile mu mashi obe saka witaka monka, kabiji nakwambijile’mba: ‘Ikala na bumi.’ Kine, nakubuujile byo walaajile mu mashi obe namba: ‘Ikala na bumi!’ 7 Nakuvuzhizhe nobe bijimwa byasapukilenga mu bujimi, wakomene ne kulepa kabiji wavwajile bya kwikobaika byawamisha. Mabele obe atutukile ne nsuki yobe yakomene; pano bino, wakijingatu matakotu.”’

8 “Nkambo Mfumu Yehoba waamba’mba, ‘Byo napichilenga, nakumwene namba wakoma, wafwainwa kusongolwa. Onkao mambo, nashikwile kivwalo* kyami ne kukuvwika+ kabiji nakulayile namba nkakusongola, kabiji waikele ke mukazhami. 9 Byonkabyo, nakovwele mashi ajinga pa mubiji ne kukushinga manyi.+ 10 Kepo nakuvwikile kivwalo kyo basona bulongo ne makwabilo a kiseba* awama, kabiji nakupombakenye ku mutwe kisapi kya linenyi kyawamisha ne kukuvwika bya kuvwala bya mutengo. 11 Nakuvwikile bya kwikobaika kobaika, makosa ku maboko ne malungo mu nshingo. 12 Kabiji nakuvwikile jishikiyo ku mona ne mashikiyo ku matwi kabiji nakuvwikile munchinya wawama ku mutwe. 13 Wavwajilenga bintu bya ngolode, bya siliva ne bivwalo bya kisapi kya linenyi kyawamisha, bisapi bya mutengo ne bivwalo byo basona bulongo. Wajiilenga kajo ko balenga na bunga bwalamba,+ buki ne manyi kabiji walambile bingi ne kwikala inamfumu.’”*

14 “Nkambo Mfumu Yehoba waamba’mba, ‘Nkuwa* yobe yakumbana mu bisaka bya bantu+ na mambo a buya bobe, mambo nakulengejile kwikala na lukumo.’”+

15 “‘Pano bino, waketekejile mu buya bobe+ kabiji waikele pite na mambo a kutumbalala kobe.+ Waubilenga bukende na muntu yense wapichilenga+ kabiji obewa waikele ke mukambwe wanji. 16 Wasalulwilepo bivwalo byobe bimo ne kwibikobaika mu mapunzha atuntama mo waubijilenga bukende.+ Abino bintu kechi wafwainwa kwibyuba nangwa kukebyubapo jibiji ne. 17 Kabiji wasendanga bintu bya buneme byo balenga na ngolode ne siliva byo nakupele ne kwibingijisha kulengelako bya bwanabulume bya kuba nabyo bukende.+ 18 Kabiji watolanga bivwalo byobe byo basona bulongo ne kwibivweta,* wibishinganga manyi ami ne bya kufutumuna byami binunka bulongo.+ 19 Kabiji shinkwa ye balenganga kufuma ku bunga bwalamba, manyi ne buki byo nakupelenga namba ujenga, obewa wibilambwilenga ku bino bya bwanabulume kwikala bwema bwawama.’*+ Bino byo byo kyamwekele, byo byaamba Nkambo Mfumu Yehoba.”

20 “‘Wasendanga baana ba balume ne baana ba bakazhi bo nasemejile mwi obewa,+ ne kwibapana kwikala ke milambo ku bankishi bobe.+ Nanchi byubilo byobe bya bupite kechi byakilamo nenyi? 21 Waipayilenga baana bami ne kwibapana kwikala milambo na kwibataya mu mujilo.+ 22 Byo waubilenga bintu byonse bya bunya ne bupite, kechi wavulukilepo moba a ku bwanyike bobe byo wajinga matakotu ne byo witakilengatu mu mashi ne. 23 Nkambo Mfumu Yehoba waamba’mba, ‘Malwa obe,+ malwa obe na mambo a bubi bobe bonse bo wauba.’ 24 ‘Washimikile mapunzha a kupopwelamo balesa ne mapunzha atuntama mu mabanza. 25 Kabiji ku mikwakwa yonse washimikileko mpunzha yobe yatuntama, ne buya bobe wibwingijishenga* kubilamo bintu bya bunya na yense wapichilenga,+ kabiji wakizhizhemo kuba bupite.+ 26 Waubilenga bukende na banabalume bena Ijipita,+ ne na bo waikalanga nabo kipi kipi, kabiji wanzhingijishe na mambo a byubilo byobe bya bupite. 27 Pano nsakutanyikila kuboko kwami pe obewa ne kukepesha kajo kobe+ kabiji nkakupana ku banabakazhi bakushikwa,+ ko kuba’mba banabakazhi bena Filishitiya bo walengeshe bumvu na mambo a byubilo byobe byatama.+

