Ezikyo
24 Mu mwaka wa butanu na buna, mu ñondo wa bujikumi, pa juba ja bujikumi ja ñondo, Yehoba wañambijile jikwabo amba: 2 “Obewa mwana muntu, nemba jino juba,* jonka ja lelo. Pa jino jonka juba, mfumu wa Babilona ubena kulukuka Yelusalema.+ 3 Wambe kishimpi* ku kisaka kya milengulwila ne kwibabuula’mba:
“‘Nkambo Mfumu Yehoba waamba’mba:
“Shikika mwipika* pa mujilo ubikemo ne mema.+
4 Kabiji ubikemo ne bipimvwa bya nyama,+ byonka byawamisha,
Bijoma ne maboko; uyuzhemo ne bikupa.
5 Shikula mukooko wawamisha wa mu jitanga,+ kabiji ku mwipika usonseleko nkunyi yavula.
Teka bipimvwa bya nyama ne bikupa bijimo kuba’mba bipyetu kulu.”’
6 “Onkao mambo, Nkambo Mfumu Yehoba waamba’mba:
‘Malwa obe obewa muzhi wichila mashi,+ mwipika uji na kabuwa, ye bakankalwa kufumyamo kabuwa!
Utolengamo kitumba kimo kimo+ ne kwibipwishamo byonse; kange wibite bubale ne.
7 Mambo aa mashi akiji monka mu muzhi;+ wiechijile pa jibwe pabula kintu.
Kechi wiechijile panshi ne kuzhiikapo maloba ne.+
8 Pa kuba’mba nshinkanye nanji,
Nalekela mashi pa jibwe jibena kubekauka pabula kintu
Kuba’mba mashi amwekenga.’+
9 “Onkao mambo, Nkambo Mfumu Yehoba waamba’mba:
‘Malwa anji awa muzhi wichila mashi!+
Nkakulumbikila mulumba wa nkunyi.
10 Lumbika nkunyi ne kwambwilapo mujilo,
Utekepo nyama, ubikemo ne binunka bulongo kabiji uleke bikupa bipyetu kulu.
11 Shikika mwipika wa mukuba wabulamo bintu pa makala pa kuba’mba atwe kyuya,
Achiletu ngee.
Ndochi iji mukachi ifumemo+ ne kabuwa kajimo kalamaukemo.
12 Nekookeshapotu kyatu na kumuwamisha
Mambo kabuwa kajimo kakoselamo.+
Utaye mwipika uji na kabuwa mu mujilo!’
13 “‘Bubi bobe bwaishile na mambo a byubilo byobe bya bunya.+ Naesekeshe kuba namba nkutokeshe, bino wakankelwe kutoka ku bubi bobe. Kechi ukatoka ne, posotu bukaji bwami pe obewa bukatontoloke.+ 14 Amiwa Yehoba yami naamba. Bya malwa bikamweka. Kechi nkakulekatu nangwa kukumvwina bulanda nangwa kubwezhamo muchima wami ne.+ Bakakuchibila mambo monka mwayila mashinda obe ne byubilo byobe,’ byo byaamba Nkambo Mfumu Yehoba.”
15 Kabiji Yehoba wañambijile jikwabo amba: 16 “Obewa mwana muntu, nsakukwipayila mulunda nobe, nobe mu kukopa kwa jiso.+ Kechi wafwainwa kwikala na bulanda ne; kabiji kechi wafwainwa kujila* nangwa kulukumuna mipolo ne. 17 Ushikunukengatu, kabiji kechi wafwainwa kulondela bisho byuba bantu inge muntu wafwa ne.+ Ipombakanye kisapi+ ku mutwe ne kuvwala makwabilo obe.+ Kechi wafwainwa kuvweta ntomombo* yobe+ ne kuja kajo ko bakakuletela ku bantu bangi ne.”*+
18 Nesambile na bantu lukelo, kabiji mabanga mukazhami wafwile. Onkao mambo, lukelo naubijile monka mo bankambizhizhe. 19 Bantu banshikishenga’mba: “Nanchi kechi usakwitubuula bino bintu byo ubena kuba byo bilumbulula kwi atweba nenyi?” 20 Nebakumbwile’mba: “Yehoba wañambila’mba, 21 ‘Buula kisaka kya Isalela amba: “Nkambo Mfumu Yehoba waamba’mba, ‘Katatakatu nzhilulule nzubo yami yazhila,+ yo mwitotelamo, yo mwatemwa bingi ne kuta muchima.* Baana benu ba balume ne ba bakazhi bo mwashile mu muzhi bakafwa ku mpoko.+ 22 Mukobe byonka byo nauba. Kange mukavwete ntomombo yenu ne kuja kajo ko bakemuletela ku bantu bangi ne.+ 23 Mukepombakanye bisapi ku mitwe yenu ne kuvwala makwabilo enu. Kange mukobe bulanda nangwa kujila ne. Pakuba anweba mukafwa na mambo a bubi bwenu+ kabiji mukejilanga anwe bene na bene. 24 Ezikyo waikala ke kayukilo kenu.+ Byonkatu byo auba, byo byo mukoba ne anweba. Bya malwa byo bikafika, po po mukayuka’mba amiwa yami Nkambo Mfumu Yehoba.’”’”
25 “Kabiji obewa mwana muntu, pa juba jo nkafumyapo bintu byo bakoselamo, ko kuba’mba bintu byo bamwenamo lusekelo, bintu byo batemwa bingi, bintu bikeba michima* yabo kuvwangakotu ne baana babo ba balume ne ba bakazhi,+ 26 bakakubuulabyo ku muntu ukapuluka.+ 27 Pa joja juba ukatatula kwamba kabiji ukesamba na yewa ukapuluka, kabiji obewa kechi ukekala kamaama jibiji ne.+ Ukekala kayukilo kwi abo, ne abo po po bakayuka’mba amiwa yami Yehoba.”