28 “‘Byo wabujile kutondwa, waubile bukende na bena Asilya,+ nangwatu byo waubile nabo bukende, kechi watondelwe ne. 29 Na mambo a kino, wakumbenye bupite mu kyalo kya basulu* ne mu Kalodeya.+ Nangwa byonkabyo, kechi watondelwe ne.’ 30 Nkambo Mfumu Yehoba waamba’mba, ‘Muchima wobe wakukatezhenga* bingi* byo waubilenga bino byubilo byonse bya kwizozola nobe pite!+ 31 Pano bino, byo washimikile mu mikwakwa yonse mapunzha obe a kupopwelamo balesa ne mapunzha obe atuntama mu mabanza, kechi waubilenga byuba bapite ne, mambo wakainenga kutambula mali. 32 Obewa wi mwanamukazhi nkende usha mwatawobe ne kuya ku banabalume bangi!+ 33 Bantu bapana bya bupe ku bapite bonse,+ pano bino, obewa yobe upana bya bupe ku bantu bonse bakufwalama,+ kabiji upa mali banabalume bonse beya kwi obewa kuba’mba ube nabo bukende.+ 34 Obewa wapusana bingi na banabakazhi bapite bonse. Kafwako uba bupite bo ubapo obewa ne! Obewa yobe upa banabalume bintu, pakuba abo kafwako kyo bakupapo ne. Byubilo byobe byapusanako na bapite bakwenu.’

35 “Onkao mambo, anweba bapite bonse,+ umvwai byaamba Yehoba. 36 Nkambo Mfumu Yehoba waamba’mba: ‘Na mambo a kuba wakizhizhemo kuba bupite ne kumwesha mubiji wobe byo waubilenga bukende na bakambwe bobe ne kongolokela ku bankishi bobe bonse ba bunya*+ ko watapishishenga mashi a baana bobe,+ 37 amiwa mbena kupwizha pamo bakambwe bobe bonse bo waubanga nabo bukende, bonse bo watemenwe ne boba bonse bo washikilwe. Amiwa nkebapwizha pamo bonse kwi obewa ne kukuvuula kabiji bakakutambila.+

38 “‘Kabiji nkakukambula byonkatu byo nafwainwa kukambula banabakazhi bankende+ ne boba bechila mashi,+ kabiji nkechila mashi obe na mambo a bukaji bwami ne mukao.+ 39 Amiwa nkakupana kwi abo kabiji bakakundula mapunzha obe a kupopwelamo balesa ne konauna mapunzha obe atuntama.+ Kabiji bakakuvuula bivwalo+ ne kukwangata bintu byobe bya buneme bya buya+ ne kukushatu matakotu kuba’mba bakakutambile. 40 Bakakuletela jibumba ja bantu,+ ne abo bakakwasa mabwe+ ne kukwipaya na mapoko abo.+ 41 Bakasoka mazubo obe+ ne kukukambula, banabakazhi bavula saka batalako; nkakulekesha kuba bupite,+ kabiji ukaleka kupana mali. 42 Nkaleka kukuzhingijila+ ne kukubuukila bukaji;+ nkabwezhamo muchima kabiji kechi kikankolapo jibiji ku muchima ne.’

43 “Nkambo Mfumu Yehoba waamba’mba, ‘Na mambo a kuba walubamo bintu bya mu moba a ku bwanyike bobe+ kabiji wanzhingijisha na mambo a byubilo byobe byonse byatama, nkakukambula monka mwayila byubilo byobe byatama, kabiji kechi ukabwezhapo kuba bintu byonse bya bumvu ne bya bunya ne.

44 “‘Umvwa! Bonse bamba bishimpi, bakamba kino kishimpi pe obewa amba: “Byonkatu biji inanji, ne mwana byo byo aji!”+ 45 Obewa ujitu nobe inobe wakaine mwatawanji ne baana banji. Kabiji ujitu nobe nkasobe ne kolojobe bakaine bamwatawabo ne baana babo. Inobe wajinga mwina Hiti ne shobe wajinga mwina Amoli.’”+

46 “‘Samaliya ye kolojobe wa mukazhi+ wikala ku kabeta ka ku buyeke* na baana banji ba bakazhi,*+ kabiji Sodoma ye nkasobe wa mukazhi wikala ku kabeta ka ku bulenge*+ na baana banji.+ 47 Obewa kechi waendelengatu mu mashinda abo ne kulondela byubilo byabo bya bunya ne, bino obewa wakizhizhemo kuba bintu byatama kukila abo.+ 48 Nkambo Mfumu Yehoba waamba’mba, ‘Byonkatu byo nji na bumi, nkasobe Sodoma ne baana banji ba bakazhi kechi baubile bintu byatama kwesakana na byo wauba obewa ne baana bobe ne. 49 Tala! Abino byo bintu byatama byaubile nkasobe Sodoma: Aye ne baana banji ba bakazhi+ belundumikile bingi,+ bajinga na kajo kavula+ kabiji baikele ku matwi nzoo;+ bino kechi bakwashishenga bakajilwa ne bayanji ne.+ 50 Batwajijile kwilundumika+ ne kuba bintu bya bunya ku meso ami,+ onkao mambo, namwene kuba’mba kyawama kwibafumyamo.+

51 “‘Kabiji Samaliya+ kechi walengele mambo avula kwesakana na o walenga ne. Obewa watwajijiletu kuba bintu bya bunya kwibakila, kya kuba walengejile nkasobe ne kolojobe kumweka nobe baoloka na mambo a bintu byonse bya bunya byo waubilenga.+ 52 Pano kisakukulenga bumvu byo wabingisha nkasobe ne kolojobe na mambo. Byo walengele mambo kupichila mu kuba bintu bya bunya kwibakila, abo baoloka kukukila. Onkao mambo, kisakukulenga bumvu mambo walengela nkasobe ne kolojobe kumweka nobe baoloka.’

53 “‘Nkabwezha bazha babo, bazha ba kwa Sodoma ne baana banji ne bazha ba kwa Samaliya ne baana banji; kabiji nkabwezha bazha bobe pamo ne abo,+ 54 pa kuba’mba kikakulenge bumvu; kabiji ukomvwa bumvu na mambo a bintu byatama byo wauba kupichila mu kwibatekenesha. 55 Nkasobe Sodoma ne baana banji bakabwela ku bwikalo bwabo bwa kala, ne kolojobe Samaliya ne baana banji nabo bakabwela ku bwikalo bwabo bwa kala. Kabiji obewa ne baana bobe mukabwela ku bwikalo bwenu bwa kala.+ 56 Mu bwitote bobe, kechi wafwainwe kwambapo bintu byawama pe nkasobe Sodoma, 57 saka bakyangye kusolola bubi bobe ne.+ Babena kukwambila mwenga ku baana ba bena Asilya ne boba bo bekala nabo kipi kipi, kabiji babena kukulengulula ku baana ba bena Filishitiya+ ne bonse bo wikala nabo kipi kipi. 58 Yehoba waamba’mba, ‘Mukazhatwa na byubilo byenu byatama ne bya bunya.’”

59 “Nkambo Mfumu Yehoba waamba’mba: ‘Nkakuba monka mwayila byubilo byobe byatama,+ mambo obewa walengulwile ne kukana lulayañano lwami.+ 60 Pakuba amiwa nkavuluka lulayañano lo nalayañene ne obewa byo wakijinga mwanyike kabiji nkelwikajika kwikala lwa myaka.+ 61 Ukavuluka byubilo byobe ne kumvwa bumvu+ byo ukatambwila nkasobe ne kolojobe, kabiji nkebapana kwi obewa kwikala ke baana bobe ba bakazhi, pano bino, kechi nkoba bino na mambo a lulayañano lobe ne.’

62 “‘Amiwa nkekajika lulayañano lwami ne obewa; kabiji po po ukayuka’mba amiwa yami Yehoba. 63 Nkambo Mfumu Yehoba waamba’mba, ‘Byo nkakufuchilako mambo onse o walengele,+ ukavuluka ne kukankamanatu na mambo a bumvu.’”+